លោក បៃដិន ថា បច្ចេកវិទ្យា AI អាចគ្រោះថ្នាក់ដល់សង្គមជាតិ

ប្រធានាធិបតីអាមេរិកលោក ចូ បៃដិន បាននិយាយថា បច្ចេកវិទ្យា AI នឹងអាចផ្តល់គ្រោះថ្នាក់ប៉ះពាល់ដល់សង្គម ដែលតម្រូវឲ្យក្រុមហ៊ុនបច្ចេកវិទ្យា​ធំៗទាំងអស់ ត្រូវតែទទួលខុសត្រូវ​ចំពោះផលិតផលរបស់ខ្លួន ​មុនដាក់​ដំណើរការ ។

នៅក្នុងកិច្ចប្រជុំជាមួយទីប្រឹក្សាវិទ្យាសាស្ត្រ និងបច្ចេកវិទ្យាកាលពីពេលថ្មីៗនេះ លោក​ប្រធានាធិបតីថ្លែងថា បច្ចេកវិទ្យា​ AI គឺវាជួយបម្រើប្រយោជន៍ដោះស្រាយបញ្ហាប្រឈមនានាដូចជា ជំងឺ និងការប្រែប្រួលអាកាសធាតុ ប៉ុន្តែអ្នកអភិវឌ្ឍន៍បច្ចេកវិទ្យា ក៏នឹងត្រូវដោះស្រាយហានិភ័យដែលអាចកើតមានចំពោះសង្គម សេដ្ឋកិច្ច និង ដល់សន្តិសុខជាតិផងដែរ ។

ការកត់សម្គាល់របស់លោក បៃដិន បានកើតមានឡើង ចំពេលមានការជជែកដេញដោលកាន់តែខ្លាំងឡើងអំពីវិធីគ្រប់គ្រងបច្ចេកវិទ្យា AI ដោយមតិភាគច្រើនអំពាវនាវឲ្យផ្អាកការអភិវឌ្ឍន៍បច្ចេកវិទ្យាមួយនេះ រហូតដល់មានឧបករណ៍ការពារអាចត្រូវបានដាក់ឲ្យដំណើរការ ។

ស្របពេលជាមួយគ្នានេះ នៅក្នុងលិខិតមួយដែលបានចេញផ្សាយកាលពីខែមុន មេដឹកនាំបច្ចេកវិទ្យាមួយចំនួនរួមទាំងស្ថាបនិក Tesla លោក Elon Musk និងសហស្ថាបនិក Apple លោក Steve Wozniak ក៏បានអំពាវនាវឲ្យមានការផ្អាកដាក់ប្រើប្រាស់បច្ចេកវិទ្យា AI ផងដែរ ដោយសារតែមានគ្រោះថ្នាក់់ខ្ពស់ចំពោះមនុស្សជាតិ ។

ដោយឡែក នាពេលថ្មីៗ​នេះបច្ចេកវិទ្យា​ ChatGPT ដែលបង្កើតដោយប្រព័ន្ធ Open AI កំពុងធ្វើឲ្យសង្គមព្រួយបារម្ភយ៉ាងខ្លាំង ដោយវាមានសមត្ថភាពខ្ពស់លើសពីការរំពឹងទុក ខណៈអ៊ីតាលីកាលពីសប្តាហ៍មុន បានក្លាយជាប្រទេស​លោកខាងលិចដំបូងគេ ហាមមិនឲ្យប្រើបច្ចេកវិទ្យា ChatGPT នេះ ៕

ប្រែសម្រួលដោយ ៖ នាង រតនៈ

ប្រភព៖ Al Jazeera

ចុចអាន ៖ ដឹងទេ ប្រទេសណាចូលសមាជិក អង្គការណាតូ ចុងក្រោយបង្អស់ មុនហ្វាំងឡង់?