Connect with us

កីឡា

លោក អ៊ូ តារា បញ្ជាក់ថា គ្រូបង្ហាត់ល្បុក្កតោមិនបានតម្លៃខ្ពស់ទេ

បានផុស

នៅ

លោក អ៊ូ តារា អគ្គលេខាធិការ​រង​សហព័ន្ធ​កីឡា​គុន​ល្បុក្កតោ បាន​បដិសេធ​​ជុំ​វិញ​អ្នក​ជំនាញ​អារ្យធម៌​ដែល​បានលើក​ឡើង​ពី​គ្រូ​បង្ហាត់​​គុន​ល្បុក្កតោ​យក​តម្លៃ​ថ្លៃ​​ពេក​នៅ​តាម​សាលា​រដ្ឋ និង​ឯកជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាល​ពី​ពេល​ពី​ថ្ងៃ​ទី​១៨ ខែ​មេសា អ្នក​ជំនាញ​អារ្យធម៌ លោក រ័ត្ន សណ្តាប់ បាន​ប្រាប់​ទៅ​សារព័ត៌មាន​ Fresh News ​ដោយ​លោក​ចង់​ឃើញ​សាលា​រៀន​រដ្ឋ និង​​ឯកជន​ទូទាំង​ប្រទេស​បង្ហាត់​ក្បាច់​គុនល្បុក្កតោ ប៉ុន្តែ​គ្រូ​បង្ហាត់​យក​ថ្លៃ​ពេក​ដែល​ធ្វើ​ឲ្យ​ពិបាក​ក្នុង​ការ​ដាក់​បញ្ចូល​គុន​ល្បុក្កតោ​ក្នុង​កម្មវិធី​សិក្សា។

លោក អ៊ូ តារា ក៏​ជា​តារា​សម្តែង​ក្បាច់​គុន​​មួយ​រូប​បាន​​ប្រាប់​សារព័ត៌មាន​«កម្ពុជា​ថ្មី»​ថា ៖«​អ្នក​យក​ព័ត៌មានទៅសួរ​ព័ត៌មាន​ចំបុគ្គល​ដែល​មិន​ចំ​គោល​ដៅ មិន​មាន​ជំនាញល្បុក្កតោ​ពិត​ប្រាកដ។ ​គាត់​ទៅ​​សួរ​បុគ្គល​ណា​ដែល​មិន​​ជាប់​ព័ន្ធ​នឹង​សហព័ន្ធ​កីឡា​គុន​ល្បុក្កតោ អីចឹង​ព័ត៌មាន​អត់​ច្បាស់ ទៅ​វាយ​តម្លៃ​ផ្សេង តែ​តាម​ពិត​មិន​ដូច​អ្វី​ដែល​គាត់​លើក​ឡើង​នោះ​ទេ»។

លោកអគ្គលេខាធិការ​រង​បាន​បញ្ជាក់​ថា ៖«គ្រូ​បង្ហាត់​កីឡា​គុន​ល្បុក្កតោ​មិន​បាន​តម្លៃ​ច្រើន​នោះ​ទេ។ ដូច​​គ្រូ​បង្ហាត់​នៅ​សាលា AIS មួយ​ម៉ោង​​​បាន​តែ​៩​ដុល្លារ ហើយមួយ​អាទិត្យ​បង្ហាត់​បាន​៤​ម៉ោង​ មួយ​ខែ​បាន​១៦​ម៉ោង​ អីចឹង​បាន​លុយ​មិន​ដល់​២០០​ដុល្លារផង។ សាលាខ្លះ​បាន​តិច​ជាង​ហ្នឹង​ទៀត តែ​បើ​សាលា​ឯកជន​តូច​ខ្លះ​​គ្រាន់​បើ។ គេ​ផ្តល់​លុយលើក​ទឹក​ចិត្ត​គ្រូ​លើស​ពី​ប្រាក់​ម៉ោងបង្ហាត់»។

នៅ​លើ​គណនី​ Facebook ផ្ទាល់​ខ្លួន លោក អ៊ូ តារា បានលើក​ឡើង​ថា ៖«ប្រហែលជាត្រូវការគ្រូ តែទាក់ទងទៅបុគ្គល បានជាទទួលទិន្ន័យពត៌មានបែបនេះ។ ​កន្លង​មក​ក្នុង​ការ​ដាក់​បញ្ចូលគុនល្បុក្កតោទៅតាមសាលារដ្ឋ សហព័ន្ធបានអនុវត្តកម្មវិធី​ និងនិតិវិធីមួយចំនួន ដោយសាលាមិនបាច់ចំណាយថវិកា»។

ល្បុក្កតោ​ជា​កីឡាអត្តសញ្ញាណ​ជាតិ​មួយ​​ជា​រឿយ​ៗ​​ត្រូវ​បាន​សម្តែង​បង្ហាញ​ជូន​ភ្ញៀវ​ជាតិ អន្តរជាតិ​ក្នុង​ព្រឹត្តិការណ៍​ធំ​​ៗ ហើយ​កំពុង​​ត្រូវ​បាន​អភិវឌ្ឍ​ឲ្យ​រីក​ចម្រើន​ទាំង​ក្នុង​ និង​ក្រៅ​ប្រទេស។ ល្បុក្កតោ​ត្រូវ​បាន​ដាក់​បញ្ចូល​ក្នុង​អង្គការ UNESCO​ជា​ផ្លូវ​ការ​កាល​ពី​ថ្ងៃ​ទី​​២៩ ខែ​វិច្ឆិកា ឆ្នាំ​២០២២ និងបញ្ចូល​ក្នុង​កីឡា​ស៊ីហ្គេម លើក​ទី​៣២ ឆ្នាំ​២០២៣ ​ដោយ​មាន​ប្រទេស​នៅ​ក្នុង​តំបន់​មួយ​ចំនួន​បាន​ហ្វឹក​ហាត់​ដើម្បី​ចូល​រួម​ប្រកួត​ដណ្តើម​មេដាយ​ជា​ផ្លូវ​ការ៕

អត្ថបទ៖ វីរបុត្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម