កូន​អ្នក​បន្ទាយ​មាន​ជ័យ ស៊ឹម ម៉ៃសំ តស៊ូ​រហូត​បង្ហាញ​ខ្លួនយ៉ាង​ល្អ ​ឲ្យ​ក្រុម​នារី​កម្ពុជា

កីឡាការិនី ស៊ឹម ម៉ៃសំ បាន​សម្រេច​បំណង​ប្រាថ្នា​របស់​ខ្លួន​ដែល​ចង់​ជាប់​ក្នុង​ក្រុម​បាល់ទាត់​ជម្រើស​ជាតិ​នារី​កម្ពុជា សម្រាប់​ការ​បង្ហាញ​ខ្លួន​លើ​ឆាក​អន្តរជាតិ។

ក្នុង​បទ​សម្ភាស​ជា​មួយ​សារព័ត៌មាន​«កម្ពុជា​ថ្មី» កាល​ពី​ខែ​កុម្ភៈ ឆ្នាំ​២០២៥ នៅ​ពេល​ប្រកួត​វគ្គ​ផ្តាច់​ព្រ័ត្រ លីគ​នារី​កម្ពុជា ស៊ឹម ម៉ៃសំ បាន​រៀប​រាប់​ថា កញ្ញា​មាន​ដើម​កំណើត​នៅ​ខេត្ត​បន្ទាយ​មាន​ជ័យ។ កញ្ញា​បាន​ចាប់​ផ្តើម​លេង​បាល់ទាត់​តាំង​ពី​ក្មេងនៅ​ពេល​រៀន​សាលាបឋម​សិក្សា រហូត​ដល់​អនុវិទ្យាល័យ។

ក្រោយ​មក កីឡាការិនី​បាល់ទាត់​រូប​នេះ​បាន​បោះ​បង់​ចោល​មួយ​រយៈ​ពេល​ធំ ដោយសារ​មិន​សូវ​មាន​សកម្មភាព​បាល់ទាត់​ផ្នែក​នារី​នៅ​ក្នុង​ប្រទេស​កម្ពុជា។ ទោះ​បី​ជា​យ៉ាង​ណា នៅ​ពេល​សហព័ន្ធ​កីឡា​បាល់ទាត់​កម្ពុជា រៀបចំ​ឲ្យ​មាន​ការ​ប្រកួត​លីគ​នារី​ ហើយ​មាន​ក្រុម​ជា​ច្រើនត្រូវ​កីឡាការិនី​ចូល​រួម កញ្ញា​ក៏​បាន​សម្រេច​លេង​បាល់ទាត់​ឡើង​វិញ។

ស៊ឹម ម៉ៃសំ ​បាន​ប្រាប់​ថា នៅ​ឆ្នាំ​២០២០ កញ្ញា បានចាប់​ផ្តើម​លេង​បាល់ទាត់​វិញ បន្ទាប់​ពី​ឃើញ​មាន​សកម្មភាព​កីឡា​បាល់ទាត់​ផ្នែក​នារី​ច្រើន។ ដំបូង​ឡើយ កញ្ញា​​បាន​លេង​ឲ្យ​ក្រុម​សាលា​ Best នៅ​ខេត្ត​បន្ទាយ​មាន​ជ័យ។ នៅ​ឆ្នាំ​ ២០២០- ២១ កញ្ញា​បាន​ចូល​រួម​ជា​មួយក្រុមបាល់ទាត់​ខេត្ត​កំពង់​ឆ្នាំង​សម្រាប់​ការ​ចូល​រួម​ប្រកួតលីគ​នារី​កម្ពុជា។ រដូវ​កាល ​២០២១-២២ កញ្ញា​បាន​ទៅ​ចូល​រួម​ជា​មួយ​ក្រុម​បាល់ទាត់​នារី​ខេត្ត​សៀម​រាប សម្រាប់​ការ​ប្រកួត​លីគនារី​កម្ពុជា។ ក្រោយ​បង្ហាញ​ខ្លួន​បាន​យ៉ាង​ល្អ​ឲ្យ​ក្រុម​នារី​ខេត្ត​សៀមរាប គ្រូ​បង្វឹក​ក្រុម​នារី​​ វិសាខា បាន​ចូល​មក​លេង​កាល​ពី​​​ដើម​ឆ្នាំ​ ២០២៤។

ការ​ចូល​រួម​ជា​មួយ​ក្រុម​នារី វិសាខា កីឡាការិនី​រូប​នេះ​បង្ហាញ​ខ្លួន​បាន​ល្អ​ក្នុង​លីគ​នារី​កម្ពុជា រដូវ​កាល ២០២៤-២៥។ កញ្ញា​បាន​ជួយ​​ឲ្យ​ក្រុម​ទទួល​បាន​ចំណាត់​ថ្នាក់​លេខ​២។ អ្វី​ដែល​កាន់​តែ​ពិសេស កញ្ញា បាន​ឈ្នះ​ពាន​កីឡាការិនី​ល្អ​ប្រចាំ​ព្រឹត្តិការណ៍​លីគ​នារី​កម្ពុជា និង​ ​ពាន​ស្បែក​ជើង​មាស ក្នុង​នាម​ជា​កីឡាការិនី​រក​បាន​គ្រាប់​បាល់​ច្រើន​ជាង​គេ។

ស៊ឹម ម៉ៃសំ បាន​និយាយ​ថា ៖«​​ខ្ញុំ​ធ្លាប់​ឈ្នះ​ពាន​ថ្នាក់​ខេត្ត តែ​​នៅ​លីគ​ធ្លាប់​បាន​លេខ​៣ ​​ឲ្យ​ក្លិប​នារី​ខេត្ត​សៀម​រាប។ បន្ទាប់​មក ​​ខ្ញុំ​ចូល​រួម​ជា​មួយ​ក្រុម​ វិសាខា បាន​លេខ​២​ក្នុង​លីគ​នារី​កម្ពុជា រដូវ​កាល ២០២៤-២៥»។

សមិទ្ធផល និង​ការ​បង្ហាញ​សមត្ថភាព​បាន​ល្អ​ជា​មួយ​ក្រុម​នារី វិសាខា បាន​បើក​ផ្លូវ​​ឲ្យ​កីឡាការិនី ស៊ឹម ម៉ៃសំ ​ធ្វើ​តេស្ត​ជាប់​គ្នា​ក្នុង​ក្រុមបាល់ទាត់​ជម្រើស​ជាតិ​នារី​ជា​លើក​ដំបូង​សម្រាប់​ការ​ប្រកួត​មិត្តភាព​អន្តរជាតិ​ជា​មួយ ក្រុម​ជម្រើស​ជាតិនារី ហ្គាំ និង​ការ​ប្រកួត​ជម្រុះ​ក្នុង​ពូល​ពាន​នារី​អាស៊ី AFC Women’s Asian Cup 2026 ដែល​កម្ពុជា​ធ្វើ​ម្ចាស់​ផ្ទះ​ជម្រុះ​ពូល G។

កីឡាការិនី ស៊ឹម ម៉ៃសំ បាន​បង្ហាញ​ខ្លួន​ជា​ផ្លូវ​ការ​​​លើ​ទី​លានជា​លើក​ដំបូង​ឲ្យ​ក្រុម​ជម្រើស​ជាតិ​នារី កម្ពុជា​ ក្នុង​វគ្គ​ទី២ នៅ​ពេល​ក្រុម​នារី​កម្ពុជា បាន​យក​ឈ្នះ​ក្រុម​នារី ហ្គាំ ដោយ​លទ្ធផល ១-០ ។ បន្ទាប់​មក កញ្ញា ត្រូវ​បាន​ប្តូរ​ចូល​លេង​​ក្នុង​វគ្គ​ទី២ ជាលើក​ទី២ នៅ​ពេល​ក្រុម​នារី​កម្ពុជា បាន​ស្មើ​ជា​មួយ ក្រុម​នារី​ខ្លាំង ហុងកុង ដោយ​លទ្ធផល ១-១ ។

អ្នក​គាំទ្រ​បាន​មើល​ឃើញ​ពី​របៀប​លេង​ដ៏ល្អនៅ​តំបន់​ប្រយុទ្ធ​របស់​ក្រុម​នារី កម្ពុជា សម្រាប់​ការ​ប្រកួត​ជា​មួយ​ក្រុម​នារី ហុងកុង បន្ទាប់​ពី​ប្តូរ​ចូលកីឡាការិនី ស៊ឹម ម៉ៃសុំ កីឡាការិនី ពឿន គន្ធា និង កីឡាការិនី​ វឿន សុថាន។

តាម​រយៈ​ការ​បង្ហាញ​ខ្លួន​ទាំង​ពីរ​លើក​នេះ​បាន​ផ្តល់​ឲ្យ​កញ្ញា ស៊ឹម ម៉ៃសំ កាន់​តែ​មាន​ទំនុក​ចិត្ត​លើ​ខ្លួន​ឯង និង​សប្បាយ​រីក​រាយ​សម្រាប់​បំណង​ប្រាថ្នា​ជាប់​ជម្រើស​ជាតិ​បាន​សម្រេច។ ជា​ពិសេស​ការ​បង្ហាញ​ខ្លួន​លើ​ទី​លាន​ទាំង​ពីរ​លើក​បាន​​ទាក់​ចិត្ត​គ្រូ​បង្វឹក​គឺ​លោក ឃួន ឡាប៊ូរ៉ាវី និង Conor Nestor កាន់​តែ​ច្រើន៕

អត្ថបទ៖ វីរបុត្រ