ចរាចរណ៍

និស្សិតឆ្នាំទី ១ ម្នាក់ ជិះម៉ូតូបុកក្បាលព្រួញថ្មពុះចែកទ្រូងផ្លូវ ដួលបោកក្បាលស្លាប់ ក្បែរភ្លើងស្តុបអាងទឹកអូឡាំពិក

បានផុស

១ year មុន

នៅ

ថ្ងៃពុធ ៩ មេសា ២០២៥

ដោយ

យុវជនជានិស្សិតឆ្នាំទី ១ ម្នាក់ ជិះម៉ូតូចេញពីធ្វើការត្រឡប់ទៅផ្ទះវិញ សង្ស័យងងុយដេក ក៏រេចង្កូតម៉ូតូទៅបុកក្បាលថ្មពុះចែកទ្រូងផ្លូវបណ្ដាលឲ្យដួលស្លាប់ភ្លាមៗ នៅនឹងកន្លែងកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៤ និង ៥០ នាទីទៀបភ្លឺ ថ្ងៃទី ៩ ខែមេសា ឆ្នាំ ២០២៥ ស្ថិតនៅក្បែរភ្លើងស្តុបអាងទឹកអូឡាំពិក លើកំណាត់ផ្លូវលេខ ២១៧ សង្កាត់ផ្សារដើមគ ខណ្ឌទួលគោក រាជធានីភ្នំពេញ។

តាមប្រភពពីអ្នកស្គាល់គ្នាបានឲ្យដឹងថា យុវជនរងគ្រោះឈ្មោះ លន់ ឌី ភេទប្រុស អាយុប្រមាណ ២០ ឆ្នាំ មានទីកន្លែងកំណើតនៅខេត្តព្រៃវែង បច្ចុប្បន្នរស់នៅម្តុំលូ ៥ ខណ្ឌមានជ័យ។ យុវជនខាងលើជានិស្សិតឆ្នាំទី ១ ដោយពេលយប់ធ្វើការជាសន្តិសុខ លុះចប់ម៉ោងធ្វើការ ក៏ជិះម៉ូតូត្រឡប់ទៅផ្ទះវិញនៅលូ ៥ តែអកុសលតាមផ្លូវបែរជាជួបគ្រោះថ្នាក់ស្លាប់គួរឲ្យរន្ធត់។

តាមប្រភពព័ត៌មានពីប្រជាពលរដ្ឋដែលលក់បន្លែនៅក្បែរទីតាំងកើតហេតុបានឲ្យដឹងថា មុនពេលកើតហេតុគេបានឃើញយុវជនខាងលើជិះម៉ូតូម៉ាកហុងដាឌ្រីមសេ ១២៥ ពណ៌ខ្មៅ ពាក់ស្លាកលេខ ភ្នំពេញ 1GQ-7720 ធ្វើដំណើរតាមវិថីព្រះសីហនុ ទិសដៅពីត្បូងទៅជើង លុះមកដល់ភ្លើងស្តុបអាងទឹកអូឡាំពិកជនរងគ្រោះបានបត់ឆ្វេង តែជាអកុសលក៏ជ្រុលចង្កូតម៉ូតូទៅបុកក្បាលនាគថ្មពុះចែកទ្រូងផ្លូវបណ្ដាលឲ្យខ្ទាតជាច្រើនម៉ែត្រដួលបោកក្បាលស្លាប់តែម្ដង។

ក្រោយពេលកើតហេតុ សមត្ថកិច្ច បានចុះមកធ្វើការវាស់វែង និងឲ្យអ្នកស្គាល់គ្នាជាមួយជនរងគ្រោះទាក់ទងទៅកាន់បងប្រុសរបស់សពដើម្បីធ្វើដំណើរមកកាន់ទីតាំងកើតហេតុទទួលសពយកទៅធ្វើបុណ្យតាមប្រពៃណី៕

អត្ថបទ ៖ សុខា