ប្រទេស ដាណឺម៉ាក Archives - Kampuchea Thmey Daily

ថ្ងៃឆ្លងឆ្នាំ ព្រះមហាក្សត្រីយានីពូកែហ្វេហ្ស៊ិន Margrethe II ប្រកាសដាក់រាជ្យដ៏ភ្ញាក់ផ្អើល

chean virakbot — Mon, 01 Jan 2024 02:41:57 +0000

ព្រះមហាក្សត្រីយានី Queen Margrethe II ប្រទេសដាណឺម៉ាកដែលល្បីល្បាញហ្វេហ្ស៊ិនពេញនិយមបានបង្កើតការភ្ញាក់ផ្អើលក្នុងព្រះរាជពិធីអបអរសាទរឆ្នាំចាស់ផ្លាស់ចូលឆ្នាំ២០២៤ដោយបានប្រកាសពីការដាក់រាជ្យសម្បត្តិ បន្ទាប់ពីគ្រងរាជ្យអស់រយៈពេល៥២ឆ្នាំ។

ស្ថិតក្នុងព្រះជន្ម៨២វស្សា ព្រះមហាក្សត្រីយានី Margrethe II ដែលបានគ្រងរាជ្យសម្បត្តិតាំងពីឆ្នាំ១៩៧២បានប្រកាសដ៏ភ្ញាក់ផ្អើលមួយក្នុងព្រះរាជសុន្ទរកថាជាប្រពៃណីប្រចាំឆ្នាំដែលផ្សាយផ្ទាល់លើកញ្ចក់ទូរទស្សន៍ដើម្បីអបអរសាទរឆ្នាំចាស់២០២៣ឈានចូលឆ្នាំថ្មី២០២៤ទៅកាន់ប្រជារាស្ត្រប្រមាណជិត៦លាននាក់។

ដោយយោងទៅលើការវះកាត់ខ្នងជោគជ័យកាលពីខែកុម្ភៈ ព្រះមហាក្សត្រីយានីមានបន្ទូលថា ៖«ការវះកាត់បែបធម្មជាតិជោគជ័យបានឲ្យគិតដល់អនាគតថាតើដល់ពេលត្រូវចាកចេញពីការទទួលខុសត្រូវ ដើម្បីទុកឲ្យអ្នកជំនាន់ក្រោយ»។

ព្រះមហាក្សត្រីយានី Margrethe II មានបន្ទូលថា ៖«ឥឡូវនេះ ខ្ញុំបានសម្រេចចិត្តហើយ។ នៅថ្ងៃទី១៤ ខែមករា ឆ្នាំ២០២៤ បន្ទាប់ពី៥២ឆ្នាំដែលខ្ញុំបានស្នងរាជ្យសម្បត្តិបន្តពីព្រះបិតាជាទីស្រឡាញ់ ខ្ញុំនឹងដាក់រាជ្យ។ ខ្ញុំនឹងផ្ទេររាជ្យសម្បត្តិទៅបុត្រាព្រះនាម Crown Prince Frederik»។

ព្រះមហាក្សត្រីយានី Margrethe II បានក្លាយជាស្តេចដែលគ្រងរាជ្យសម្បត្តិយូរជាងគេបំផុតនៅអឺរ៉ុប បន្ទាប់ពីការសោយទីវង្គត់របស់ព្រះមហាក្សត្រីយានី Elizabeth II របស់ចក្រភពអង់គ្លេសកាលពីខែកញ្ញា ឆ្នាំ២០២២។ នៅក្នុងខែកក្កដា ព្រះមហាក្សត្រីយានីបានក្លាយជាស្តេចគ្រងរាជ្យសម្បត្តិយូរជាងគេបំផុតក្នុងប្រវត្តិសាស្ត្ររបស់ប្រទេសដាណឺម៉ាក។

ប្រទេសដាណឺម៉ាក អំណាចផ្លូវការស្ថិតនៅក្នុងសភាជាប់ឆ្នោត និងរាជរដ្ឋាភិបាល។ ព្រះមហាក្សត្រគង់ជាប្រមុខរដ្ឋដោយមានព្រះរាជកាតព្វកិច្ចតំណាងជាតិ និងពិធីផ្លូវការរដ្ឋនានា។

លោកស្រីនាយករដ្ឋមន្ត្រីដាណឺម៉ាក Mette Frederiksen បានថ្លែងព្រះរាជអំណរព្រះគុណចំពោះព្រះមហាក្សត្រីយានីដែលបានលះបង់កម្លាំយកាយចិត្ត និងប្រាជ្ញាស្មារតីដើម្បីបំពេញព្រះរាជតួនាទីដ៏យូរអង្វែង។

ប្រសូតឆ្នាំ១៩៤០ដោយមានព្រះបិតាព្រះនាម Frederik IX និងព្រះមាតា Ingrid ព្រះមហាក្សត្រីយានី Margrethe ពេញមួយជីវិតរបស់ព្រះអង្គបានទទួលការស្រឡាញ់គាំទ្រយ៉ាងទូលំទូលាយពីប្រជារាស្ត្រតាមលក្ខណៈប្រកបដោយភាពប៉ិនប្រសប់ និងភាពច្នៃប្រឌិតរបស់ព្រះអង្គ។

ព្រះអង្គបានស្នងរាជ្យសម្បត្តិពីព្រះបិតានៅឆ្នាំ១៩៥៣ក្នុងព្រះជន្ម៣១វស្សា បន្ទាប់ពីការធ្វើវិសោធនកម្មរដ្ឋធម្មនុញ្ញបានអនុញ្ញាតឱ្យស្ត្រីឡើងគ្រងរាជ្យ។

នៅឆ្នាំ១៩៦៧ ព្រះអង្គបានរៀបអភិសេកជាមួយលោក Henri de Laborde de Monpezat ដែលជាមន្ត្រីទូតរបស់ប្រទេសបារាំងដែលបានទទួលមរណភាពឆ្នាំ២០១៨។ ព្រះមហាក្សត្រីយានី និងស្វាមីមានបុត្រា២អង្គគឺព្រះអង្គម្ចាស់ Crown Prince Frederik បុត្រច្បងដែលនឹងក្លាយជាស្តេច Frederik X និងព្រះអង្គម្ចាស់ Joachim។ អនាគតព្រះមហាក្សត្រ Frederik បានរៀបអភិសេកជាមួយព្រះនាង Mary Elizabeth Donaldson ជាជនជាតិអូស្ត្រាលីកាលពីឆ្នាំ២០០៤៕

ប្រែសម្រួល៖ វីរបុត្រ
ប្រភព៖ Reuters

The post ថ្ងៃឆ្លងឆ្នាំ ព្រះមហាក្សត្រីយានីពូកែហ្វេហ្ស៊ិន Margrethe II ប្រកាសដាក់រាជ្យដ៏ភ្ញាក់ផ្អើល appeared first on Kampuchea Thmey Daily.

វិចិត្រករដាណឺម៉ាកត្រូវសងប្រាក់សារមន្ទីរវិញ ព្រោះលក់គំនូរទទេស្អាត ក្រោមចំណងជើងដ៏ហួសចិត្ត

Boa Sokunveary — Tue, 19 Sep 2023 09:52:52 +0000

វិចិត្រករជនជាតិដាណឺម៉ាកម្នាក់ត្រូវសងប្រាក់ឲ្យសារមន្ទីរវិញ ព្រោះគាត់បានលក់ផ្ទាំងគំនូរទទេស្អាតមួយ ដែលមានចំណងជើងថា “យកលុយហើយរត់ (Take the Money and Run)” ។

លោក Jens Haaning បានឲ្យដឹងថា ស្នាដៃរបស់ខ្លួនគឺការយកប្រាក់របស់សារមន្ទីរ Kunsten នៅ Aalborg ហើយរត់នោះឯង ។

ជាលទ្ធផល តុលាការបានបង្គាប់ឱ្យគាត់ប្រគល់សាច់ប្រាក់មកវិញ ប៉ុន្តែរក្សាទុកខ្លះសម្រាប់ការចំណាយផ្សេងៗ ។

ដំបូងឡើយខាងសារមន្ទីរបានស្នើសុំឲ្យលោក Jens ប្រគល់ប្រាក់វិញសរុប ៧៦ ៥៣៩ ដុល្លារ ប៉ុន្តែពួកគេទាមទារបានត្រឹមតែ ៤៥ ៧១៧ ដុល្លារប៉ុណ្ណោះ ។

រឿងរ៉ាវបានកើតឡើងនៅឆ្នាំ ២០២១ គ្រានោះលោក Lasse Andersson នាយកសារមន្ទីរ អស់សំណើចយ៉ាងខ្លាំង ។ ទោះជាយ៉ាងណាក៏ដោយ ក៏លោកបានដាក់ស្នាដៃនោះតាំងដែរ ៕

ប្រែសម្រួល៖ វារី

ប្រភព៖ BBC

ចុចអាន៖ ស្នាដៃចុងក្រោយលោក Gustav Klimt ក្លាយជាគំនូរថ្លៃបំផុតនៅអឺរ៉ុប

The post វិចិត្រករដាណឺម៉ាកត្រូវសងប្រាក់សារមន្ទីរវិញ ព្រោះលក់គំនូរទទេស្អាត ក្រោមចំណងជើងដ៏ហួសចិត្ត appeared first on Kampuchea Thmey Daily.

បាញ់ប្រហារនៅផ្សារទំនើបដាណឺម៉ាក ស្លាប់មនុស្ស៣នាក់ ប៉ូលិស ថាជា អំពើភេរវកម្ម (មានវីដេអូ)

Sok Sovann — Mon, 04 Jul 2022 00:14:58 +0000

ប៉ូលិសដាណឺម៉ាកនិយាយថា មនុស្សចំនួន៣នាក់ត្រូវបានសម្លាប់ និង៣នាក់រងរបួសធ្ងន់ ក្នុងការបាញ់ប្រហារនៅផ្សារទំនើបមួយ នៅរដ្ឋធានី កូប៉ិនហាក ប្រទេសដាណឺម៉ាក។

អធិការប៉ូលិស Soren Thomassen បាននិយាយកាលពីថ្ងៃអាទិត្យទី០៣ខែកក្កដាថា ខ្មាន់កាំភ្លើងដែលជាប់ឃុំគឺជាបុរសជនជាតិដាណឺម៉ាកអាយុ ២២ ឆ្នាំដែលត្រូវបានឃាត់ខ្លួននៅជិតផ្សារទំនើប Fields។

លោក Thomassen បានប្រាប់សន្និសីទសារព័ត៌មានមួយថា “យើងគិតថា ការបាញ់ប្រហារនេះ គឺជាអំពើភេរវកម្ម។ ប៉ូលិសបានបើកប្រតិបត្តិការស្វែងរកដ៏ធំ នៅទូទាំងតំបន់ Zealand ដើម្បីកំណត់ថាតើមានជនសង្ស័យមានសមគំនិតផ្សេងទៀតឬក៏យ៉ាងណា។ យើងមិនមានព័ត៌មានថា អ្នកដទៃពាក់ព័ន្ធទេ។ នេះជាអ្វីដែលយើងដឹងឥឡូវនេះ”។

ប៉ូលិស ត្រូវបានគេជូនដំណឹងជាលើកដំបូងអំពីការបាញ់ប្រហារនៅម៉ោង ៥:៣៦ នាទីល្ងាច។

ប្រព័ន្ធផ្សព្វផ្សាយក្នុងស្រុក បានបញ្ចេញរូបភាពដែលបង្ហាញពីមន្ត្រីប៉ូលិសប្រដាប់ដោយអាវុធយ៉ាងច្រើននៅកន្លែងកើតហេតុ ក៏ដូចជាមនុស្សដែលកំពុងរត់ចេញពីហាងលក់ទំនិញ។

សាក្សីនិយាយថា ពួកគេបានឃើញមនុស្សជាង ១០០ នាក់ប្រញាប់ប្រញាល់រត់ទៅច្រកចេញរបស់ផ្សារទំនើប នៅពេលស្នូរគ្រាប់កាំភ្លើងដំបូងត្រូវបានឮ។

គួរបញ្ជាក់ថា ហេតុការណ៍នេះកើតឡើងត្រឹមតែជាងមួយសប្តាហ៍ប៉ុណ្ណោះ បន្ទាប់ពីខ្មាន់កាំភ្លើងម្នាក់ បើកការបាញ់ប្រហារនៅខាងក្រៅ បារ៍ មួយក្នុងទីក្រុង អូស្លូ ប្រទេសន័រវេស ដោយបានសម្លាប់មនុស្សពីរនាក់ និងរបួស ២១ នាក់ផ្សេងទៀត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ បាញ់ប្រហារ ៣លើក ស្លាប់និងរបួសមនុស្សជាង ៣០នាក់ នៅ សហរដ្ឋអាមេរិក

The post បាញ់ប្រហារនៅផ្សារទំនើបដាណឺម៉ាក ស្លាប់មនុស្ស៣នាក់ ប៉ូលិស ថាជា អំពើភេរវកម្ម (មានវីដេអូ) appeared first on Kampuchea Thmey Daily.

ប្លែកៗ ប្រពៃណីនៅ ដាណឺម៉ាក អ្នកនៅលីវត្រូវពិន័យ ដោយបាចឈើអែម និងម្រេចលើខ្លួន

សាង ស្រីល័ក្ខ — Fri, 06 May 2022 07:35:51 +0000

បន្ទាប់ពីទិវានៃក្ដីស្រលាញ់កន្លងផុតទៅច្រើនខែ ប្រពៃណីពិន័យអ្នកនៅលីវ នៅប្រទេសដាណឺម៉ាក ក៏បានចូលមកដល់ដែរ។ ប្រពៃណីនេះអាចថាប្លែកជាងគេ សម្រាប់មនុស្សនៅលីវ ដែលមានអាយុ ២៥ឆ្នាំ នឹងត្រូវមិត្តភ័ក្ដិ ឬគ្រួសារយកឈើអែម (cinnamon) មកបាចពាសពេញខ្លួន ថែមទឹកមួយធុងទៀត ដោយខ្លាចមិនជាប់ល្អលើដងខ្លួនរបស់ពួកគេ។

យ៉ាងណាមិញ ទំនៀមទម្លាប់នេះ មានអាយុកាលរាប់រយឆ្នាំមកហើយ តាំងពីពេលមានអ្នកលក់គ្រឿងទេសដើរលក់ចល័តមិនចេះនៅមួយកន្លែង ហើយពួកគេគ្មានស្នេហាត្រឹមត្រូវពិតប្រាកដ និងត្រូវផ្លាស់ប្ដូរទីតាំងរហូតនេះឯង។ អ្នកទាំងនោះត្រូវបានគេហៅថា “បុរសម្រេច” បើស្រីវិញគេហៅថា “នារីម្រេច”។

លុះដល់អ្នកអាយុ ៣០ឆ្នាំហើយ នៅលីវដដែល គេនឹងប្ដូរពីឈើអែមទៅជាម្រេចវិញម្ដង។ សំណាងអាក្រក់របស់អ្នកនឹងមកដល់ពេលពួកគេសម្រេចចិត្តថែមស៊ុត ដើម្បីឲ្យម្រេចកាន់តែស្អិតខ្លាំងនេះ។

ការពិតទៅ ការនៅលីវមិនមែនជាការរើសអើងអីនោះទេ សម្រាប់ប្រទេសដាណឺម៉ាក។ ជាទូទៅប្រជាជននៅទីនោះរៀបការនៅអាយុខ្ទង់សាមឯណោះ។ ប្រពៃណីនេះគ្រាន់តែធ្វើឲ្យបរិយាកាស រវាងអ្នកជុំវិញខ្លួនកាន់តែស្និទ្ធស្នាល និងសប្បាយរីករាយតែប៉ុណ្ណោះ៕

ប្រែសម្រួល៖ វារី

ចុចអាន៖ប្រពៃណីចម្លែក កាត់ប្រដាប់បន្តពូជស្ត្រី ដើម្បីរក្សាព្រហ្មចារី ឲ្យដល់ថ្ងៃរៀបការ

ចុចអាន៖មកស្គាល់ សំលៀកបំពាក់តំណាងជាតិរបស់ប្រទេសនីមួយៗ ល្បីថាស្រស់ស្អាតខ្លាំង

The post ប្លែកៗ ប្រពៃណីនៅ ដាណឺម៉ាក អ្នកនៅលីវត្រូវពិន័យ ដោយបាចឈើអែម និងម្រេចលើខ្លួន appeared first on Kampuchea Thmey Daily.

ប្រទេសមួយ អនុញ្ញាតឱ្យពលរដ្ឋខ្លួនចូលដៃជាមួយយោធា អ៊ុយក្រែន ប្រឆាំង រុស្ស៊ី

Sonya — Mon, 28 Feb 2022 10:40:13 +0000

ទីក្រុង Copenhagen បានបង្ហើបឱ្យដឹងថា ខ្លួននឹងអនុញ្ញាតឱ្យជនជាតិដាណឺម៉ាក ចូលរួមជាមួយកងកម្លាំងយោធាអន្តរជាតិ ទីក្រុងគៀវ ដែលគ្រោងនឹងបង្កើត ដើម្បីជួយដល់យោធាអ៊ុយក្រែន ក្នុងជម្លោះជាមួយរុស្ស៊ី។

នាយករដ្ឋមន្ត្រីលោកស្រី Mette Frederiksen បានប្រាប់សន្និសីទសារព័ត៌មាន កាលពីថ្ងៃអាទិត្យថា “នេះជាជម្រើសដល់អ្នកណាដែលអាចប្រយុទ្ធបាន។ វាមិនមែនចំពោះតែប្រជាជនអ៊ុយក្រែន ដែលរស់នៅដាណឺម៉ាកនោះទេ ប៉ុន្តែចំពោះអ្នកផ្សេងទៀតដែលគិតថាពួកគេអាចរួមចំណែកដោយផ្ទាល់ក្នុងជម្លោះ”។

នាយករដ្ឋមន្ត្រីរូបនេះ បន្តថាការចូលរួមជាមួយយោធាអ៊ុយក្រែន មិនត្រូវបានហាមឃាត់ដោយច្បាប់ឡើយ ខណៈមុនឡើងថ្លែងសន្ទរកថាលោកស្រី Mette Frederiksen បានចូលរួមក្នុងការតវ៉ាដ៏ធំប្រឆាំងនឹងប្រតិបត្តិការរបស់ទីក្រុងមូស្គូនៅមុខស្ថានទូតរុស្ស៊ីនៅទីក្រុង Copenhagen ផងដែរ។

ការអនុញ្ញាត្តមួយនេះ បានកើតឡើងបន្ទាប់ពីប្រធានាធិបតីអ៊ុយក្រែនលោក Volodymyr Zelensky បានប្រកាសអំពីការបង្កើតកងវរសេនាធំការពារទឹកដីអន្តរជាតិរបស់អ៊ុយក្រែន ដែលនឹងអនុញ្ញាត្តឱ្យជនបរទេសអាចចូលរួមក្នុងជួររបស់ខ្លួន និងប្រយុទ្ធជាមួយយោធាអ៊ុយក្រែនប្រឆាំងនឹងកងកម្លាំងរុស្ស៊ី ។

ក្នុងនោះដែរ គេឃើញថា នាយករដ្ឋមន្ត្រីដាណឺម៉ាកមិនមែនជាមនុស្សដំបូងដែលគាំទ្រគំនិតរបស់ប្រធានាធិបតីនោះទេ ព្រោះកាលពីព្រឹកថ្ងៃអាទិត្យ ម្សិលមិញនេះ រដ្ឋមន្ត្រីការបរទេសអង់គ្លេសលោកស្រី Liz Truss ក៏បានគាំទ្រជនជាតិអង់គ្លេស ដែលចង់ចូលរួមសកម្មភាពយោធានៅខាងអ៊ុយក្រែនផងដែរ។

ជាមួយគ្នានេះ រដ្ឋមន្ត្រីការបរទេសអ៊ុយក្រែន លោក Dmitry Kuleba បានប្រកាសឱ្យអ្នកស្ម័គ្រចិត្តទាំងអស់ទាក់ទងទៅបេសកកម្មការទូតរបស់អ៊ុយក្រែន នៅក្នុងប្រទេសរៀងៗខ្លួន៕

ប្រែសម្រួល៖ សន្យា

ប្រភព៖ RT

ចុចអាន៖ មកដឹង ប្រទេសឈរខាង រុស្ស៊ី និង អ៊ុយក្រែន អំឡុងផ្ទុះសង្គ្រាមពេលនេះ

ចុចអាន៖ លោក Zelensky នឹងដោះលែងអ្នកទោស អ៊ុយក្រែន ដែលចង់ប្រយុទ្ធជាមួយ រុស្ស៊ី

The post ប្រទេសមួយ អនុញ្ញាតឱ្យពលរដ្ឋខ្លួនចូលដៃជាមួយយោធា អ៊ុយក្រែន ប្រឆាំង រុស្ស៊ី appeared first on Kampuchea Thmey Daily.

ដាណឺម៉ាកជាប្រទេសអឺរ៉ុបទី១លែងពាក់ម៉ាស់ រស់នៅធម្មតាវិញហើយ

chean virakbot — Wed, 02 Feb 2022 02:11:20 +0000

ប្រទេសដាណឺម៉ាកបាននិយាយលាម៉ាស និងបំរាមនានាកាលពីថ្ងៃអង្គារ៍ម្សិលមិញដើម្បីក្លាយជាប្រទេសអឺរ៉ុបទី១បញ្ចប់បំរាមកូវីដ បើទោះជាចំនួនឆ្លងដោយវីរុសបំប្លែងខ្លួន Omicron នៅរាតត្បាតក៏ដោយ។

បំរាមតិចតួចប៉ុណ្ណោះបន្តមាននៅព្រំដែនដែលសម្រាប់អ្នកអត់ចាក់វ៉ាក់សាំងចូលប្រទេសដាណឺម៉ាកដែលមកពីប្រទេសមិនមែនតំបន់ Schengen។

បន្ទាប់ពីព្យាយាមលើកបំរាមលើកទី១ចន្លោះខែកញ្ញា និងវិច្ឆិកា ជាថ្មីម្តងទៀត ដាណឺម៉ាក បានបន្ធូរបន្ថយ និងកំណត់ម៉ោងបើកក្លឹបកម្សាន្ត និងភោជនីយដ្ឋាន។

នារីឈ្មោះ Natalia Chechetkina អ្នកទទួលភ្ញៀវនៅទីក្រុង Copenhagen បាននិយាយថា ៖«សម្រាប់ខ្ញុំ ផ្នែកដ៏ល្អបំផុតគឺថា យើងលែងពាក់ម៉ាស់ទៀតហើយ។ ឥឡូវនេះ ហោចណាស់មានជម្រើស ប្រសិនបើយើងចង់ការពារខ្លួនឯង យើងពាក់ម៉ាស់ទៅ។ នរណាមិនចង់ ក៏អត់បញ្ហា»។

ការបញ្ចប់បំរាមបានធ្វើឡើងនៅពេលប្រទេសដាណឺម៉ាកមានអ្នកឆ្លងកូវីដ-១៩ថ្មីចន្លោះពី៤ទៅ៥ម៉ឺននាក់ក្នុងមួយថ្ងៃ ឬស្មើនឹង១ភាគរយនៃប្រជាជន៥.៨លាននាក់របស់ប្រទេស។

មន្ត្រីសុខាភិបាលជឿថា ចំនួនឆ្លងនេះនឹងធ្លាក់ចុះជាលំដាប់ឆាប់ៗ។ អ្នកស្រី Tyra Krause នៅវិទ្យាស្ថានសុខភាព និងស្រាវជ្រាវ SSI របស់ដាណឺម៉ាកបាននិយាយថា ៖«មានការបង្ហាញយ៉ាងខ្លាំងដែលការឆ្លងឈានដល់កម្រិតកំពូលនៅក្នុងតំបន់ដែលដឹងច្បាស់បំផុត។ ដូច្នេះវាជាពេលវេលាល្អបំផុតសម្រាប់ការរឹតបន្តឹងត្រូវបានបន្ធូរបន្ថយ»។

រហូតដល់ពេលនេះ ប្រជាជនដាណឺម៉ាកជាង៦០%បានចាក់វ៉ាក់សាំងបង្ការកូវីដ-១៩ដូសទី៣ ដែលបានមួយខែមុននៃកាលវិភាគរបស់អាជ្ញាធរសុខាភិបាល បើប្រៀបធៀបនឹងមធ្យមភាគនៅអឺរ៉ុបស្ថិតក្រោម៤៥%។

អាជ្ញាធរបានប៉ាន់ស្មានថា ប្រជាជនដាណឺម៉ា៨០%ទទួលបានការពារពីជំងឺកូវីដ។ អ្នកឯកទេសជំងឺឆ្លង លោក Lone Simonsen នៅសាកលវិទ្យាល័យ Roskilde បាននិយាយថា ៖«ដោយវីរុសបំប្លែងខ្លួន Omicron មិនឈឺធ្ងន់ធ្ងរសម្រាប់អ្នកចាក់វ៉ាក់សាំង យើងជឿថា វាសមហេតុផលដែលត្រូវលើកបំរាម»។

សម្រាប់ជីវិតរស់នៅប្រក្រតី ប្រទេសដាណឺម៉ាកក៏សង្កត់ធ្ងន់លើការទទួលខុសត្រូវផ្ទាល់ខ្លួន។ លោក Simonsen បាននិយាយថា ៖«ដោយគ្មានប័ណ្ណកូវីដ ដូច្នេះនឹងមានការផ្លាស់ប្តូរការទទួលខុសត្រូវ»។

ដាណឺម៉ាកបានកំពុងជំរុញឲ្យធ្វើតេស្តរកកូវីដនៅតាមផ្ទះ។ អាជ្ញាធរសុខាភិបាលដាណឺម៉ាកថ្មីៗបានចេញសេចក្តីណែនាំឲ្យអ្នកដែលធ្វើតេស្តវិជ្ជមានត្រូវធ្វើចត្តាឡីស័ក៤ថ្ងៃ ខណៈអ្នកជាប់ពាក់ព័ន្ធលែងធ្វើចត្តាឡីស័កហើយ៕

The post ដាណឺម៉ាកជាប្រទេសអឺរ៉ុបទី១លែងពាក់ម៉ាស់ រស់នៅធម្មតាវិញហើយ appeared first on Kampuchea Thmey Daily.

ប្រទេសមានករណីឆ្លងអូមីក្រុងក្លាយពូជច្រើនបំផុត បញ្ជាក់ពីឥទ្ធិពលរបស់ BA.2

Sok Sovann — Thu, 27 Jan 2022 07:31:31 +0000

រដ្ឋមន្ត្រីសុខាភិបាលដាណឺម៉ាកលោក Magnus Heunicke បាននិយាយកាលពីថ្ងៃពុធទី២៦ខែមករាថា ពូជ BA.2 របស់វីរុសបំប្លែងខ្លួន អូមីក្រុង ដែលកំពុងវាយលុកខ្លាំងបំផុតនៅក្នុងប្រទេសដាណឺម៉ាក ហាក់ដូចជាឆ្លងខ្លាំងជាងពូជ BA.1 ទៅទៀត។

លោក Heunicke បានប្រាប់សន្និសីទសារព័ត៌មានមួយថា “មិនមានភ័ស្តុតាងណាមួយបង្ហាញថា វីរុសក្លាយពូជ BA.2 បង្កឲ្យមានជំងឺធ្ងន់ធ្ងរនោះទេ ប៉ុន្តែវាឆ្លងកាន់តែខ្លាំង”។

ត្រកូល BA.1 បច្ចុប្បន្នមានចំនួន៩៨ភាគរយនៃករណីទាំងអស់នៅទូទាំងពិភពលោក ប៉ុន្តែក្នុងប្រទេសដាណឺម៉ាក ករណីឆ្លងត្រូវបានជំរុញដោយពូជ BA.2 ដែលបានគ្របដណ្តប់យ៉ាងខ្លាំងនៅក្នុងសប្តាហ៍ទីពីរនៃខែមករានេះ។

ការគណនាបឋមបង្ហាញថា BA.2 អាចឆ្លងខ្លាំងជាង BA.1 ១.៥ដង។ នេះបើតាមការឲ្យដឹងពីអាជ្ញាធរជំងឺឆ្លងកំពូលរបស់ប្រទេសដាណឺម៉ាកគឺ វិទ្យាស្ថាន Statens Serum Institut (SSI)។

ទោះបីជាយ៉ាងណាក៏ដោយ ការវិភាគដំបូងដោយវិទ្យាស្ថាននេះ មិនបានបង្ហាញពីភាពខុសប្លែកគ្នានៃហានិភ័យចូលព្យាបាលក្នុងមន្ទីរពេទ្យដោយសារពូជ BA.2 នោះទេបើប្រៀបធៀបទៅនឹង BA.1។

ស្របពេលជាមួយគ្នានោះដែរ លោកស្រី Tyra Grove Krause នាយកបច្ចេកទេសរបស់ SSI បាននិយាយនៅក្នុងសន្និសីទសារព័ត៌មានថា “មានសញ្ញាមួយចំនួនដែលបង្ហាញថា វាឆ្លងកាន់តែខ្លាំង ជាពិសេសសម្រាប់អ្នកដែលមិនចាក់វ៉ាក់សាំង ប៉ុន្តែវាក៏អាចឆ្លងទៅអ្នកដែលទទួលថ្នាំបង្ការក្នុងកម្រិតកាន់តែច្រើនជាងមុនផងដែរ”។

គួរបញ្ជាក់ថា ករណី BA.2 ក៏ត្រូវបានចុះបញ្ជីនៅក្នុងប្រទេសអង់គ្លេស ស៊ុយអែត និងន័រវេសដែរ ប៉ុន្តែក្នុងកម្រិតតិចជាងនៅដាណឺម៉ាក៕

ប្រែសម្រួល៖ Vann Vann

ប្រភព៖ CNA

ចុចអាន៖ អូមីក្រុងក្លាយពូជថ្មី ចាប់ផ្តើមសម្លាប់មនុស្សទៅហើយ នៅថៃ ទោះទើបរកឃើញ១៤ករណី

The post ប្រទេសមានករណីឆ្លងអូមីក្រុងក្លាយពូជច្រើនបំផុត បញ្ជាក់ពីឥទ្ធិពលរបស់ BA.2 appeared first on Kampuchea Thmey Daily.

អាមេរិក ចេញការព្រមាន កុំឲ្យធ្វើដំណើរទៅប្រទេសអាល្លឺម៉ង់ និង ដាណឺម៉ាក

Sok Sovann — Tue, 23 Nov 2021 06:55:59 +0000

មជ្ឈមណ្ឌលគ្រប់គ្រង និងបង្ការជំងឺ (CDC) និងក្រសួងការបរទេសសហរដ្ឋអាមេរិក កាលពីថ្ងៃចន្ទទី២២ខែវិច្ឆិកា បានណែនាំ ប្រឆាំងនឹងការធ្វើដំណើរទៅកាន់ប្រទេសអាល្លឺម៉ង់ និងដាណឺម៉ាក ដោយសារតែការកើនឡើងនៃករណីឆ្លងជំងឺកូវីដ-១៩ នៅក្នុងប្រទេសទាំងនោះ។

CDC បានដាក់សេចក្តីណែនាំអំពីការធ្វើដំណើររបស់ខ្លួនទៅដល់ “កម្រិតទីបួន៖ ខ្ពស់បំផុត” សម្រាប់ប្រទេសអឺរ៉ុបទាំងពីរ ដោយប្រាប់ជនជាតិអាមេរិកថា ពួកគេគួរតែចៀសវាងការធ្វើដំណើរទៅទីនោះ ចំណែកក្រសួងការបរទេស ក៏បានចេញសេចក្តីណែនាំ “កុំធ្វើដំណើរ” ទៅប្រទេសទាំងពីរនេះផងដែរ។

បច្ចុប្បន្ន CDC បានចុះបញ្ជីគោលដៅប្រហែល៧៥កន្លែងនៅទូទាំងពិភពលោក ក្នុងកម្រិតទី៤ ដោយប្រទេសអឺរ៉ុបជាច្រើននៅក្នុងបញ្ជីរួមមាន អូទ្រីស អង់គ្លេស បែលហ្ស៊ិក ក្រិក ន័រវេស ស្វីស រូម៉ានី អៀរឡង់ និងសាធារណរដ្ឋឆេក។ រីឯប្រទេសកម្រិតទីបួននៅអាស៊ីរួមមានសិង្ហបុរី និងម៉ាឡេស៊ី។

ចំនួនករណីនៅក្នុងប្រទេសអាល្លឺម៉ង់ បាននិងកំពុងកើនឡើង ជាពិសេសក្នុងចំណោមមនុស្សចាស់ ដែលការចាក់វ៉ាក់សាំងកូវីដពីរដូសដំបូងគឺចាប់ផ្តើមនៅដើមឆ្នាំនេះ និងក្នុងចំណោមកុមារដែលមិនមានសិទ្ធិទទួលការចាក់វ៉ាក់សាំង។

កាលពីដើមខែនេះ អង្គការសុខភាពពិភពលោក (WHO) បាននិយាយថា បណ្តាប្រទេសនៅអ៊ឺរ៉ុប ត្រូវតែប្រឹងប្រែងបន្ថែមទៀត ដើម្បីទប់ស្កាត់ការរីករាលដាលនៃមេរោគឆ្លង ចំពេលដែលការស្លាប់ និងករណីឆ្លងថ្មីកំពុងកើនឡើងខ្លាំង៕

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក រកឃើញ វីរុសកូវីដបំប្លែងខ្លួនប្រភេទថ្មី មានសមត្ថភាពគេចផុតប្រព័ន្ធភាពស៊ាំ

The post អាមេរិក ចេញការព្រមាន កុំឲ្យធ្វើដំណើរទៅប្រទេសអាល្លឺម៉ង់ និង ដាណឺម៉ាក appeared first on Kampuchea Thmey Daily.