ព័ត៌មានអន្ដរជាតិ

ដាណឺម៉ាកជាប្រទេសអឺរ៉ុបទី១លែងពាក់ម៉ាស់ រស់នៅធម្មតាវិញហើយ

បានផុស

២ years មុន

នៅ

ថ្ងៃពុធ ២ កុម្ភៈ ២០២២

ដោយ

ប្រទេសដាណឺម៉ាកបាននិយាយលាម៉ាស និងបំរាមនានាកាលពីថ្ងៃអង្គារ៍ម្សិលមិញដើម្បីក្លាយជាប្រទេសអឺរ៉ុបទី១បញ្ចប់បំរាមកូវីដ បើទោះជាចំនួនឆ្លងដោយវីរុសបំប្លែងខ្លួន Omicron នៅរាតត្បាតក៏ដោយ។

បំរាមតិចតួចប៉ុណ្ណោះបន្តមាននៅព្រំដែនដែលសម្រាប់អ្នកអត់ចាក់វ៉ាក់សាំងចូលប្រទេសដាណឺម៉ាកដែលមកពីប្រទេសមិនមែនតំបន់ Schengen។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីព្យាយាមលើកបំរាមលើកទី១ចន្លោះខែកញ្ញា និងវិច្ឆិកា ជាថ្មីម្តងទៀត ដាណឺម៉ាក បានបន្ធូរបន្ថយ និងកំណត់ម៉ោងបើកក្លឹបកម្សាន្ត និងភោជនីយដ្ឋាន។

នារីឈ្មោះ Natalia Chechetkina អ្នកទទួលភ្ញៀវនៅទីក្រុង Copenhagen បាននិយាយថា ៖«សម្រាប់ខ្ញុំ ផ្នែកដ៏ល្អបំផុតគឺថា យើងលែងពាក់ម៉ាស់ទៀតហើយ។ ឥឡូវនេះ ហោចណាស់មានជម្រើស ប្រសិនបើយើងចង់ការពារខ្លួនឯង យើងពាក់ម៉ាស់ទៅ។ នរណាមិនចង់ ក៏អត់បញ្ហា»។

និស្សិតឈ្មោះ Marie Touflet ជាជនជាតិបារាំងនៅរៀនប្រទេសដាណឺម៉ាកបាននិយាយថា វាពិតជាចម្លែកណាស់ដែលជិះរថភ្លើងក្រោមដីអត់ពាក់ម៉ាស់ ខុសពីនៅប្រទេសបារាំង។ «ល្អណាស់ដែលអាចឃើញមុខគ្នា ហើយវាមានអារម្មណ៍ដូចជា យើងរស់នៅធម្មតាវិញហើយ»។

ការបញ្ចប់បំរាមបានធ្វើឡើងនៅពេលប្រទេសដាណឺម៉ាកមានអ្នកឆ្លងកូវីដ-១៩ថ្មីចន្លោះពី៤ទៅ៥ម៉ឺននាក់ក្នុងមួយថ្ងៃ ឬស្មើនឹង១ភាគរយនៃប្រជាជន៥.៨លាននាក់របស់ប្រទេស។

មន្ត្រីសុខាភិបាលជឿថា ចំនួនឆ្លងនេះនឹងធ្លាក់ចុះជាលំដាប់ឆាប់ៗ។ អ្នកស្រី Tyra Krause នៅវិទ្យាស្ថានសុខភាព និងស្រាវជ្រាវ SSI របស់ដាណឺម៉ាកបាននិយាយថា ៖«មានការបង្ហាញយ៉ាងខ្លាំងដែលការឆ្លងឈានដល់កម្រិតកំពូលនៅក្នុងតំបន់ដែលដឹងច្បាស់បំផុត។ ដូច្នេះវាជាពេលវេលាល្អបំផុតសម្រាប់ការរឹតបន្តឹងត្រូវបានបន្ធូរបន្ថយ»។

រហូតដល់ពេលនេះ ប្រជាជនដាណឺម៉ាកជាង៦០%បានចាក់វ៉ាក់សាំងបង្ការកូវីដ-១៩ដូសទី៣ ដែលបានមួយខែមុននៃកាលវិភាគរបស់អាជ្ញាធរសុខាភិបាល បើប្រៀបធៀបនឹងមធ្យមភាគនៅអឺរ៉ុបស្ថិតក្រោម៤៥%។

អាជ្ញាធរបានប៉ាន់ស្មានថា ប្រជាជនដាណឺម៉ា៨០%ទទួលបានការពារពីជំងឺកូវីដ។ អ្នកឯកទេសជំងឺឆ្លង លោក Lone Simonsen នៅសាកលវិទ្យាល័យ Roskilde បាននិយាយថា ៖«ដោយវីរុសបំប្លែងខ្លួន Omicron មិនឈឺធ្ងន់ធ្ងរសម្រាប់អ្នកចាក់វ៉ាក់សាំង យើងជឿថា វាសមហេតុផលដែលត្រូវលើកបំរាម»។

សម្រាប់ជីវិតរស់នៅប្រក្រតី ប្រទេសដាណឺម៉ាកក៏សង្កត់ធ្ងន់លើការទទួលខុសត្រូវផ្ទាល់ខ្លួន។ លោក Simonsen បាននិយាយថា ៖«ដោយគ្មានប័ណ្ណកូវីដ ដូច្នេះនឹងមានការផ្លាស់ប្តូរការទទួលខុសត្រូវ»។

ដាណឺម៉ាកបានកំពុងជំរុញឲ្យធ្វើតេស្តរកកូវីដនៅតាមផ្ទះ។ អាជ្ញាធរសុខាភិបាលដាណឺម៉ាកថ្មីៗបានចេញសេចក្តីណែនាំឲ្យអ្នកដែលធ្វើតេស្តវិជ្ជមានត្រូវធ្វើចត្តាឡីស័ក៤ថ្ងៃ ខណៈអ្នកជាប់ពាក់ព័ន្ធលែងធ្វើចត្តាឡីស័កហើយ៕

ប្រែសម្រួល៖ វីរបុត្រ
ប្រភព៖ theaustralian

Related Topics:ប្រទេស ដាណឺម៉ាក