បុរសម្នាក់ស្លាប់លើស្ពានព្រែកសំរ៉ោង សង្ស័យរថយន្ដ​បើកកិន

សពបុរសម្នាក់ត្រូវបានគេប្រទះឃើញដេកស្លាប់ជាមួយថ្លុកឈាមនៅលើស្ពានព្រែកសំរ៉ោង សង្ស័យជិះម៉ូតូដួលហើយត្រូវរថយន្តកិនបែកក្បាល។

គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង៨និង៣០នាទីយប់ ថ្ងៃទី១២ ខែវិច្ឆិកា ឆ្នាំ២០២៤ នៅលើស្ពានព្រែកសំរោង ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

សពរងគ្រោះមានឈ្មោះ សា រុំ អាយុ ៤១ឆ្នាំ មុខរបរជាបុគ្គលិកស្ថានីយប្រេងឥន្ទនៈ សារីមិច មានស្រុកកំណើតនៅខេត្ត កំពង់ចាម។ បច្ចុប្បន្នស្នាក់នៅក្បែរវត្តគល់ទទឹង។

តាមប្រភពព័ត៌មានពីពលរដ្ឋបានប្រាប់អោយដឹងថា មុនកើតហេតុ គេឃើញជនរងគ្រោះជិះម៉ូតូមួយគ្រឿងម៉ាក ក្លីគ ពណ៍ស ពាក់ស្លាកលេខ ភ្នំពេញ 1FF-4334 បើកបរមកពីទួលក្រសាំង សង្ស័យគោលបំណងត្រឡប់ទៅផ្ទះ ខណៈមកដល់លើស្ពាន បានដួលបោកក្បាលស្លាប់ភ្លាមៗ នៅកន្លែងកើតហេតុតែម្តង។

ប្រភពពីសមត្ថកិច្ចបានអោយដឹងថា សពបុរសរងគ្រោះសង្ស័យមានរថយន្តកិន ទើបធ្វើអោយបែកមួកសុវត្ថិភាព រីឯផ្ទៃមុខបុរសរងគ្រោះមានសភាព សំប៉ែត។

ក្រោយកើតហេតុ សមត្ថកិច្ចមូលដ្ឋានបានចុះមកដល់រួចធ្វើការវាស់វែងនៅកន្លែងហេតុ និងទំនាក់ទំនងទៅសាច់ញ្ញាតដើម្បីប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ រដ្ឋា