ជំងឺរ៉ាំរ៉ៃ Archives - Kampuchea Thmey Daily

បរិស្ថានមិនល្អ អាចបង្កជាជំងឺរ៉ាំរ៉ៃច្រើនប្រភេទ

សាង ស្រីល័ក្ខ — Mon, 18 Apr 2022 03:27:24 +0000

កត្តាបរិស្ថានដូចជា ការបំពុល បម្រែបម្រួលអាកាសធាតុ ការឡើងកម្ដៅផែនដី ព្រមទាំងការថយចុះស្រទាប់អូហ្សូន ផ្ដល់ផលអវិជ្ជមានដល់សុខភាពមនុស្សយើងយ៉ាងខ្លាំង។

ពិតណាស់ វិបត្តិអាកាសធាតុកំពុងកើនឡើងយ៉ាងឆាប់រហ័ស តួយ៉ាងដូចជាបញ្ហារលកកម្ដៅ គ្រោះរាំងស្ងួត និងខ្យល់ព្យុះ សុទ្ធតែអាចបណ្ដាលឲ្យមានការបំផ្លិចបំផ្លាញយ៉ាងច្រើន និងឆក់យកជីវិតមនុស្សថែមទៀតផង។

កត្តាបរិស្ថាន អាចបង្កជាជំងឺរ៉ាំរ៉ៃអ្វីខ្លះ?

ជាក់ស្ដែង សីតុណ្ហភាពក្ដៅខ្លាំង អាចបង្កើនកំហាប់អូហ្សូនដែលនាំឲ្យមានការឡើងកម្ដៅផែនដី និងអាចបំផ្លាញជាលិកាសួត ក៏ដូចជាបណ្ដាលឲ្យមានផលវិបាកធ្ងន់ធ្ងរសម្រាប់អ្នកជំងឺហឺត និងអ្នកជំងឺសួត។ លើសពីនេះទៅទៀត ការបំពុលបរិស្ថាន និងកាកសំណល់ឧស្សាហកម្ម អាចបង្កឲ្យមានបញ្ហាសុខភាពផ្សេងៗ ដូចជា ជំងឺផ្លូវដង្ហើម ជំងឺហឺត ជំងឺស្ទះសួតរ៉ាំរ៉ៃ (COPD) រលាកទងសួត រលាកច្រមុះ ជំងឺបេះដូង ជំងឺបាក់ទឹកចិត្ត គ្រោះថ្នាក់សរសៃឈាមខួរក្បាល កណ្ដាស់ ក្អក ហត់ ជំងឺរលាកសន្លាក់ គ្រុនចាញ់ ធាត់ ជំងឺទឹកនោមផ្អែម ក៏ដូចជាប្រភេទជំងឺមហារីកមួយចំនួនទៀត។

យើងអាចរក្សាបរិស្ថានស្អាត និងរស់នៅយូរអង្វែងដោយវិធីណាខ្លះ?

វិធីសាស្ត្រងាយៗ និងមានប្រសិទ្ធភាពក្នុងការកាត់បន្ថយផលប៉ះពាល់ប្រចាំថ្ងៃចំពោះបរិស្ថាន មានដូចជា៖

កាត់បន្ថយការប្រើប្រាស់ក្រដាស
កាត់បន្ថយការប្រើប្រាស់ថាមពល
កាត់បន្ថយការប្រើប្រាស់ផ្លាស្ទិក
ប្រើប្រាស់ទឹកដោយសន្សំសំចៃ
ចោលសំរាមក្នុងធុង

ការថែរក្សាបរិស្ថានឲ្យបានស្អាតល្អមានសារសំខាន់ណាស់ ដើម្បីជួយឲ្យយើងមានសុខភាពរឹងមាំ និងរស់នៅយូរអង្វែង។ ដូច្នេះហើយ យើងគួរតែផ្លាស់ប្ដូរទម្លាប់តូចតាចមួយចំនួនប្រចាំថ្ងៃ ដើម្បីជួយឲ្យបរិស្ថានរស់នៅកាន់តែប្រសើរឡើង៕

អត្ថបទផ្ដល់ដោយ៖ Hello Krupet

ចុចអាន៖គួរញ៉ាំអាហារទាំងនេះ មុនពេលញ៉ាំគ្រឿងស្រវឹង

ចុចអាន៖អាហារ ៧ មុខ ធ្វើឲ្យមានអារម្មណ៍ល្អ បំបាត់ភាពតានតឹងចេញពីខាងក្នុង

The post បរិស្ថានមិនល្អ អាចបង្កជាជំងឺរ៉ាំរ៉ៃច្រើនប្រភេទ appeared first on Kampuchea Thmey Daily.

ជំងឺរ៉ាំរ៉ៃសាហាវបំផុត ៤ មានចំណែកលើសពាក់កណ្ដាលអត្រាមរណៈនៅអាស៊ី

Sonya — Thu, 04 Nov 2021 03:06:00 +0000

ជំងឺរ៉ាំរ៉ៃ រួមមាន ជំងឺបេះដូង ជំងឺទឹកនោមផ្អែម គ្រោះថ្នាក់សរសៃឈាមខួរក្បាល និងជំងឺមហារីក ជាឃាតកដ៏សាហាវ ឬអ្នកស្លាប់ដោយសារជំងឺទាំងនេះមានជាងពាក់កណ្ដាលនៃអត្រាមរណភាពនៅបណ្ដាប្រទេសនៅអាស៊ីអាគ្នេយ៍យើង។ តើជំងឺទាំងនេះបង្កផលប៉ះពាល់ដូចម្ដេចខ្លះ?

ជាក់ស្ដែង ប្រជាជនក្នុងតំបន់អាស៊ីអាគ្នេយ៍ ប្រឈមនឹងបញ្ហាជំងឺរ៉ាំរ៉ៃជាច្រើនប្រភេទ ហើយបើយោងតាមអង្គការសុខភាពពិភពលោក (WHO) អត្រាមរណៈ នៅក្នុងតំបន់ដោយសារតែជំងឺរ៉ាំរ៉ៃមានរហូតដល់៥៥%។ ជំងឺទាំងនេះ រួមមានជំងឺបេះដូង ជំងឺទឹកនោមផ្អែម គ្រោះថ្នាក់សរសៃឈាមខួរក្បាល និងជំងឺមហារីក។

ពិតណាស់ ជំងឺរ៉ាំរ៉ៃ ជាប្រភេទជំងឺមិនឆ្លងទាំងនេះ ជាឃាតករលេខ១ ដែលបានឆក់យកជីវិតមនុស្សប្រមាណ៨,៥លាននាក់ក្នុងមួយឆ្នាំៗ។

ការសិក្សាលើអាការៈខ្សោយបេះដូងនៅក្នុងបណ្ដាប្រទេសអាស៊ីអាគ្នេយ៍ បានបង្ហាញថាប្រជាជនអាស៊ីអាគ្នេយ៍យើងប្រឈមនឹងការស្លាប់មុនអាយុសង្ឃឹមរស់ដោយសារជំងឺរ៉ាំរ៉ៃចន្លោះពី ១០ទៅជិត៣០ភាគរយ។

ហ្វីលីពីន ២៧,៩%
មីយ៉ាន់ម៉ា ២៤,៣%
ឥណ្ឌូណេស៊ី ២៣,១%
ម៉ាឡេស៊ី ១៩,៦%
កម្ពុជា ១៧,៧%
វៀតណាម ១៧,៤%
ថៃ ១៦,២%
សិង្ហបុរី ១០,២%

ការសិក្សាមួយទៀតដែលធ្វើឡើងនៅកោះតៃវ៉ាន់ បានរកឃើញជំងឺក្រិនសរសៃឈាមបេះដូង ឬកំណកខ្លាញ់នៅតាមជញ្ជាំងសរសៃឈាម ជាមូលហេតុចម្បងទី២ ដែលធ្វើឲ្យមនុស្សបាត់បង់ជីវិត។ ចំណែកការសិក្សានៅប្រទេសឥណ្ឌាវិញ ជំងឺរ៉ាំរ៉ៃ ដូចជាជំងឺសរសៃឈាមបេះដូង និងគ្រោះថ្នាក់សរសៃឈាមខួរក្បាល បានរួមចំណែកនៃអត្រាមរណៈដល់ទៅ៦០% ។

ជាទូទៅ ជំងឺដ៏កាចសាហាវនេះ កើតឡើងបណ្ដាលមកពីរបៀបរបបនៃការរស់នៅប្រចាំថ្ងៃរបស់យើងម្នាក់ៗ។ ទម្លាប់អាក្រក់មួយចំនួនដូចជារបបអាហារមិនល្អ អសកម្ម និងការប្រើប្រាស់ថ្នាំជក់ សុទ្ធតែបង្កើនហានិភ័យនៃជំងឺរ៉ាំរ៉ៃទាំងនេះ។

ផ្ទុយទៅវិញ ប្រសិនបើយើងមានទម្លាប់ប្រចាំថ្ងៃល្អ រួមមានរបបអាហារត្រឹមត្រូវ ហាត់ប្រាណទៀងទាត់ និងជៀសវាងការជក់បារី ឬថ្នាំជក់ផ្សេងៗ យើងអាចបង្ការគ្រោះថ្នាក់សរសៃខួរក្បាល ជំងឺបេះដូង និងជំងឺទឹកនោមផ្អែម យ៉ាងហោចណាស់៨០%។

តើយើងគួរធ្វើយ៉ាងម៉េច?

ជាលទ្ធផល ទម្លាប់រស់នៅមិនល្អ និងហានិភ័យនៃការកើតជំងឺរ៉ាំរ៉ៃ នៅតែមានវត្តមាននៅក្នុងតំបន់។ យោងតាមការស្ទង់មតិពីមិត្តអ្នកអានរបស់Hello Health ប្រមាណរាប់ពាន់នាក់ មកពីប្រទេសឥណ្ឌូណេស៊ី ម៉ាឡេស៊ី ថៃ មីយ៉ាន់ម៉ា តៃវ៉ាន់ និងឥណ្ឌាបានបង្ហាញថា មិត្តអ្នកអានយើងស្វែងរកប្រធានបទសុខភាពចំនួនបីច្រើនជាងគេ។ ផ្អែកលើការស្ទង់មតិប្រជាជនជាង៩ ០០០នាក់នៅទ្វីបអាស៊ី របស់Hello Health ចាប់ពីខែមិថុនា ដល់ខែវិច្ឆិកា ឆ្នាំ២០២០ បានរកឃើញថាអ្នកអាចនចង់ដឹងបំផុតលើ៖

ទម្លាប់រស់នៅល្អ
ការបង្ការជំងឺ
ការព្យាបាល និងការគ្រប់គ្រងជំងឺ

ការស្ទង់មតិក៏បានបង្ហាញដែរថា ប្រជាជនអាស៊ីអាគ្នេយ៍ក៏មានការបារម្ភខ្លាំងអំពីជំងឺពិសេសផ្សេងទៀតដែរ។

កង្វល់លើបញ្ហាសុខភាពសំខាន់ៗរបស់ប្រជាជនអាស៊ីអាគ្នេយ៍

ការគ្រប់គ្រងទម្ងន់ និងស្រ្តេស បានឈរនៅលំដាប់ថ្នាក់កំពូលដែលប្រជាជននៅអាស៊ីអាគ្នេយ៍មានការបារម្ភបំផុត នេះបើយោងតាមការស្ទង់មតិលើមិត្តអ្នកអានរបស់ Hello Health។

បើនិយាយតែប្រទេសឥណ្ឌូណេស៊ីមួយ ប្រជាពលអ្នកចូលរួមស្ទង់មតិបង្ហាញកង្វល់ខ្លាំងលើ៖

ការគ្រប់គ្រងស្រ្តេស
ការគ្រប់គ្រងទម្ងន់
ការបាក់ទឹកចិត្ត

បញ្ហាការគ្រប់គ្រងទម្ងន់ និងស្រ្តេស នៅតែស្ថិតក្នុងចំណាត់ថ្នាក់នៃកង្វល់ធំបំផុតមួយនៃបញ្ហាសុខភាព ដែលប្រជាជននៅអាស៊ីតែងតែមានចំពោះដៃគូរបស់ខ្លួន។ បញ្ហាទាំងពីរនេះតាមពីក្រោយជំងឺមហារីក ជំងឺបេះដូង និងសម្ពាធឈាមខ្ពស់នៅក្នុងប្រទេសម៉ាឡេស៊ី មីយ៉ាន់ម៉ា និងប្រទេសថៃ។

ចំពោះកង្វល់សុខភាពដែលយើងតែងតែមានការព្រួយបារម្ភចំពោះឪពុកម្ដាយ មានដូចជា សម្ពាធឈាមខ្ពស់ ជំងឺបេះដូង គ្រោះថ្នាក់សរសៃឈាមបេះដូង ជំងឺមហារីក និងការឈឺចាប់រ៉ាំរ៉ៃ ដែលកត្តានេះបញ្ជាក់ឲ្យឃើញថាជនជាតិអាស៊ីនៅតែព្រួយបារម្ភពីបញ្ហាសុខភាពរ៉ាំរ៉ៃចំពោះខ្លួនឯង និងមនុស្សដែលនៅជុំវិញខ្លួន ព្រមទាំងកត្តាហានិភ័យផ្សេងៗ។

កង្វល់សុខភាពចម្បងរបស់ប្រជាជនអាស៊ីចំពោះប្ដី ឬប្រពន្ធ

ប្រជាជនអាស៊ីបានឈរលើចំណាត់ថ្នាក់កំពូល ជាអ្នកដែលបារម្ភចំពោះដៃគូរបស់ខ្លួនរួមមាន ការគ្រប់គ្រងស្រ្តេស និងការគ្រប់គ្រងទម្ងន់។

ការសិក្សានេះបានបង្ហាញជាក់លាក់ថា ក្នុងប្រទេសម៉ាឡេស៊ី ប្រជាជនមានការព្រួយបារម្ភពីជំងឺបេះដូង ឯនៅតៃវ៉ាន់ប្រជាពលរដ្ឋបារម្ភខ្លាំងលើការឈឺចាប់រ៉ាំរ៉ៃ និងជំងឺភ្លេចភ្លាំងមុនអាយុ និងនៅក្នុងប្រទេសថៃ ក៏មានការព្រួយបារម្ភចំពោះសម្ពាធឈាមខ្ពស់ និងជំងឺមហារីក។

កង្វល់សុខភាពចម្បងរបស់ប្រជាជនអាស៊ីចំពោះឪពុកម្ដាយ

ក្នុងតំបន់អាស៊ី ប្រជាជនមានការបារម្ភចំពោះឪពុកម្ដាយលើបញ្ហា សម្ពាធឈាមខ្ពស់ និងជំងឺបេះដូង។

ប្រភេទជំងឺដែលមានអ្នកមើលច្រើនបំផុត នៅលើវិបសាយ Hello Health មានទាក់ទងនឹងជំងឺរ៉ាំរ៉ៃ។ សុខភាពបេះដូងក៏ជាប់លំដាប់កំពូលដែលមានអ្នកទស្សនាច្រើនជាងគេនៅក្នុងវិបសាយHello Health។ ចំណែកឯសម្ពាធឈាមខ្ពស់ ជាស្ថានភាពជំងឺដែលអ្នកអានចាប់អារម្មណ៍ជាងគេនៅក្នុងបណ្ដាប្រទេសភាគច្រើន លើកលែងតែប្រទេសឥណ្ឌា ហើយជំងឺដែលមានការចាប់អារម្មណ៍បន្ទាប់ មានដូចជាជំងឺបេះដូង ជំងឺខ្សោយបេះដូង និងជំងឺសរសៃឈាមបេះដូងផ្សេងទៀត។

ជំងឺមហារីក និងជំងឺទឹកនោមផ្អែម នៅតែមានការចាប់អារម្មណ៍នៅក្នុងវិបសាយរបស់ Hello Health ជាពិសេសជំងឺមហារីកថ្លើម ពោះវៀនធំ សួត និងមហារីកសុដន់។

ប្រភេទជំងឺដែលមានអ្នកមើលច្រើនបំផុត នៅលើគេហទំព័រ Hello Health

ផ្អែកតាមចំនួនអ្នកចូលអានសរុបក្នុងគេហទំព័រ Hello Health (និយាយដោយចំពោះតែនៅកម្ពុជា Hello Krupet) ចាប់ពីថ្ងៃទី២៦ ខែឧសភា ឆ្នាំ២០២១ ដល់ថ្ងៃទី២៥ ខែសីហា ឆ្នាំ២០២១ ចំនួនអ្នកអាចនជំងឺបេះដូង ៤១,៤ភាគរយ ជំងឺមហារីក ៣៦,១ភាគរយ ជំងឺទឹកនោមផ្អែម ២២,៤ភាគរយ និងគ្រោះថ្នាក់សរសៃឈាមខួរក្បាលមាន០,២ភាគរយ។

កត្តាហានិភ័យនៃជំងឺរ៉ាំរ៉ៃ

នៅទ្វីបអាស៊ី ជំងឺរ៉ាំរ៉ៃប្រភេទណាដែលកើតញឹកញាប់បំផុត ហើយវាប៉ះពាល់ដល់រាងកាយយ៉ាងម៉េចខ្លះ?

ជំងឺបេះដូង

ការសិក្សាបានបង្ហាញថា ជំងឺសរសៃឈាមបេះដូង និងខ្សោយបេះដូងមានការកើនឡើងនៅក្នុងតំបន់អាស៊ីអាគ្នេយ៍យើង ជាពិសេសប្រសិនបើយើងមានកត្តាប្រឈមផ្សេងទៀត ដូចជាសម្ពាធឈាមខ្ពស់ ជំងឺទឹកនោមផ្អែម និងជក់បារី។ ជំងឺក្រិនសរសៃឈាមបេះដូង ជាជំងឺមួយដែលកើតឡើងបណ្ដាលមកពីទម្លាប់រស់នៅប្រចាំថ្ងៃ។ កម្រិតសម្ពាធឈាមខ្ពស់ កូលេស្តេរ៉ូលខ្ពស់ ជក់បារី ទឹកនោមផ្អែម និងអសកម្ម ក៏ជាកត្តាហានិភ័យដែលធ្វើឲ្យយើងកើតជំងឺក្រិនសរសៃឈាមបេះដូង។

ជំងឺទឹកនោមផ្អែម

ជំងឺទឹកនោមផ្អែមជាជំងឺដែលមានសន្ទុះកើតឡើងខ្លាំងនៅក្នុងទ្វីបអាស៊ី។ ជំងឺនេះបានសម្លាប់មនុស្សប្រមាណ១,២លាននាក់នៅអាស៊ីអាគ្នេយ៍ និង១,៣លាននាក់ នៅបណ្ដាប្រទេសក្នុងតំបន់ប៉ាស៊ីហ្វិកខាងលិច នេះបើយោងតាមសហព័ន្ធជំងឺទឹកនោមផ្អែមអន្តរជាតិ។

កត្តាធាត់ជ្រុល អាចបង្កើនហានិភ័យក្នុងការវិវដ្តទៅជាជំងឺទឹកនោមផ្អែមប្រភេទ២ ហើយអ្នកជំងឺទឹកនោមផ្អែម ក៏ងាយប្រឈមនឹងការកើតជំងឺសរសៃឈាមបេះដូងផងដែរ។

ជំងឺមហារីក

ពិតណាស់ ជំងឺមហារីកអាចកើតមានចំពោះមនុស្សទូទៅ។ ប៉ុន្តែក៏មានកត្តាជាក់លាក់មួយចំនួន ដែលអាចបង្កើនហានិភ័យនៃជំងឺមហារីកនេះដែរ ដូចជាកត្តាអាយុ និងហ្សែន។

ក្រៅពីនេះ ការប្រើប្រាស់ថ្នាំជក់ក៏អាចបង្កជាជំងឺមហារីកសួត មាត់ បំពង់ក និងសរីរាង្គដទៃទៀត។

គ្រោះថ្នាក់សរសៃឈាមខួរក្បាល

គ្រោះថ្នាក់សរសៃឈាមជាច្រើនករណី បណ្ដាលមកពីរបៀបរបបរស់នៅប្រចាំថ្ងៃ។ ទាំងនេះរួមមាន សម្ពាធឈាមខ្ពស់ ធាត់ជ្រុល ទឹកនោមផ្អែម និងកម្រិតកូលេស្តេរ៉ូលក្នុងឈាមខ្ពស់។ យើងអាចកាត់បន្ថយហានិភ័យនៃគ្រោះថ្នាក់សរសៃឈាមខួរក្បាល តាមរយៈការផ្លាស់ប្ដូរឥរិយាបថទាំងនេះ៖

អសកម្ម
របបអាហារមិនល្អ
ការប្រើប្រាស់គ្រឿងស្រវឹង
ជក់បារី

ជំងឺគ្រោះថ្នាក់សរសៃឈាមខួរក្បាលមាន២ប្រភេទ គឺស្ទះសរសៃឈាមខួរក្បាល និងហូរឈាមក្នុងខួរក្បាល។ ជំងឺស្ទះសរសៃឈាមខួរក្បាលកើតឡើងរហូតដល់ ៨៧%នៃករណីគ្រោះថ្នាក់សរសៃឈាមខួរក្បាល។ បញ្ហានេះកើតឡើងនៅពេលដែលឈាមហូរទៅកាន់ខួរក្បាលប្រែទៅជាកកស្ទះ និងកាត់ផ្ដាច់ការផ្គត់ផ្គង់អុកស៊ីសែនទៅកាន់ខួរក្បាល។ កត្តានេះបណ្ដាលឲ្យកោសិកាខួរក្បាលងាប់ និងបាត់បង់មុខងារ។

ហូរឈាមក្នុងខួរក្បាល បណ្ដាលមកពីការហូរឈាមលើផ្ទៃខួរក្បាល ដោយបណ្ដាលឲ្យដាច់សរសៃឈាមខួរក្បាល។ លក្ខខណ្ឌសុខភាព ដូចជាសម្ពាធឈាមខ្ពស់ និងជំងឺប៉ោងសរសៃឈាម(Aneurysms) អាចនាំឲ្យសរសៃឈាមផ្ទុះ និងលេចធ្លាយឈាម ដែលអាចបន្ថែមសម្ពាធ និងសម្លាប់កោសិកាខួរក្បាល។

ចំណុចសំខាន់ៗ

ជំងឺរ៉ាំរ៉ៃដែលមិនឆ្លង (NCDs) ដូចជាជំងឺបេះដូង ជំងឺទឹកនោមផ្អែម គ្រោះថ្នាក់សរសៃឈាមខួរក្បាល និងជំងឺមហារីក បានឆក់យកជីវិតប្រជាជនអាស៊ីអាគ្នេយ៍ប្រមាណ៨,៥លាននាក់។
ចំពោះកង្វល់សុខភាពធំៗរបស់ប្រជាជនអាស៊ីអាគ្នេយ៍លើខ្លួនឯង និងមនុស្សជាទីស្រលាញ់ គឺជំងឺរ៉ាំរ៉ៃដែលមិនឆ្លង ហើយជំងឺទាំងនេះមានទាក់ទងនឹងកត្តាហានិភ័យផ្សេងៗ រួមទាំងការគ្រប់គ្រងទម្ងន់ ស្រ្តេស និងសម្ពាធឈាមខ្ពស់។
របៀបរស់នៅត្រឹមត្រូវ ការបង្ការជំងឺ ការព្យាបាល និងការគ្រប់គ្រងជំងឺ គឺជាប្រធានបទដែលមានការស្វែងរកច្រើនបំផុតនៅតាមប្រព័ន្ធអនឡាញ។
ជំងឺបេះដូងជាប្រភេទជំងឺដែលមានអ្នកចូលមើលច្រើនបំផុតនៅក្នុងវិបសាយHello Health ហើយសម្ពាធឈាមខ្ពស់ ជាលក្ខខណ្ឌសុខភាពដែលមានការចាប់អារម្មណ៍ច្រើនបំផុតនៅបណ្ដាប្រទេសភាគច្រើន។ ប្រភេទជំងឺផ្សេងទៀតដែលមានអ្នកចូលមើលច្រើន រួមមានជំងឺបេះដូង ជំងឺសរសៃឈាមបេះដូងផ្សេងទៀត ខ្សោយបេះដូង ជំងឺមហារីក និងជំងឺទឹកនោមផ្អែម។
ស្វែងយល់បន្ថែមពីកត្តាហានិភ័យចំពោះជំងឺទូទៅទាំងនេះ ដើម្បីជួយយើងបង្ការ និងគ្រប់គ្រងបញ្ហាសុខភាពទាំងនេះប្រកបដោយប្រសិទ្ធភាព។
របៀបរស់នៅត្រឹមត្រូវ រួមទាំងរបបអាហារសុខភាព ការធ្វើលំហាត់ប្រាណជាទៀងទាត់ និងជៀសវាងការជក់បារី ឬថ្នាំជក់ដទៃទៀត អាចបង្ការគ្រោះថ្នាក់សរសៃខួរក្បាល ជំងឺបេះដូងមុនវ័យ និងជំងឺទឹកនោមផ្អែម៕

អត្ថបទផ្ដល់សិទ្ធិ៖ Hello គ្រូពេទ្យ

ចុអាន៖ ការសិក្សា៖ ប្រុសៗតាំងខ្លួនរឹងមាំពេក ប្រឈមការធ្វើអត្តឃាតខ្ពស់

ចុចអាន៖ ដុកទ័រពន្យល់ច្បាស់ៗ ពី AVF សំឡេងរោទ៍នៅក្នុងត្រចៀក និងជាជំងឺខួរក្បាល គួរតាមដាន

The post ជំងឺរ៉ាំរ៉ៃសាហាវបំផុត ៤ មានចំណែកលើសពាក់កណ្ដាលអត្រាមរណៈនៅអាស៊ី appeared first on Kampuchea Thmey Daily.

ពេទ្យ ព្រមានថា ផឹកតែគជ់ អាចកើតជំងឺរ៉ាំរ៉ៃ និងគ្រោះថ្នាក់ធ្ងន់ៗច្រើន

Sonya — Tue, 21 Sep 2021 00:40:00 +0000

នៅស្រុកខ្មែរយើង មានកុមារ និងយុវវ័យជាច្រើន ចូលចិត្តផឹកតែគជ់ ប៉ុន្ដែពុំដឹងពីផលប៉ះពាល់នៃការផឹកភេសជ្ជៈនេះទេ។ ចំណែកនៅសិង្ហបុរីវិញ តែគជ់ ក៏និយមខ្លាំងណាស់ដែរ រហូតខាងមន្ទីរពេទ្យ Mount Alvernia Hospital អះអាងថា ភេសជ្ជៈនេះ អាចបណ្ដាលឲ្យកើតជំងឺរ៉ាំរ៉ៃ ប៉ះពាល់បេះដូង ដាច់សរសៃឈាមខួរក្បាល និងបង្កជាហានិយភ័យជំងឺធ្ងន់ៗមួយចំនួនទៀត។

គ្រោះថ្នាក់តែគជ់ បានព្រមានពលរដ្ឋសិង្ហបុរី ពីតែគជ់ដែលមានបរិមាណស្ករច្រើន។ សម្រាប់ការប្រៀបធៀបតែគជ់ ៧ប្រភេទ មន្ទីរពេទ្យរកឃើញថា តែទឹកដោះគោដែលប្រើស្ករត្នោត ជាមួយគ្រាប់គជ់ (Brown Sugar Milk Tea With Pearls) ជាភេសជ្ជៈបង្កហានិភ័យដល់សុខភាពជាងគេ។ វាមានផ្ទុកស្ករ ចំនួន ១៨,៥ស្លាបព្រាកាហ្វេ។

មន្ទីរពេទ្យ ព្រមានថា ស្ករ ទឹកដោះគោ និងក្រែមគ្មានសមាសធាតុទឹកដោះគោ (Non-dairy Creamer) ពិតជាអាចបង្កើនហានិភ័យនៃការកើតជំងឺរ៉ាំរ៉ៃ។ ក្នុងនោះ ក្រែមគ្មានសមាសធាតុទឹកដោះគោ មានផ្ទុកខ្លាញ់ Trans Fat ក្នុងទម្រង់ជាប្រេងដូង Hydrogenated Palm Oil។ ឯពពុះទឹកដោះគោ ក៏មានកាឡូរីខ្ពស់ដែរ គឺរហូតដល់ ២០៣កាឡូរី និងពពុះ Cheese មាន ១៨០កាឡូរី។ មន្ទីរពេទ្យបញ្ជាក់ថា ប្រេងនេះ បង្កឲ្យកើតជំងឺបេះដូង និងដាច់សរសៃឈាមខួរក្បាល។

ដើម្បីបង្ការការកើតជំងឺរ៉ាំរ៉ៃ មន្ទីរពេទ្យណែនាំឲ្យកាត់បន្ថយការផឹកភេសជ្ជៈផ្អែម ដោយអតិថិជនត្រូវជ្រើសរើសហាង ដែលអាចកែប្រែកម្រិតជាតិស្ករក្នុងភេសជ្ជៈ និងកាត់បន្ថយរសជាតិផ្អែមបន្ដិចម្ដងៗ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ តែគជ់មួយកែវ ២៤ ដុល្លារអាមេរិក លក់នៅឯណា?

ចុចអាន៖ ផឹកកាហ្វេពេលព្រឹកទាំងពោះទទេ ប៉ះពាល់សុខភាពម៉េចខ្លះ?

The post ពេទ្យ ព្រមានថា ផឹកតែគជ់ អាចកើតជំងឺរ៉ាំរ៉ៃ និងគ្រោះថ្នាក់ធ្ងន់ៗច្រើន appeared first on Kampuchea Thmey Daily.

កុំប្រហែសខ្លួនឲ្យសោះ! អ្នកមានជំងឺរ៉ាំរ៉ៃទាំងនេះ បើឆ្លងវីរុសបំប្លែងខ្លួន គឺហានិភ័យហើយ

សាង ស្រីល័ក្ខ — Tue, 27 Jul 2021 08:59:08 +0000

មជ្ឈមណ្ឌលព័ត៌មានរបស់ថៃ បានបង្ហាញទិន្នន័យពីក្រុមអ្នកជំងឺ ៧ ប្រភេទ ងាយឆ្លងនិងប្រឈមហានិភ័យនៃការស្លាប់ ពីវីរុសបំប្លែងខ្លួនគ្រប់ប្រភេទ ដែលកំពុងតែមានវត្តមានលើពិភពលោក។

ក្រុមអ្នកជំងឺទាំងនោះមានដូចជា៖ ជំងឺ លើសឈាម ៧៣ ភាគរយ, ទឹកនោមផ្អែម ៥៥ ភាគរយ, សម្ពាធឈាមខ្ពស់ ៣០ ភាគរយ, តម្រងនោមរ៉ាំរ៉ៃ ១៧ ភាគរយ, បេះដូង ១៣ ភាគរយ, ភាពធាត់ ៨ ភាគរយ និងជំងឺសួត ៨ ភាគរយ ។

អ្នកមានជំងឺប្រចាំកាយ ដែលមានឱកាសឆ្លងលឿន និងងាយប្រឈមហានិភ័យ គួរធ្វើយ៉ាងម៉េចដើម្បីទប់ស្កាត់ឬការពារខ្លួនពីជំងឺកាចសាហាវនេះ។

ចំពោះអ្នកជំងឺមហារីក ដែលកំពុងទទួលការព្យាបាល ឬព្យាបាលដោយប្រើគីមី គួរតែបន្តជួបគ្រូពេទ្យ ( តាមការណែនាំ ) ដើម្បីទទួលការព្យាបាលប្រកបដោយប្រសិទ្ធភាព និងជំងឺរ៉ាំរ៉ៃផ្សេងៗទៀតដូចជា ទឹកនោមផ្អែម ធាត់ បេះដូង ថ្លើម តម្រងនោម ជាដើម។

លើសពីនេះ ត្រូវថែរក្សាខ្លួនអ្នកដោយការញ៉ាំអាហារ ដែលមានសុខភាពល្អ ហាត់ប្រាណឲ្យបានត្រឹមត្រូវ និងសម្រាកគ្រប់គ្រាន់។

ពាក់ម៉ាសបិទមុខ រាល់ពេលចេញក្រៅ ឧស្សាហ៍លាងសំអាតដៃ មុនពេលហូបអាហារ ឬចាប់កាន់របស់ផ្សេងៗ។

ហាមទៅជិតក្រុមមនុស្សមានហានិភ័យ ដើរហើរច្រើន បើចៀសមិនបាន គួរពិភាក្សាគ្នាដោយរក្សាគំលាតរៀងៗខ្លួន។

ត្រូវរក្សាផ្លូវចិត្តឲ្យរឹងមាំ និងសម្រាកខួរក្បាលពីស្រ្តេសតប់ប្រមល់ ជាពិសេសត្រូវធ្វើសកម្មភាពដែលអ្នកចូលចិត្ត ដូចជា មើលខ្សែភាពយន្ត ស្ដាប់តន្ត្រី ចម្អិនម្ហូបប៉ូវសុខភាព និងចំណូលចិត្តផ្សេងៗទៀត។ ល៕

ប្រែសម្រួល៖ សាង ស្រីល័ក្ខ

ប្រភព៖sanook

ចុចអាន៖វីរុសបំប្លែង Delta វាយលុកសុខភាពក្រុមមនុស្សទាំងនេះខ្លាំងជាងគេ

ចុចអាន៖ម្នាក់ក្នុងចំណោម ៣នាក់ ឆ្លងកូវីដដោយមិនដឹងខ្លួន និងគ្មានរោគសញ្ញាអ្វីទាំងអស់

The post កុំប្រហែសខ្លួនឲ្យសោះ! អ្នកមានជំងឺរ៉ាំរ៉ៃទាំងនេះ បើឆ្លងវីរុសបំប្លែងខ្លួន គឺហានិភ័យហើយ appeared first on Kampuchea Thmey Daily.

អ្នកមានជំងឺប្រចាំកាយទាំងនេះ ត្រូវថែខ្លួនឲ្យបានល្អ តែភ្លាត់ឆ្លងកូវីដ ពិបាកសង្រ្គោះណាស់

Sonya — Thu, 20 May 2021 00:48:03 +0000

ជំងឺកូវីដ-១៩ ជាជំងឺផ្លូវដង្ហើមសាហាវមួយដែលកំពុងរាតត្បាតនៅក្នុងប្រទេសយើងមិនស្រាកស្រាន ហើយគ្នាយើងច្បាស់ជាដឹងពីសមត្ថភាពឆ្លងពីជំងឺនេះថា វាពិតជាឆ្លងបានលឿន និងឆ្លងមនុស្សមិនរើសវ័យទៀត។ យោងតាមការស្រាវជ្រាវមួយចំនួនរបស់មជ្ឈមណ្ឌលប្រឆាំងនឹងជំងឺឆ្លងអាមេរិក (CDC) មនុស្សដែលមានជំងឺប្រចាំកាយមួយចំនួន បើ ឆ្លងកូវីដ-១៩ អាចធ្វើឲ្យសុខភាពធ្លាក់ធ្ងន់ធ្ងរបាន។

ហានិភ័យនៃការវិវត្តិទៅជាធ្ងន់ធ្ងរពេលឆ្លងជំងឺកូវីដ-១៩ អាចនឹងកើនឡើងចំពោះមនុស្សដែលមានវ័យចំណាស់ និងមានបញ្ហាសុខភាព ពិសេសមនុស្សដែលមានជំងឺប្រចាំកាយប៉ុន្មានខាងក្រោមនេះ កាន់តែប្រឈមគ្រោះថ្នាក់ខ្ពស់ បើឆ្លងកូវីដ-១៩ ដូចជា៖

មនុស្សវ័យចំណាស់៖ កម្រិតគ្រោះថ្នាក់នៃជំងឺកូវីដ-១៩ កើនឡើងទៅតាមវ័យ បើវ័យកាន់តែចាស់ ហានិភ័យសុខភាពក្នុងការធ្លាក់ខ្លួនឈឺធ្ងន់ក៏កាន់តែខ្ពស់ ជាពិសេសមនុស្សចាស់មានអាយុ ៨៥ឆ្នាំឡើង។

ជំងឺសួត៖ ជំងឺកូវីដ-១៩ វាយប្រហារទៅលើសួតរបស់អ្នកជំងឺ ហេតុនេះហើយ អ្នកដែលមានបញ្ហាសួតដូចជា ហឺត រលាកសួតរ៉ាំរ៉ៃ ឬជំងឺមហារីកសួត អាចប្រឈមនឹងបញ្ហាធ្ងន់ពេលកើតជំងឺកូវីដ-១៩។
ជំងឺបេះដូង៖ បញ្ហាបេះដូងមួយចំនួនអាចបណ្ដាលឲ្យអ្នកជំងឺធ្លាក់ខ្លួនឈឺធ្ងន់ បើឆ្លងជំងឺកូវីដ-១៩ ពិសេសអ្នកមានជំងឺខ្សោយបេះដូង ។

ជំងឺទឹកនោមផ្អែម និងធាត់៖ ជំងឺទឹកនោមផ្អែមប្រភេទ១ និងប្រភេទ២ អាចធ្វើឲ្យអ្នកជំងឺមានរោគសញ្ញាធ្ងន់ធ្ងរពេលឆ្លងកូវីដ-១៩ ហើយជំងឺធាត់ ឬអ្នកធាត់លើសទម្ងន់ក៏ប្រឈមបញ្ហាធ្ងន់ធ្ងរពេលឆ្លងកូវីដ-១៩ដូចគ្នា។
ជំងឺមហារីក៖ អ្នកជំងឺមហារីកមានហានិភ័យខ្ពស់ក្នុងការវិវត្តទៅជាជំងឺធ្ងន់ធ្ងរ ហើយហានិភ័យនៃគ្រោះថ្នាក់ក៏អាស្រ័យទៅតាមប្រភេទនៃជំងឺមហារីក និងវិធីព្យាបាល។

ប្រព័ន្ធភាពស៊ាំខ្សោយ៖ ប្រព័ន្ធភាពស៊ាំប្រៀបបាននឹងទាហ៊ានចាំការពាររាងកាយពីមេរោគ ឬវីរុសផ្សេងៗ ចូលមកវាយលុកក្នុងខ្លួនយើង។ ប្រសិនបើយើងមានប្រព័ន្ធភាពស៊ាំខ្សោយ ច្បាស់ណាស់ថា សុខភាពយើងប្រឈមនឹងបញ្ហាធ្ងន់ធ្ងរពេលជំងឺកាចសាហាវដូចកូវីដ-១៩។

ក្រៅពីជំងឺប៉ុន្មានខាងលើនេះ ជំងឺកូវីដ-១៩ក៏វាយលុកលើសុខភាពធ្ងន់ធ្ងរដែរ ចំពោះអ្នកជំងឺតម្រងនោម ជំងឺ Down Syndrome ជំងឺលើសសម្ពាធ ជំងឺThalassemia ជំងឺថ្លើម ជំងឺក្រិនសរសៃឈាម និងស្រ្តីពពោះ។

ស្របគ្នានេះ CDC អាមេរិក បានឲ្យដឹងថា អ្នកជក់បារីងាយវិវត្តទៅរកជំងឺមហារីកសួត ជំងឺបេះដូង និងជំងឺដាច់សរសៃឈាមខួរក្បាល។ ហើយនៅក្នុងស្ថានភាពដែលមានជំងឺឆ្លងជាសកលប៉ះពាល់ប្រព័ន្ធផ្លូវដង្ហើមដូចវីរុសកូវីដ-១៩ ទៀតនោះ ធ្វើឲ្យជក់បារីកាន់តែប្រឈមខ្ពស់ក្នុងការឆ្លងវីរុសនេះ ប៉ះពាល់ទៅដល់សួតខ្លាំងជាងអ្នកធម្មតា៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ អ្នកឆ្លងកូវីដ កុំបាក់ទឹកចិត្ត! ពង្រឹងស្មារតីឱ្យមាំ អនុវត្តប៉ុន្មានចំណុចនេះ ទើបឆាប់ជាសះស្បើយ

ចុចអាន៖ អ្នកជំនាញប្រាប់ពីរបបអាហារសម្រាប់អ្នកជំងឺកូវីដកម្រិតស្រាល គួរទទួលទានឲ្យឆាប់ជាសះស្បើយរហ័ស

The post អ្នកមានជំងឺប្រចាំកាយទាំងនេះ ត្រូវថែខ្លួនឲ្យបានល្អ តែភ្លាត់ឆ្លងកូវីដ ពិបាកសង្រ្គោះណាស់ appeared first on Kampuchea Thmey Daily.

វ៉ាក់សាំងកូវីដ-១៩ មានសុវត្ថិភាពចំពោះអ្នកជំងឺប្រចាំកាយដែរទេ?

Sonya — Tue, 04 May 2021 03:26:58 +0000

តើការចាក់វ៉ាក់សាំងកូវីដ-១៩ ធ្វើឱ្យខ្ញុំមានសុវត្ថិភាពដែរទេ ប្រសិនបើខ្ញុំមានជំងឺប្រចាំកាយ? នេះជាសំណួរដែលអ្នកមានជំងឺរ៉ាំរ៉ៃចង់ដឹងណាស់!

តាំងពីមានវ៉ាក់សាំង ពលរដ្ឋមួយចំនួនធំមានចម្ងល់ច្រើនពាក់ព័ន្ធប្រសិទ្ធភាពនិងគ្រោះថ្នាក់របស់វ៉ាក់សាំងកូវីដ-១៩ ចំពោះបុគ្គលមានជំងឺប្រចាំកាយមួយចំនួនដែលក្នុងនោះរួមមាន អ្នកជំងឺថ្លើម ជំងឺលើសឈាម ជំងឺទឹកនោមផ្អែម ជំងឺធាត់។ល។

ទាក់ទិនចម្ងល់នេះ UNICEF កម្ពុជា បានបកស្រាយថា ការចាក់វ៉ាក់សាំងកូវីដ-១៩ មានសារៈសំខាន់ណាស់ ជាពិសេសសម្រាប់អ្នកដែលមានជំងឺប្រចាំកាយ ដែលធ្វើឱ្យពួកគេកាន់តែប្រឈមនឹងការធ្លាក់ខ្លួនឈឺ ដោយសារជំងឺកូវីដ-១៩តិចបំផុត។ នេះមានន័យថា វ៉ាក់សាំងការពារកូវីដ មានប្រសិទ្ធភាពចំពោះបុគ្គលទូទៅ និងអ្នកមានជំងឺប្រចាំកាយដូចគ្នា។

ទោះជាយ៉ាងនេះក្ដី UNICEF កម្ពុជា ណែនាំឱ្យអ្នកមានជំងឺប្រចាំកាយ ពិគ្រោះយោបល់ជាមួយនឹងអ្នកផ្ដល់សេវាសុខាភិបាល ដើម្បីពិភាក្សាថាតើវ៉ាក់សាំងកូវីដ-១៩ សមស្របសម្រាប់ខ្លួនដែរឬទេ។

នៅក្នុងករណីដែលកម្រកើតមាន អាចមានអាឡ័កស៊ីកើតឡើង ក្រោយចាក់វ៉ាក់សាំងរួច។ ក្នុងចំណោមការចាក់វ៉ាក់សាំងមួយលានដូស ប្រតិកម្មអាឡ័កស៊ីដែលបង្កការគំរាមកំហែងធ្ងន់ធ្ងរដល់អាយុជីវិត ត្រូវបានសង្កេតឃើញថា បានកើតតែប្រហែលមួយករណីប៉ុណ្ណោះ។

ដូច្នេះ ប្រសិនបើកន្លងមក អ្នកមានប្រតិកម្មជាអាឡ័កស៊ីជាមួយនឹងវ៉ាក់សាំង ថ្នាំ ផលិតផលវេជ្ជសាស្ត្រ ឬអាហារ សូមពិភាក្សាបញ្ហាទាំងនេះជាមួយនឹងអ្នកផ្ដល់សេវាថែទាំសុខភាព មុនពេលចាក់វ៉ាក់សាំង៕

អត្ថបទ៖ សន្យា

ប្រភព៖ UNICEF

ចុចអាន៖ សារៈសំខាន់នៃកាតចាក់វ៉ាក់សាំងកូវីដ-១៩ យើងអាចមិនទាន់ដឹង

ចុចអាន៖ វ៉ាក់សាំងជាក្តីសង្ឃឹម! មានមនុស្ស ១ភាគរយគត់ ដែលត្រូវបញ្ជូនទៅព្យាបាលកូវីដនៅមន្ទីរពេទ្យ ទោះចាក់បានត្រឹម១ដូស

The post វ៉ាក់សាំងកូវីដ-១៩ មានសុវត្ថិភាពចំពោះអ្នកជំងឺប្រចាំកាយដែរទេ? appeared first on Kampuchea Thmey Daily.

ប្រសើរណាស់! វ៉ាក់សាំង Pfizer មានប្រសិទ្ធភាពមិនធម្មតាការពារអ្នកដែលមានជំងឺរ៉ាំរ៉ៃទាំងនេះ មិនឲ្យឆ្លងកូវីដ

Sok Chivon — Fri, 23 Apr 2021 02:51:49 +0000

ការសិក្សាដ៏ធំបំផុតមួយបានបង្ហាញកាលពីថ្ងៃព្រហស្បតិ៍ថា វ៉ាក់សាំងការពារកូវីដ ដែលត្រូវបានបង្កើតឡើងដោយក្រុមហ៊ុន Pfizer-BioNTech មានប្រសិទ្ធភាពការពាររោគសញ្ញាធ្ងន់ធ្ងរចំពោះអ្នកដែលមានជំងឺរ៉ាំរ៉ៃមួយចំនួនដូចជា ជំងឺទឹកនោមផ្អែម និងជំងឺបេះដូង ជាដើម ។

ការវិភាគលើប្រជាជនជិត ១.២ លាននាក់ ដោយអ្នកផ្តល់សេវាថែទាំសុខភាពធំបំផុតរបស់អ៊ីស្រាអែលមួយនេះ នឹងផ្តល់ក្តីសង្ឃឹមបន្ថែមទៀតដល់បណ្តាប្រទេសនានា នៅពេលពួកគេទទួលបានការចាក់វ៉ាក់សាំងចូលដៃពលរដ្ឋ ជាពិសេសអ្នកដែលត្រូវបានគេចាត់ទុកថាងាយរងគ្រោះ និងទប់ស្កាត់រោគរាតត្បាតដែលរហូតមកដល់ពេលនេះបានសម្លាប់មនុស្សជាង ៣.១ លាននាក់ហើយ ។

បើយោងតាមការសិក្សារបស់វិទ្យាស្ថានស្រាវជ្រាវ Clalit បានឲ្យដឹងថា វ៉ាក់សាំងនេះមានប្រសិទ្ធភាព ៨០ ភាគរយប្រឆាំងនឹងការឆ្លងចំពោះអ្នកដែលមានជំងឺបេះដូង ឬតម្រងនោមរ៉ាំរ៉ៃ, ៨៦ ភាគរយចំពោះអ្នកដែលមានជំងឺទឹកនោមផ្អែមប្រភេទទី ២, ៧៥ ភាគរយសម្រាប់ជំងឺសរសៃឈាមខួរក្បាល និង ៨៤ ភាគរយសម្រាប់អ្នកដែលទទួលរងពីភាពស៊ាំចុះខ្សោយ ក្រោយការចាក់ពេញ ២ ដូស ។

ចំណែកចំពោះអ្នកដែលត្រូវបានចាក់វ៉ាក់សាំង ហើយបានទទួលរងនូវបញ្ហារ៉ាំរ៉ៃ ឬកត្តាហានិភ័យចំនួនបី ឬច្រើនជាងនេះ ដូចជា ជំងឺបេះដូង ជំងឺសរសៃប្រសាទ ជំងឺតម្រងនោមរ៉ាំរ៉ៃ ជំងឺសួតរ៉ាំរ៉ៃ ការជក់បារី ការមានផ្ទៃពោះ ឬការធាត់ ការស្រាវជ្រាវបានបង្ហាញថា វាមានប្រសិទ្ធភាព ៨៨ ភាគរយក្នុងការការពារការឆ្លង ។

ទន្ទឹមនោះវាមានប្រសិទ្ធភាពជាង ៩០ ភាគរយប្រឆាំងនឹងរោគសញ្ញាធ្ងន់ធ្ងរ ចំពោះអ្នកដែលមានជំងឺទឹកនោមផ្អែមប្រភេទទី ២ ជំងឺបេះដូង ឬសសៃឈាម និង ១០០ ភាគរយសម្រាប់អ្នកដែលទទួលរងពីភាពស៊ាំចុះខ្សោយ ។

ការសិក្សារបស់ Clalit បានប្រៀបធៀបមនុស្សចំនួន ៥៩៦,៦១៨ នាក់ដែលបានចាក់វ៉ាក់សាំងនៅចន្លោះថ្ងៃទី ២០ ខែធ្នូ ឆ្នាំ ២០២០ និងថ្ងៃទី ១៤ ខែកុម្ភៈ ខណៈក្នុងនោះមានក្រុមមនុស្សដែលមានជំងឺរ៉ាំរ៉ៃប្រហែល ១៣០,០០០ នាក់ ។

ច្រើនជាងពាក់កណ្ដាលនៃប្រជាជនអ៊ីស្រាអែលចំនួន ៩.៣ លាននាក់ បានទទួលការចាក់វ៉ាក់សាំងពេញ ២ ដូស ចាប់តាំងពីការចាក់វ៉ាក់សាំងនេះបានចាប់ផ្តើមនៅចុងខែធ្នូ ហើយករណីឆ្លងនៅប្រទេសអ៊ីស្រាលអែល បានធ្លាក់ចុះជាបន្តបន្ទាប់គួរឲ្យកត់សម្គាល់ ចាប់តាំងពីពាក់កណ្ដាលខែមករា ខណៈប្រទេសនេះក៏បានបើកសេដ្ឋកិច្ចឡើងវិញផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ក្រោយអ្នកចាក់វ៉ាក់សាំង Pfizer និង Moderna មានប្រតិកម្មអាឡ័កស៊ីធ្ងន់ធ្ងរ អ្នកជំនាញចាប់ផ្ដើមរកមូលហេតុ

ចុចអាន ៖ វ៉ាក់សាំង Pfizer-BioNTech បង្ហាញប្រសិទ្ធភាពការពារកូវីដរយៈពេល ៦ ខែ ក្រោយចាក់ពេញ ២ ដូស

The post ប្រសើរណាស់! វ៉ាក់សាំង Pfizer មានប្រសិទ្ធភាពមិនធម្មតាការពារអ្នកដែលមានជំងឺរ៉ាំរ៉ៃទាំងនេះ មិនឲ្យឆ្លងកូវីដ appeared first on Kampuchea Thmey Daily.

ជំងឺរ៉ាំរ៉ៃ Archives - Kampuchea Thmey Daily

បរិស្ថានមិនល្អ អាចបង្កជាជំងឺរ៉ាំរ៉ៃច្រើនប្រភេទ

ជំងឺ​រ៉ាំរ៉ៃសាហាវបំផុត ៤ មានចំណែក​លើស​ពាក់កណ្ដាល​អត្រាមរណៈ​​​​នៅអាស៊ី

តើ​យើង​គួរ​ធ្វើ​យ៉ាង​ម៉េច?

កង្វល់​លើ​បញ្ហាសុខភាពសំខាន់ៗ​របស់​ប្រជាជន​អាស៊ី​អាគ្នេយ៍​

កង្វល់​សុខភាព​ចម្បង​​​របស់​​​ប្រជាជន​អាស៊ី​​​​ចំពោះ​ប្ដី​​ ឬ​ប្រពន្ធ

កង្វល់​សុខភាព​ចម្បង​​​របស់​​​ប្រជាជន​អាស៊ី​​​​ចំពោះ​ឪពុក​ម្ដាយ​

កត្តា​ហានិភ័យ​នៃ​ជំងឺ​រ៉ាំរ៉ៃ

ជំងឺ​បេះដូង​

ជំងឺ​ទឹក​នោម​ផ្អែម​

ជំងឺ​មហារីក​

​គ្រោះថ្នាក់​សរសៃ​ឈាម​ខួរ​ក្បាល​

ចំណុច​​សំខាន់​ៗ​

ពេទ្យ ព្រមានថា ផឹកតែគជ់ អាចកើតជំងឺរ៉ាំរ៉ៃ និងគ្រោះថ្នាក់ធ្ងន់ៗច្រើន

កុំប្រហែសខ្លួនឲ្យសោះ! អ្នកមានជំងឺរ៉ាំរ៉ៃទាំងនេះ បើឆ្លងវីរុសបំប្លែងខ្លួន គឺហានិភ័យហើយ

អ្នកមានជំងឺប្រចាំកាយទាំងនេះ ត្រូវថែខ្លួនឲ្យបានល្អ តែភ្លាត់ឆ្លងកូវីដ ពិបាកសង្រ្គោះណាស់

វ៉ាក់សាំងកូវីដ-១៩ មានសុវត្ថិភាពចំពោះអ្នក​​ជំងឺប្រចាំកាយដែរទេ?

ប្រសើរណាស់! វ៉ាក់សាំង Pfizer មានប្រសិទ្ធភាពមិនធម្មតាការពារអ្នកដែលមានជំងឺរ៉ាំរ៉ៃទាំងនេះ មិនឲ្យឆ្លងកូវីដ

ជំងឺរ៉ាំរ៉ៃសាហាវបំផុត ៤ មានចំណែកលើសពាក់កណ្ដាលអត្រាមរណៈនៅអាស៊ី

តើយើងគួរធ្វើយ៉ាងម៉េច?

កង្វល់លើបញ្ហាសុខភាពសំខាន់ៗរបស់ប្រជាជនអាស៊ីអាគ្នេយ៍

កង្វល់សុខភាពចម្បងរបស់ប្រជាជនអាស៊ីចំពោះប្ដី ឬប្រពន្ធ

កង្វល់សុខភាពចម្បងរបស់ប្រជាជនអាស៊ីចំពោះឪពុកម្ដាយ

កត្តាហានិភ័យនៃជំងឺរ៉ាំរ៉ៃ

ជំងឺបេះដូង

ជំងឺទឹកនោមផ្អែម

ជំងឺមហារីក

គ្រោះថ្នាក់សរសៃឈាមខួរក្បាល

ចំណុចសំខាន់ៗ

វ៉ាក់សាំងកូវីដ-១៩ មានសុវត្ថិភាពចំពោះអ្នកជំងឺប្រចាំកាយដែរទេ?