កីឡា

កាន់ ស្រីរ័ត្ន អំពាវនាវមហាជនឲ្យជួយគាំទ្រស្ត្រីរត់ប្រណាំងចម្ងាយឆ្ងាយ ២១ Km មិនសូវមានអ្នកលេងឡើយ

បានផុស

៥៨ វិនាទី មុន

នៅ

ថ្ងៃសុក្រ ១៨ កក្កដា ២០២៥

ដោយ

កីឡាការិនី កាន់ ស្រីរ័ត្ន អំពាវនាវមហាជនឲ្យជួយគាំទ្រ និងលើកទឹកចិត្តដល់ស្ត្រីដែលប្រកួតរត់ប្រណាំងចម្ងាយឆ្ងាយ ២១Km នាពេលបច្ចុប្បន្ន ព្រោះមិនសូវមាននារីៗលេងលើចម្ងាយឆ្ងាយបែបនេះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនី កាន់ ស្រីរ័ត្ន

កីឡាការិនីជម្រើសជាតិផ្នែកអត្តពលកម្ម កាន់ ស្រីរ័ត្ន បានឲ្យដឹងថា បច្ចុប្បន្ននេះខ្លួនកំពុងហ្វឹកហាត់ និងលេងលើវិញ្ញាសារត់ចម្ងាយឆ្ងាយពិសេសពាក់កណ្ដាលម៉ារ៉ាតុង ២១ គីឡូម៉ែត្រ។ ជាក់ស្ដែងការរត់ចម្ងាយឆ្ងាយផ្នែកនារីនេះមិនសូវមានអ្នកលេងឡើយ ដោយសារតែឆម្ងាយឆ្ងាយពេក និងមានការលំបាកលើការហ្វឹកហាត់។

កីឡាការិនី កាន់ ស្រីរ័ត្ន

ដោយឡែកនៅព្រឹត្តិការណ៍ប្រកួតកីឡាសកលវិទ្យាល័យរដូវក្ដៅពិភពលោក លើកទី៣២ ធ្វើឡើងនៅឯប្រទេសអាល្លឺម៉ង់នេះ ខ្លួននឹងប្រកួតលើវិញ្ញាសាចម្ងាយ ២១គីឡូម៉ែត្រ។ ដូច្នេះបើលទ្ធផលល្អ ឬមិនល្អយ៉ាងណាសូមមហាជនបន្តជួយលើកទឹកចិត្តបន្ថែមដើម្បីឲ្យខ្លួនក៏ដូចជាកីឡាការិនីដទៃមានទឹកចិត្តអាចបន្តខំប្រឹងតទៅទៀតជាជាងបង្អាប់ស្ដីបណ្ដោសណាមួយ។ ស្រីរ័ត្ន ប្ដេជ្ញានឹងខំប្រឹងប្រកួតឲ្យអស់ពីសមត្ថភាពនៅព្រឹត្តិការណ៍កម្រិតពិភពលោកមួយនេះ។

ទិដ្ឋភាពហ្វឹកហាត់ផ្នែករត់ប្រណាំង

បញ្ជាក់ដែរថា សហព័ន្ធកីឡាអត្តពលកម្មស្ម័គ្រចិត្តបានបញ្ជូនកីឡាករ កីឡាការិនី សរុប៣រូបចូលរួមការប្រកួតកីឡាសកលវិទ្យាល័យរដូវក្ដៅពិភពលោក លើកទី៣២ ធ្វើឡើងនៅឯប្រទេសអាល្លឺម៉ង់ ចាប់ផ្ដើមពីថ្ងៃទី១៦ ដល់ ២៧ ខែកក្ដដា ឆ្នាំ២០២៥។ ក្រុមអត្តពលកម្មទាំង ៣រូបនេះរួមមានដូចជា ណឹប ចាន់យូរ៉ុង លេងលើវិញ្ញាសា 100-200m បុរស។ កីឡាការិនី សាង លីដា លេងវិញ្ញាសា 100-200m នារី។ កីឡាការិនី កាន់ ស្រីរ័ត្ន លេងវិញ្ញាសា 21km Half Marathon នារី៕

អត្ថបទដោយ៖ នួន ស៊ីណា

Related Topics:កីឡាអត្តពលកម្ម