ក្រុមហ៊ុនបច្ចេកវិទ្យា Samsung នឹងវិនិយោគក្នុងទំហំទឹកប្រាក់ ២៣០ ពាន់លានដុល្លារដើម្បីសាងសង់មជ្ឈមណ្ឌលផលិតបន្ទះឈីបធំជាងគេនៅលើពិភពលោកក្នុងប្រទេសកូរ៉េខាងត្បូង ។

ផែនការសាងសង់នេះ បានបញ្ជាក់ដោយប្រធានាធិបតី Yoon Suk Yeol កាលពីថ្ងៃពុធ និងបញ្ជាក់ដោយក្រុមហ៊ុនអេឡិចត្រូនិកយក្ស Samsung រួចរាល់ជាស្រេច ។

ប្រធានាធិបតី​កូរ៉េខាងត្បូងនិយាយថា នឹងសាងសង់រោងចក្រផលិតឧបករណ៍បន្ទះឈីប semiconductor ដ៏ធំនៅខេត្ត Gyeonggi ហើយនឹងពង្រីកការផលិតនេះឲ្យកាន់តែធំជាងគេលើពិភពលោក ជាមួយនឹងរោងចក្រផលិតដែលមានស្រាប់ ។ ទន្ទឹមនឹងនោះ ការវិនិយោគសរុប នឹងត្រូវបញ្ចប់ក្នុងរយៈពេលប្រហែល ២០ ឆ្នាំ ។

ក្នុងរយៈពេលប៉ុន្មានឆ្នាំចុងក្រោយនេះ Samsung កំពុងឈានមុខបន្ថែមទៀតក្នុងតួនាទីជាអ្នកផ្គត់ផ្គង់ឧបករណ៍អេឡិចត្រូនិក ជាពិសេសគឺបន្ទះឈីប ខណៈដែលក្រុមហ៊ុនផលិតនៅជុំវិញពិភពលោកកំពុងតែមានកង្វះខាត ។

យោងតាមក្រុមហ៊ុនបានឲ្យដឹងថា ការផលិតបន្ទះឈីបនេះ គឹដើរតួនាទីដ៏សំខាន់សម្រាប់ស្វែងរកចំណូល ហើយក្រុមហ៊ុននឹងបន្តផ្តោត​សំខាន់លើគម្រោងនេះបន្ថែមទៀត ។

ចំពោះទីតាំងផលិតមីក្រូឈីបទំនើបៗភាគច្រើនរបស់ពិភពលោកត្រូវបានផលិតតែ ២ កន្លែងប៉ុណ្ណោះ គឺតៃវ៉ាន់ និងកូរ៉េខាងត្បូង ខណៈឧស្សាហកម្ម​របស់​តៃវ៉ាន់​ មានទំហំធំ និង​មាន​ឥទ្ធិពល​ជាងបំផុត ។  

គួរឲ្យដឹងថា ប៉ុន្មានឆ្នាំចុងក្រោយនេះ ការផលិតបន្ទះឈីបដ៏សំខាន់ប្រទេសទាំងពីរនេះ បានបង្កឲ្យមានការព្រួយបារម្ភអំពីស្ថិរភាពខ្សែសង្វាក់ផ្គត់ផ្គង់សកល ជាពិសេសដោយសារតែកូរ៉េខាងត្បូង និងតៃវ៉ាន់ត្រូវបានគំរាមកំហែងផ្នែកយោធាដោយអ្នកជិតខាងខ្លួន គឺកូរ៉េខាងជើង និងចិន ៕

ប្រែសម្រួលដោយ ៖ នាង រតនៈ

ប្រភព ៖ CNN

ចុចអាន ៖ ជប៉ុន បើកខ្សែទូរស័ព្ទបន្ទាន់ភ្ជាប់ជាមួយប្រទេសអាស៊ាន