កីឡា

លោក ឃីម បូរី សម្លឹងឃើញក្រុម៤ជាគូប្រជែងខ្លាំងក្នុងលីគរដូវកាលថ្មី

បានផុស

២ years មុន

នៅ

ថ្ងៃសុក្រ ៣០ មិថុនា ២០២៣

ដោយ

លោក ឃីម បូរី សម្លឹងឃើញក្រុមធំ៤ដែលជាគូប្រជែងដ៏លំបាកបំផុតសម្រាប់ជម្រើសជើងឯក ខេមបូឌានព្រីមៀរលីគរដូវកាលថ្មី២០២៣-២៤ ដែលនឹងចាប់បើកនាថ្ងៃទី៥ ខែសីហា ឆ្នាំ២០២៣។

ក្នុងពិធីចាប់ឆ្នោត និងណែនាំពីគោលការណ៍ប្រកួតសម្រាប់រដូវកាលថ្មី លោក ឃីម បូរី គ្រូបង្គោលរបស់ណាហ្គាវើលដ៍បានឲ្យដឹងថា លោកសប្បាយចិត្តដែលខេមបូឌានព្រីមៀរលីគរដូវកាលថ្មីកើនឡើងដល់១០ក្រុម។ សមាជិកថ្មីគឺ ព្រៃវែង និង អាយអេសអាយ ដង្កោសែនជ័យ ជាក្រុមដែលរៀបចំបានល្អមុនពេលចូលរួមប្រកួតក្នុងលីគលើកដំបូង ស្របទៅនឹងលីគក្នុងតំបន់ ក៏ដូចជានៅអឺរ៉ុប។ ជាពិសេសពេលវេលាចាប់ផ្តើមនៅពាក់កណ្តាលឆ្នាំ និងត្រូវបញ្ចប់រហូតដល់ពាក់កណ្តាលឆ្នាំថ្មី។ ចំណុចនេះធ្វើឲ្យក្លិបនីមួយៗមានពេលវេលាគ្រប់គ្រាន់សម្រាប់ការផ្លាស់ប្តូរកីឡាករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតកីឡាករណាហ្គាវើលដ៍រូបនេះបានឲ្យដឹងថា ចំពោះការរៀបចំក្រុមគឺត្រៀមបានរួចរាល់ហើយទាំងកីឡាករក្នុងស្រុក និងកីឡាករបរទេស។

រដូវកាលថ្មីនេះ គណៈកម្មការរៀបចំការប្រកួតបានកំណត់ឲ្យមានកូតាកីឡាករក្នុងតំបន់អាស៊ានម្នាក់ក្នុងចំណោមកីឡាករបរទេស ដូច្នេះការប្រែប្រែថ្មីមួយទៀតសម្រាប់លីគកំពូលកម្ពុជា។ ពាក់ព័ន្ធនឹងករណីនេះ លោក ឃីម បូរី បានបន្ថែមថា ពាក់ព័ន្ធនឹងកូតាកីឡាករអាស៊ានគឺជាការប្រកួតប្រជែងលីគនៅក្នុងតំបន់ ប៉ុន្តែក៏អាចប៉ះពាល់ដល់កីឡាករក្នុងស្រុកដែរ ពីព្រោះត្រូវកាត់បន្ថយកីឡាករខ្មែរម្នាក់នៅលើទីលាន។

លោក ឃីម បូរី សម្លឹងឃើញក្រុមខ្លាំងចំនួន៤ដែលជាគូប្រជែងខ្លាំងក្នុងការដណ្តើមជើងឯក ប៉ុន្តែក៏មិនអាចមើលស្រាលក្រុមផ្សេងៗទៀតដែរ ពីព្រោះក្រុមនីមួយៗសុទ្ធតែត្រៀមខ្លួន និងរៀបចំក្រុមបានល្អដូចគ្នា។

«ចំពោះក្រុមខ្ញុំគិតថា នៅដដែលគឺភ្នំពេញក្រោន ស្វាយរៀង វិសាខា បឹងកេត ដែលជាក្រុមមានការប្រកួតប្រជែងខ្លាំងមែនទែនសម្រាប់យើង។ តែយើងក៏មិនអាចមើលស្រាលក្រុមផ្សេងៗបានដែរដូចជា គិរីវង់សុខសែនជ័យ អង្គរថាយហ្គឺរជាដើម សូម្បីតែក្រុមទើបឡើងមកលីគថ្មីក៏រៀបចំបានល្អ»។ លោក ឃីម បូរី បានបញ្ជាក់។

ខេមបូឌានព្រីមៀរលីគរដូវកាល២០២៣-២៤ នឹងចាប់ផ្តើមនៅថ្ងៃសៅរ៍ ទី៥ ខែសីហា ដែលមានក្លិបចំនួន១០គឺ ម្ចាស់ការពារជើងឯកឆ្នាំចាស់ ភ្នំពេញក្រោន ព្រះខ័នរាជស្វាយរៀង វិសាខា ណាហ្គាវើលដ៍ បឹងកេត ក្រសួងការពារជាតិ អង្គរថាយហ្គឺរ គិរីវង់សុខសែនជ័យ និងសមាជិកថ្មី អាយអេសអាយ ដង្កោសែនជ័យ និង ព្រៃវែងអេហ្វស៊ី។