កីឡា

លោក Josep Muñoz ចាត់ទុកទឹកដីអង្គរថាយហ្គឺរជាកន្លែងពិបាកឈ្នះ

បានផុស

៤ សប្តាហ៍ មុន

នៅ

ថ្ងៃសុក្រ ២៨ កុម្ភៈ ២០២៥

ដោយ

ក្រុមព្រះខ័នរាជស្វាយរៀង ត្រូវធ្វើដំណើរទៅសួរសុខទុកក្រុមល្អ អង្គរថាយហ្គឺរ នាល្ងាចថ្ងៃសៅរ៍ ទី១ ខែមីនា ឆ្នាំ២០២៥ សម្រាប់ការប្រកួតសប្តាហ៍ទី២ វគ្គ៦ក្រុមចុងក្រោយ ពានរង្វាន់ខេមបូឌានព្រីមៀរលីគ២០២៤-២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនេះត្រូវបានលោក Josep Muñoz គ្រូបង្វឹកព្រះខ័នរាជស្វាយរៀង ចាត់ទុកជាការប្រកួតដ៏លំបាកសម្រាប់ក្រុមរបស់លោក ប៉ុន្តែលោកសង្ឃឹមធ្វើបានល្អជាងកាលពីជុំទី២នៅទឹកដីរបស់ក្រុមខេត្តសៀមរាបមួយ។

លោក Josep Muñoz បាននិយាយថា ៖«អង្គរថាយហ្គឺរតែងតែធ្វើបានល្អក្នុងដីរបស់ខ្លួន ហើយជាការប្រកួតដ៏លំបាកសម្រាប់ពួកយើងដែលទៅលេងនៅទីនោះ។ យើងនឹងព្យាយាមធ្វើឲ្យបានល្អ។ យើងសង្ឃឹមថា យើងនឹងធ្វើបានល្អជាងលើកមុន។ យើងលេងបានល្អ អាស្រ័យលើកត្តាទីលាននៅទីនោះ ទីលានមានស្ថានភាពល្អ ហើយក្រុមអង្គរថាយហ្គឺរក៏ជាផ្នែកមួយជួយឲ្យការប្រកួតបានល្អដែរ»។

លោកបានបន្តថា ៖«ទោះបីជាការប្រកួតមុន យើងឈ្នះមែន ប៉ុន្តែយើងចង់ឲ្យមានភាពប្រសើរជាមុន។ នៅក្នុងដីរបស់អង្គរថាយហ្គឺរមិនងាយមានក្រុមណាយកឈ្នះដោយស្រួលនោះទេ។ បន្ទាប់ពីការប្រកួតពានរង្វាន់សម្តេចតេជោ ហ៊ុន សែន ក្នុងពាក់កណ្តាលសប្តាហ៍ គឺគ្មានបញ្ហាសម្រាប់យើងទេ ពីព្រោះក្រុមយើងតែងតែលេង២ប្រកួតក្នុងមួយសប្តាហ៍។ វាល្អសម្រាប់យើងដែលមានការប្រកួត២លើកក្នុងមួយសប្តាហ៍ ហើយកីឡាករក៏អាចស្តារកម្លាំងកាយមកវិញគ្រប់គ្រាន់ដែរ ហើយរក្សាចង្វាក់លេងបានល្អ»។

ជួបគ្នា២លើកកាលពីជើងទី១ និងជើងទី២ ក្រុមអង្គរថាយហ្គឺរមិនអាចយកឈ្នះ ក្រុមព្រះខ័នរាជស្វាយរៀងបានឡើយ។ ជើងទី១ នៅទឹកដីខេត្តស្វាយរៀង ពួកគេបានចាញ់ដោយលទ្ធផល ៤-២ នៅថ្ងៃទី២៤ ខែតុលា ឆ្នាំ២០២៤ និងជើងទី២នៅទឹកដីខេត្តសៀមរាប អង្គរថាយហ្គឺរបន្តចាញ់ដោយលទ្ធផល ២-៣ នៅថ្ងៃទី១ ខែកុម្ភៈ ឆ្នាំ២០២៥។