កីឡា

អ៊ុយក្រែន បង្កការភ្ញាក់ផ្អើលក្នុងព្រឹត្តិការណ៍បាល់ទះពិភពលោក Men’s Volleyball Nations League

បានផុស

១ year មុន

នៅ

ថ្ងៃសៅរ៍ ១៤ មិថុនា ២០២៥

ដោយ

ក្រុមបាល់ទះជម្រើសជាតិ អ៊ុយក្រែន បានធ្វើឲ្យពិភពលោកមានការភ្ញាក់ផ្អើលចំពោះការចូលរួមប្រកួតក្នុងព្រឹត្តិការណ៍បាល់ទះពិភពលោក Men’s Volleyball Nations League ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាំងពីដើមមក អ៊ុយក្រែនមិនធ្លាប់បានជាប់មកជុំចុងក្រោយនេះទេ ដោយធ្លាក់ក្នុងវគ្គជម្រុះប្រចាំតំបន់អឺរ៉ុបរហូត។ ទើបឆ្នាំ២០២៥ ពួកគេទទួលបានកៅអីឡើងមកជុំ១៨ក្រុមចុងក្រោយជាលើកដំបូងក្នុងប្រវត្តិសាស្ត្ររបស់ខ្លួន ខណៈប្រទេសរបស់ខ្លួនមានសង្គ្រាមថែមទៀត។

ទោះបីជាទើបលេចមុខចូលរួមប្រកួតវគ្គនេះលើកទី១ ប៉ុន្តែ អ៊ុយក្រែន បានធ្វើឲ្យមហាជនចាប់អារម្មណ៍យ៉ាងខ្លាំង។ ការប្រកួតលើកទី១ ពួកគេបានឈ្នះក្រុមខ្លាំងគឺ សហរដ្ឋអាមេរិក ដោយលទ្ធផល ៣-០ ហើយលើកទី២កាលពីយប់មិញនេះ បានយកឈ្នះ គុយបា ដោយលទ្ធផល ៣-២។

ក្រុមគុយបា ទើបតែឈ្នះ ប្រេស៊ីល ៣-២ ប៉ុន្តែគុយបាក៏បានចាញ់២ប្រកួតគឺ ចាញ់ ស្លូវេនៀ ១-៣ មុនពេលចាញ់ អ៊ុយក្រែន ២-៣។

ជាមួយគ្នានេះ ក្រុមបាល់ទះជម្រើសជាតិ ប៊ុលហ្គារី ក៏មិនធម្មតាដែរបានយកឈ្នះ អាហ្សង់ទីន ដោយលទ្ធផលតដៃមិនរួច ៣-០។ អាហ្សង់ទីន បានយកឈ្នះម្ចាស់មេដាយមាស អូឡាំពិក បារាំង ដោយលទ្ធផល ៣-១ និងឈ្នះ កាណាដា ៣-២ ប៉ុន្តែមកចាញ់ ប៊ុលហ្គារី ដែលប្រកួតមុនចាញ់ អ៉ីតាលី ១-៣។ ប៊ុលហ្គារី ទើបប្រកួតបាន២លើកគឺឈ្នះ១ និងចាញ់១។

គិតត្រឹមព្រឹកថ្ងៃទី១៤ ខែមិថុនា នេះ ក្រុមជម្រើសជាតិ ស្លូវេនៀ ប៉ូឡូញ និង អ៊ុយក្រែន មិនទាន់ស្គាល់បរាជ័យឡើយ ប៉ុន្តែពួកគេទើបឆ្លងកាត់បាន២ប្រកួតប៉ុណ្ណោះ។ ជប៉ុន អ៉ីតាលី និងអាហ្សង់ទីន បានឈ្នះ២ និងចាញ់១ដូចគ្នាសម្រាប់ការប្រកួត៣លើកដំបូង៕