កីឡា

ព្រះខ័នរាជស្វាយរៀង បន្តកុងត្រាថ្មីជាមួយលោកគ្រូ Pep Muñoz

បានផុស

១ year មុន

នៅ

ថ្ងៃពុធ ១៣ មីនា ២០២៤

ដោយ

ក្លិបបាល់ទាត់ព្រះខ័នរាជស្វាយរៀង បានប្រកាសជាផ្លូវការពីការបន្តកុងត្រាថ្មីជាមួយគ្រូបង្វឹក Pep Muñoz សញ្ជាតិអេស្ប៉ាញ បន្ទាប់ពីលោកដឹកនាំក្រុមបានយ៉ាងល្អក្នុងរដូវកាលនេះ។

ការបន្តកុងត្រាថ្មីនេះកើតឡើង ក្រោយពេលលោកបានជួយឲ្យក្លិបដែលមានមូលដ្ឋាននៅខេត្តស្វាយរៀងឈរលេខ១ ក្នុងពានរង្វាន់ខេមបូឌានព្រីមៀរលីគ និងឡើងដល់វគ្គ៤ក្រុមចុងក្រោយ ពានរង្វាន់សម្ដេចតេជោ ហ៊ុន សែន រដូវកាល២០២៣-២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pep Muñoz បានក្លាយជាគ្រូបង្គោលក្លិបព្រះខ័នរាជស្វាយរៀងកាលពីខែឧសភា ឆ្នាំ២០២៣។ បុរសអាយុ៤៣ឆ្នាំ គឺជាគ្រូបង្វឹកសញ្ជាតិអេស្ប៉ាញកាន់អាជ្ញាប័ណ្ណ UEFA Pro-License មានបទពិសោធជាង១៩ឆ្នាំ។ ចាប់ផ្តើមអាជីពដំបូងនៅក្រុម UE Lleida ក្នុងប្រទេសអេស្ប៉ាញ បន្ទាប់រូបលោកក៏បានចូលរួមជាក្រុម FC Barcelona រយៈពេល៤ឆ្នាំជាមួយក្រុមយុវជន U19 និង Barcelona B ហើយជួយឲ្យក្រុមមួយនេះឈ្នះពានរង្វាន់ U19 UEFA Champion League ម្តង និងឈ្នះពានលីគយុវជន២ដង មុនទៅកាន់ប្រទេសចិន ដែលជាកន្លែងលោកចំណាយពេល ៧ឆ្នាំដឹកនាំក្រុមជាច្រើននៅទីនោះដូចជា Huanghai FC, Shandong Fc និងក្រុមជម្រើសជាតិចិន។

ក្រោយចំណាយពេលជាង១០ខែជាមួយបាល់ទាត់នៅកម្ពុជា លោក Pep Muñoz ពិតជាធ្វើឲ្យអ្នកគាំទ្រភ្ញាក់ផ្អើលដោយកំពុងក្តាប់ឱកាសឈ្នះពាន២ធំក្នុងមួយរដូវកាល។ មុនពេលមកដឹកនាំក្រុមព្រះខ័នរាជស្វាយរៀង គ្រូបង្វឹកសញ្ជាតិអេស្ប៉ាញរូបនេះក៏បានស្វែងយល់ពីបាល់ទាត់ក្នុងប្រទេសកម្ពុជាខ្លះៗដែរ។

លោក Pep Muñoz និយាយថា ៖«មុនពេលខ្ញុំមកដឹកក្លិបនៅកម្ពុជា ខ្ញុំក៏បានមើលការប្រកួតលីគ និងលីគខាប់នៅរដូវកាលមុនខ្លះៗដែរ។ ពេលខ្ញុំចូលដឹកនាំព្រះខ័នរាជស្វាយរៀង ជាក់ស្តែងការប្រកួតកាន់តែតានតឹងខ្លាំង ព្រោះក្រុមនីមួយៗសុទ្ធតែរៀបចំបានល្អ។ ពេលលីគមានការប្រកួតប្រជែងខ្លាំងក៏ធ្វើឲ្យក្រុមជម្រើសខ្លាំងដែរ តែអ្វីៗគឺត្រូវការពេលវេលា។ខ្ញុំជឿថា បាល់ទាត់នៅកម្ពុជានឹងរីកចម្រើនពីមួយឆ្នាំទៅឆ្នាំ»៕

អត្ថបទ៖ ផា រតនា