សុខ ធី ទម្រាំដណ្តើមបានខ្សែក្រវាត់ ៥ ខ្សែ ជួបដៃគូសុទ្ធតែតឹងតែង

អ្នកប្រដាល់គុនខ្មែររហស្សនាមមនុស្សឈើ សុខ ធី ត្រូវបានគេចាត់ទុកជាអ្នកប្រដាល់លំដាប់កំពូលម្នាក់ប្រចាំទម្ងន់ ៦០ គីឡូក្រាម ហើយក៏ជាកីឡាករប្រដាល់គុនខ្មែរដ៏ជោគជ័យបំផុតម្នាក់នាពេលបច្ចុប្បន្ន។

អ្នកលេងក្បាច់មកពីជាយដែនខេត្ត បន្ទាយមានជ័យ រូបនេះ ទើបតែដណ្តើមបានខ្សែក្រវាត់ ISKA Kun Khmer ពិភព​លោក​ ទម្ងន់ ៦០ គីឡូក្រាម ដែលជាខ្សែក្រវាត់ទី ៥ នៅក្នុងអាជីពរបស់ខ្លួន បន្ទាប់​ពី​ឈ្នះ​កីឡាករ​អេស្ប៉ាញ។ យ៉ាង​ណា បើ​ក្រឡេក​មើល​ប្រវត្តិ​ប្រកួត​ដណ្តើម​ខ្សែ​ក្រវាត់​របស់ សុខ ធី នីមួយ​ៗ គឺមិន​មែន​ជា​រឿង​ងាយ​ស្រួល​នោះ​ទេ ពី​ព្រោះ​ជួបដៃគូសុទ្ធតែ​ខ្លាំង​ៗ។

ខ្សែក្រវាត់​ទី១ គឺ​ខ្សែ​ក្រវាត់​ជើងឯកគុនខ្មែរគូបូតា ​ដែល​រូប​គេ​ បាន​ឈ្នះ​កាល​ពី​ឆ្នាំ​ ២០១៨ ​នៅ​សង្វៀន​បាយ័ន។ ខ្សែ​ក្រវាត់​លើក​ដំបូង​នេះ​មាន​បេក្ខភាព ​៨ ​រូប​ចូលរួម គឺ​កីឡាករ​កម្ពុជា ​៤ ​រូប និង​កីឡាករ​បរទេស​ ៤​ រូប។ នៅ​វគ្គ​ផ្តាច់​ព្រ័ត្រ អ្នក​លេង​គុន​ខ្មែរ​រូប​នេះ​បាន​ឈ្នះ​​កីឡាករ​ ឡុង ជិន ដោយ​ពិន្ទុ​ដើម្បី​ទទួល​បានខ្សែ​ក្រវាត់​ជើងឯកគុនខ្មែរគូបូតា ​អម​ដោយ​ប្រាក់​រង្វាន់​ ៦​ ពាន់​ដុល្លារ​អាមេរិក។

ខ្សែក្រវាត់ទី ២ គឺខ្សែក្រវាត់ KKIF Kun Khmer World Championship ដែល សុខ ធី ដណ្តើមបានកាលពីថ្ងៃទី ៣០ ខែ ធ្នូ ឆ្នាំ ២០២៣។ មុនទទួលបានខ្សែក្រវាត់មួយខ្សែនេះ រូប​គេ​បានប្រកួតយ៉ាងតឹងតែទល់នឹងកីឡាករ ចិន ឈឹង ហ្វូហេង ដែលពេលនោះឈ្នះដោយពិន្ទុ។ លុះក្រោយមក នៅថ្ងៃទី ១៣ ខែ មេសា ឆ្នាំ ២០២៤ កីឡាករ ចិន ម្នាក់ទៀត ឈ្មោះ យៀន ម៉ឹងសេង បានឡើងមកដណ្តើមខ្សែក្រវាត់នេះ ប៉ុន្តែចុងក្រោយ សុខ ធី នៅតែអាចរក្សាខ្សែក្រវាត់នេះបានដដែល។

ខ្សែក្រវាត់ ទី ៣ សម្រាប់ សុខ ធី គឺខ្សែក្រវាត់ Kun Khmer Cambodia Champions។ ខ្សែក្រវាត់នេះ កីឡាករ ដណ្តើមបានពីកីឡាកររួម​ជាតិ ពុធ សំបូរ នៅថ្ងទី ៨ ខែ កុម្ភៈ ឆ្នាំ ២០២៥។ ជំនួបនេះពិតជាកក្រើកខ្លាំង ដោយសារការប្រកួតនេះមិនត្រឹម​តែ​ជាការប្រកួតដណ្តើមខ្សែក្រវាត់ប៉ុណ្ណោះទេ ប៉ុន្តែ​ជាការប្រកួតសងសឹក ដែល សុខ ធី បានចាញ់​ក្នុង​ការ​​ប្រកួតជម្រុះដណ្តើម​រថយន្តផងដែរ។ ចុងក្រោយ សុខ ធី បានយកឈ្នះ ពុធ សំបូរ ដោយពិន្ទុ បន្ទាប់ពីឆ្លងកាត់ ៥ ទឹកពេញ​នៅ​ខេត្ត​ស្វាយរៀង។

ខ្សែក្រវាត់ទី ៤ គឺខ្សែក្រវាត់ X’Treme Kun Khmer ដែល សុខ ធី ដណ្តើមបានពីក្របីព្រៃ ពេជ្រ សម្បត្តិ កាលពីថ្ងៃទី ២៨ ខែ មិថុនា ឆ្នាំ ២០២៥។ ជឿជាក់ថា អ្នកគាំទ្រនៅមិនទាន់ភ្លេចនៅឡើយទេ ចំពោះការប្រកួតដ៏កក្រើកប្រចាំប្រវត្តិសាស្ត្រគុនខ្មែរ។ ការប្រកួតនេះបានធ្វើឱ្យមានការចាប់អារម្មណ៍ខ្លាំងសម្រាប់អ្នកគាំទ្រទូទាំងប្រទេស ដែលជាជំនួបរវាងកំពូលកីឡាករគុនខ្មែរប្រចាំ​ទម្ងន់​ ៦០​គីឡូក្រាម​ ទាំង​ពីរ​នាក់។ ទីបំផុត សុខ ធី បានយកឈ្នះ ពេជ្រ សម្បត្តិ ដោយពិន្ទុ បន្ទាប់ពីការប្រកួត ៥ ទឹកពេញ ​ដើម្បី​ក្លាយជាម្ចាស់ខ្សែក្រវាត់ X’Treme Kun Khmer។

ចុងក្រោយ​បំផុត​ គឺខ្សែក្រវាត់ ISKA Kun Khmer ពិភព​លោក​ ដែល សុខ ធី ទើបដណ្តើមបានកាលពីថ្ងៃទី ២០ ខែ កក្កដា ឆ្នាំ ២០២៥ ។ ខ្សែក្រវាត់នេះរាប់ថាជាខ្សែក្រវាត់ដ៏ធំបំផុតមួយនៅក្នុងអាជីពរបស់កីឡាករមកខេត្ត បន្ទាយមានជ័យ។ សុខ ធី បានឆ្លងកាត់ការប្រកួត ៥ ទឹកយ៉ាងតឹងតែងទល់នឹងកីឡាករ អេស្ប៉ាញ Samuel Olyas ដោយមានទាំងស្នាមបែកចុងចិញ្ចើមខាងឆ្វេងផង ប៉ុន្តែចុងក្រោយ រូប​គេ​មិនបានធ្វើឱ្យអ្នកគាំទ្រអស់សង្ឃឹមឡើយ។ រូប​គេបាន​យក​ឈ្នះ​កីឡាករ អេស្ប៉ាញ ​ដោយពិន្ទុ បន្ទាប់ពីការប្រកួត ៥ ទឹកពេញ៕

អត្ថបទ៖ សេម កុសល