បើកម៉ូតូលឿនមិនគោរពភ្លើងស្តុប បុករថយន្ដពេញទំហឹងស្លាប់ម្នាក់របួសធ្ងន់ម្នាក់

យុវជនម្នាក់បានស្លាប់ និងម្នាក់ទៀតរងរបួសធ្ងន់ធ្ងរបន្ទាប់ពីជិះម៉ូតូមួយគ្រឿងឌុបគ្នាក្នុងល្បឿនលឿនមិនគោរពភ្លើងស្តុបបានជ្រុលទៅបុករថយន្តមួយគ្រឿងដែលដែលកំពុងបើកឆ្លងផ្លូវ ខណៈភ្លើងស្តុបពណ៌ខៀវ។

ហេតុការណ៍នេះបានកើតឡើងនៅវេលាម៉ោង៤និង៤០នាទី ព្រឹកថ្ងៃទី១៤ ខែសីហា ឆ្នាំ២០២៤ តាមបណ្ដោយផ្លូវ៥៩៨ ក្រោមស្ពានអាកាស៧មករា ក្នុងសង្កាត់ទឹកល្អ៣ ខណ្ឌទួលគោក រាជធានីភ្នំពេញ។

តាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាក Toyota 4runer ពណ៌ស ពាក់ស្លាកលេខ ភ្នំពេញ2C-1311 បើកបរដោយបុរសម្នាក់ តាមបណ្តោយផ្លូវ២៧១ ក្នុងទិសដៅពីត្បូងទៅជើង ខណៈមកដល់ចំណុចក្រោមស្ពានអាកាស ៧មករា ហៅស្ពានអាកាសពេទ្យលោកសង្ឃ រថយន្តក៏បានបន្តល្បឿនឆ្លងផ្លូវខាងក្រោមស្ពាន ដោយភ្លើងស្តុបពណ៌ខៀវ ខណៈរថយន្តកំពុងបើកឆ្លង ស្រាប់តែមានម៉ូតូមួយគ្រឿងម៉ាក និច ពាក់ស្លាកលេខ ភ្នំពេញ 1HW-8684 បើកបរដោយយុវជន២នាក់ តាមបណ្តោយមហាវិថីកម្ពុជាក្រោម ក្នុងទិសដៅពីកើតទៅលិច ក្នុងល្បឿនលឿន មិនគោរពភ្លើងស្តុប ក៏ជ្រុលទៅរថយន្តពេញទំហឹង បណ្តាលឲ្យយុវជនជាអ្នកបើកម៉ូតូបានស្លាប់ភ្លាមៗ រីឯយុវជនម្នាក់ទៀតដែលជិះពីក្រោយរងរបួសធ្ងន់ត្រូវបញ្ជូនទៅកាន់មន្ទីពេទ្យ។

ក្រោយពេលកើតហេតុកម្លាំងសមត្ថកិច្ចមូលដ្ឋាន បានចុះមកដល់ទីតាំងចំណុចកើតហេតុ រួចធ្វើការឃាត់ខ្លួនម្ចាស់រថយន្តយកទៅប៉ុស្តិ៍ដើម្បីសួរនាំ រីឯសពយុវជនរងគ្រោះត្រូវបានសមត្ថកិច្ច ទំនាក់ទំនងទៅកាន់គ្រួសារដើម្បីមកទទួលសពយកទៅធ្វើបុណ្យតាមប្រពៃណី ចំណែកម៉ូតូ និងរថយន្តត្រូវបាមកម្លាំងសមត្ថកិច្ចចរាចរណ៍ផ្លូវគោក ធ្វើការវាស់វែងយកទៅរក្សាទុកជាបណ្តោះអាសន្នរង់ចាំធ្វើការដោះស្រាយពេលក្រោយ៕

អត្ថបទ៖ រដ្ឋា