ព័ត៌មានអន្ដរជាតិ

គ្រោះថ្នាក់ចរាចរណ៍ថ្ងៃចូលឆ្នាំថ្មីនៅ ថៃ ឆក់យកជីវិតមនុស្សជិត ២០០ នាក់

បានផុស

២ ខែ មុន

នៅ

ថ្ងៃចន្ទ ១៧ មេសា ២០២៣

ដោយ

បើយោងតាមក្រសួងមហាផ្ទៃរបស់ប្រទេសថៃបានឲ្យដឹងថា ក្នុងរយៈពេល ៥ ថ្ងៃដំបូងនៃការធ្វើដំណើរ អំឡុងពិធីបុណ្យចូលឆ្នាំថ្មីប្រពៃណីថៃ គ្រោះថ្នាក់ចរាចរណ៍បានសម្លាប់មនុស្សចំនួន ១៩៧ នាក់ និង ១,៧៧៥ នាក់ផ្សេងទៀតបានរបួស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chotenarin Kerdsom អនុរដ្ឋលេខាធិការអចិន្ត្រៃយ៍នៃក្រសួងមហាផ្ទៃបានថ្លែងកាលពីថ្ងៃអាទិត្យថា គ្រោះថ្នាក់ចរាចរណ៍បានកើតឡើងចំនួន ១,៧៤៤ លើកនៅទូទាំងប្រទេស ចាប់ពីថ្ងៃទី ១១ ដល់ថ្ងៃទី ១៦ ខែមេសា ខណៈមូលហេតុចម្បងនៃគ្រោះថ្នាក់នេះ គឺអ្នកបើកបរមិនពាក់ខ្សែក្រវ៉ាត់សុវត្ថិភាពប្រហែល ៩២ ភាគរយ បន្ទាប់មកមិនពាក់មួកសុវត្ថិភាព ៣២ ភាគរយ បើកបរក្នុងស្ថានភាពស្រវឹង ១១ ភាគរយ និងករណីបើកបរលើសល្បឿនកំណត់មាន ៣៥.៣៧ ភាគរយ ។

ក្នុងអំឡុងពេលនោះដែរ គ្រោះថ្នាក់ច្រើនជាងគេចំនួន ៥៩ លើកបានកើតឡើងនៅក្នុងខេត្ត Nan ភាគខាងជើង ខណៈចំនួនអ្នកស្លាប់ខ្ពស់បំផុតនោះគឺ ១៥ នាក់ត្រូវបានកត់ត្រានៅក្នុងទីក្រុងបាងកក ។ លោក Chotenarin បានបន្តថា ចំនួនអ្នករងរបួសច្រើនជាងគេក្នុងគ្រោះថ្នាក់ចរាចរណ៍ក៏ត្រូវបានគេរាយការណ៍ នៅខេត្ត Nan ផងដែរ គឺមានចំនួន ៥៩ នាក់ ។

ជាមួយគ្នានេះ ជំនួយការអគ្គស្នងការនគរបាលជាតិថៃ លោក Prachuap Wongsuk បាននិយាយថា ចំនួននៃគ្រោះថ្នាក់ចរាចរណ៍ក្នុងពិធីបុណ្យចូលឆ្នាំថ្មីរយៈពេល ៥ ថ្ងៃដំបូងនេះ បានកើនឡើង ១៧.២០ ភាគរយ បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែបានធ្លាក់ចុះ ១២.៥៨ ភាគរយពីមធ្យមភាគក្នុងរយៈពេល ៣ ឆ្នាំចុងក្រោយនេះ ។

ទន្ទឹមនោះ ចំនួនអ្នករងរបួសបានកើនឡើង ១៩.៧០ ភាគរយ បើធៀបនឹងឆ្នាំមុន ប៉ុន្តែបានធ្លាក់ចុះ ១៣.៥៣ ភាគរយ ពីមធ្យមភាគ ៣ ឆ្នាំចុងក្រោយនេះ ខណៈចំនួនអ្នកស្លាប់ ដោយសារគ្រោះថ្នាក់ចរាចរណ៍ក៏បានធ្លាក់ចុះ ១០.០៥ ភាគរយផងដែរ បើធៀបនឹងឆ្នាំមុន ៕