លន បញ្ញា ត្រៀមរួចរាល់ប៉ះជើងខ្លាំង ហ្គូមបេ ដែលធ្លាប់ស្មើ Rodtang

កីឡាករ លន បញ្ញា នឹងត្រូវជួបជើងខ្លាំងកីឡាករ អិនសេដូ ហ្គូមបេ ដើម្បីប្រកួតដណ្តើម ខ្សែក្រវាត់គ្រុឌគុន​ខ្មែរ​អន្តរជាតិ ទម្ងន់៦៥គីឡូក្រាម នាល្ងាចថ្ងៃអាទិត្យ ទី៣ ខែកញ្ញា ឆ្នាំ២០២៣ នៅសង្វៀនទូរទស្សន៍ជាតិកម្ពុជាក្នុងតំបន់ OCIC ជ្រោយចង្វារ រាជធានីភ្នំពេញ។

មុនការប្រកួតចូលមកដល់កីឡាករ លន បញ្ញា បានសិក្សា និង​ដឹងច្បាស់ពីដៃគូ​របស់​​ខ្លួន។ ហ្គូមបេ​ជា​ជើង​ខ្លាំង​មួយ​រូប​ដែល​ធ្លាប់​ប៉ះ​ជើង​ខ្លាំង​ថៃ​ច្រើន​នាក់មក​ហើយ​ក្នុង​នោះ ធ្លាប់ប្រកួតស្មើពិន្ទុជាមួយជើងខ្លាំងកីឡាករ Rodtang កាលពីឆ្នាំ២០១៧ និងចាញ់ខ្លា​ចាស់​ សែនឆៃ កាលពីឆ្នាំ២០១៦។ សម្រាប់ការប្រកួតចុងក្រោយរបស់កីឡាករ អិនសេដូ ហ្គូមបេ បានផ្តួលកីឡាករ​ថៃ ភីខេ សែនឆៃ ក្នុងទឹកទី ៣នៅសង្វៀន Lumpinee។

លន បញ្ញា ជា​កីឡាករ​ឃីកបុកស៊ីង និង​គុន​ខ្មែរ​ដ៏​ល្អ​ម្នាក់​នៅ​ក្នុង​ប្រទេស​កម្ពុជា​ដែល​រូប​គេ​បាន​ឈ្នះ​មេដាយ​មាស ១ និងប្រាក់១ ពី​កីឡា​ស៊ីហ្គេម​ពីរ​លើក​ចុង​ក្រោយ។ ក្នុង​ស៊ីហ្គេមលើកទី ៣២ រូប​គេ​​ទទួល​បាន​មេដាយ​មាសលើ​កីឡាឃីកបុកស៊ីង​​ទម្ងន់ ៦៧គីឡូក្រាម ក្រោយឈ្នះកីឡាករ Haris Sofyan Abdul របស់ឥណ្ឌូណេស៊ី។

ក្នុងនាមជាម្ចាស់ខ្សែក្រវ៉ាត់៣គ្រឿងស្ថាប័នផ្សេងគ្នា លន បញ្ញា មានដើមកំណើតនៅខេត្ត ព្រៃវែង។ ការប្រកួត ៤ លើកចុងក្រោយឈ្នះទាំង ៤ក្នុងនោះ ដោយផ្តួលកីឡាករ ហ្វានិមិត្ត ក្នុងទឹកទី១, ផ្តួលកីឡាករ ហ្វាដាំឆៃ ក្នុងទឹកទី១, ឈ្នះពិន្ទុកីឡាករ ហ្វុន លួង និងកីឡាករ ហ្នឹងត្រាកាន។

ក្នុងជំនួបដណ្តើមខ្សែក្រវាត់គ្រុឌ ទម្ងន់៦៥គីឡូក្រាម រវាងកីឡាករ លន បញ្ញា ជួបជាមួយកីឡាករ អិនសេដូ ហ្គូមបេ ជាការប្រកួតដ៏គួរឲ្យចាប់អារម្មណ៏ ដែលអ្នកគាំទ្រទន្ទឹងរងចាំ។

លន បញ្ញា និយាយថា៖«ខ្ញុំបានត្រៀមខ្លួនបានល្អ១០០% ហើយនឹងត្រៀមស្វាគមហ៍កីឡាករ អិនសេដូ ហ្គូមបេ ដែលល្បីថាខ្លាំងមកពីអាហ្រ្វិក។ ខ្ញុំសន្យាថា ខិតខំប្រឹងប្រែង ទាំងកម្លាំងកាយកម្លាំងចិត្តនិងស្មារតី ដើម្បីដណ្តើមយកខ្សែក្រវាត់មួយនេះឲ្យបាន»។

កីឡាករប្រដាល់គុនខ្មែរ ដែលមកពីមជ្ឍមណ្ឌលកីឡាកងយោធពលខេមរភូមិន្ទ នឹងអាចយកឈ្នះជើងខ្លាំងកីឡាករ អិនសេដូ ហ្គូមបេ ហើយក្លាយជាម្ចាស់ខ្សែក្រវាត់គុនបានដែរឬទេ៕

អត្ថបទ៖ ផា រតនា