កីឡា

ដៃគូរបស់ មឿន សុខហ៊ុច នៅបារាំងចុងសប្តាហ៍នេះត្រូវបានដូរដាក់អ្នកថ្មី

បានផុស

២ years មុន

នៅ

ថ្ងៃព្រហស្បតិ៍ ២២ មិថុនា ២០២៣

ដោយ

កីឡាករម៉ារ៉ុក Yanis Kassem មិនបានប្រកួតជាមួយអ្នកលេងគុនខ្មែរ មឿន សុខហ៊ុច ក្នុងកម្មវិធី Kun Khmer All Star នៅយប់ថ្ងៃសៅរ៍ ទី២៤ ខែមិថុនា ឆ្នាំ២០២៣ នៅទីក្រុងបារីស ប្រទេសបារាំង។

នៅពេលសារព័ត៌មានកម្ពុជាសាកសួរពីការត្រៀមខ្លួនសម្រាប់ការប្រកួតក្នុងគុនខ្មែរអលស្តារលើកដំបូងនៅប្រទេសបារាំង កីឡាករ Yanis Kassem បានឆ្លើយថា រូបគេមិនបានប្រកួតទេ និងត្រូវបានប្តូរដាក់កីឡាករផ្សេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបគេបាននិយាយថា ៖«ខ្ញុំមិនបានប្រកួតទេក្នុងកម្មវិធីគុនខ្មែរអលស្តារនៅប្រទេសបារាំងទេ ពីព្រោះខ្ញុំឥឡូវនេះកំពុងស្ថិតនៅប្រទេសថៃ។ ខ្ញុំពិតជាសោកស្តាយដែលមិនបានប្រកួត។ តាមខ្ញុំដឹងថា គេដូរដាក់កីឡាករផ្សេង តែខ្ញុំអត់ដឹងថា កីឡាករណាទេ»។ រូបគេទើបតែប្រកួតកាលពីប៉ុន្មានថ្ងៃមុននេះនៅប្រទេសបារាំង។

ស្ថិតក្នុងវ័យប្រហែលជា២៥ឆ្នាំ Yanis Kassem ជាកីឡាករម្នាក់ដែលមានបទពិសោធច្រើននៅលើសង្វៀន ដោយសាររូបគេបានហ្វឹកហាត់ និងប្រកួតនៅប្រទេសថៃ។ រូបគេធ្លាប់ប្រកួតបានប្រមាណជាង៣០ដង។

ទោះបីជាយ៉ាងណា រហូតដល់ពេលនេះ អ្នករៀបចំកម្មវិធីប្រកួតដែលដឹកនាំ ដោយលោក ស៊ន អេលីត នៅមិនទាន់ប្រកាសជាផ្លូវការអំពីការដោះដូរកីឡាករដែលត្រូវប្រកួតជាមួយ មឿន សុខហ៊ុច ឡើយ។

តាមការគ្រោងទុក អ្នកលេងគុនខ្មែរ៤នាក់ដែលបានធ្វើដំណើរពីប្រទេសកម្ពុជាទៅប្រកួតក្នុងកម្មវិធីប្រដាល់ Kun Khmer All Star វេលាម៉ោង១០យប់ ថ្ងៃសៅរ៍ ទី២៤ ខែមិថុនា ឆ្នាំ២០២៣ នៅសង្វៀន Michel Jaz Gymnasium តំបន់ Bussy Saint George ក្នុងទីក្រុងបារីស ប្រទេសបារាំងមានដូចជា ពេជ្រ សម្បត្តិ, មឿន សុខហ៊ុច, អេលីត សម្ភស្ស និង អេលីត សាន់៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ