កីឡា

វិផា ប្រាប់ថា ក្រុមនារីភ្នំពេញក្រោន នឹងនាំចូលកីឡាការិនីបរទេសបន្ថែម

បានផុស

១ year មុន

នៅ

ថ្ងៃពុធ ២៦ កុម្ភៈ ២០២៥

ដោយ

ថ្នាក់ដឹកនាំក្រុមបាល់ទាត់នារីភ្នំពេញក្រោន អាចនឹងនាំចូលកីឡាការិនីបរទេសបន្ថែមទៀតដើម្បីពង្រឹងសមត្ថភាពក្រុមសម្រាប់ការប្រកួតលីគនារីកម្ពុជា រដូវកាលថ្មី និងជាពិសេសត្រៀមពានរង្វាន់អាស៊ី AFC Women’s Champions League នាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីបានឈ្នះជើងឯកលីគនារីកម្ពុជា រដូវកាល២០២៤-២៥ ក្រុមនារីភ្នំពេញក្រោន ទទួលបានកៅអីតំណាងឲ្យក្រុមបាល់ទាត់នារីកម្ពុជាចូលរួមប្រកួតក្នុងពានរង្វាន់កម្រិតអាស៊ី AFC Women’s Champions League នៅរដូវកាល២០២៥-២៦។ រដូវកាលថ្មី ក្រុមនារីភ្នំពេញក្រោន មានទាំងការប្រកួតពានរង្វាន់ក្នុងស្រុក និងក្រៅប្រទេស ដែលត្រូវការត្រៀមខ្លួនឲ្យបានល្អប្រសើរបន្ថែមទៀត។

បច្ចុប្បន្ន ក្រុមនារីភ្នំពេញក្រោនជាក្រុមល្អជាងគេនៅក្នុងប្រទេសកម្ពុជា បន្ទាប់ពីពួកគេបានឈ្នះជើងឯកលីគនារីកម្ពុជាពីររដូវកាលជាប់គ្នា ប៉ុន្តែការប្រកួតប្រជែងក្នុងស្រុកមិនសូវមានកម្រិតខ្ពស់ទេ។ នៅពេលពួកគេឈានទៅប្រកួតពានរង្វាន់កម្រិតអាស៊ាន និងអាស៊ីរឹតតែពិបាកខ្លាំង។

កីឡាការិនី សឿន វិផា ខ្សែបម្រើដ៏សំខាន់របស់ក្រុមនារីភ្នំពេញក្រោនបាននិយាយក្នុងបទសម្ភាសជាមួយ«កម្ពុជាថ្មី»ថា ៖«សម្រាប់រដូវកាល ២០២៤-២០២៥ ពួកយើងសប្បាយរីករាយ ដែលមានការប្រកួតប្រជែងខ្លាំង ហើយយើងទទួលបានលទ្ធផលល្អ។ យើងរីករាយដែលឈានមកដល់ចំណុចមួយជាគោលដៅដែលយើងបានដាកតាំងពីដើមរដូវកាល។ គោលដៅរបស់យើងគឺទៅលេងពានអាស៊ី AFC Women’s Champions League នៅរដូវកាលក្រោយ នៅពេលយើងឈ្នះជើងឯកលីគ។ យើងនឹងក្លាយជាក្រុមនារីតំណាងឲ្យកម្ពុជាជាលើកដំបូងនៅពានរង្វាន់អាស៊ី»។

ម្ចាស់អាវលេខ១០បានសង្កត់ធ្ងន់ថា ៖«យើងអាចប្រកួតប្រជែងជាមួយគេបាន។ បន្ទាប់ពីនេះទៅ យើងអាចនឹងមាននាំចូលកីឡាការិនីបរទេសបន្ថែមទៀតដើម្បីអាចប្រកួតប្រជែងជាមួយក្លិបលំដាប់អាស៊ី។ យើងនឹងខិតខំហ្វឹកហាត់ឲ្យខ្លាំងបន្ថែមទៀតដើម្បីត្រៀមខ្លួនប្រកួតពានរង្វាន់លីគនារីរដូវកាលក្រោយ និងស្វែងរកលទ្ធផលឲ្យបានល្អប្រសើរបន្ថែមទៀត»។

បច្ចុប្បន្ន ក្រុមនារីភ្នំពេញក្រោន មានកីឡាការិនីបរទេសម្នាក់គឺ Miki Ichikawa សញ្ជាតិជប៉ុនមកពីលីគលំដាប់ទី២របស់ប្រទេសជប៉ុន។ កីឡាការិនីជប៉ុនរូបនេះបានក្លាយជាកម្លាំងដ៏សំខាន់ក្នុងការជួយក្រុមឲ្យឈ្នះជើងឯក។

ក្រុមនារីភ្នំពេញក្រោន បានធ្វើដំណើរកម្សាន្តទៅតំបន់មាត់សមុទ្រ បន្ទាប់ពីបានឈ្នះជើងឯកលីគនារីកម្ពុជា។ ក្រោយមកពួកគេបានធ្វើដំណើរទស្សនកិច្ច និងហ្វឹកហាត់នៅប្រទេសជប៉ុនដើម្បីបង្កើនសមត្ថភាព ក៏ដូចជាភ្ជាប់ទំនាក់ទំនងជាក្លិបនៅប្រទេសជប៉ុន៕