ចរាចរណ៍

រថយន្តសណ្ដោងកុងតឺន័រ បុកម៉ូតូ ស្លាប់បុរសម្នាក់ នៅខណ្ឌកំបូល

បានផុស

៩ ខែ មុន

នៅ

ថ្ងៃសុក្រ ១៩ កញ្ញា ២០២៥

ដោយ

បុរសម្នាក់ បានស្លាប់ បន្ទាប់ពីរថយន្តសណ្ដោងកុងតឺន័រ ១ គ្រឿង បើកបុកកិន កាលពីវេលាម៉ោង ១១ និង ៥០ នាទីយប់ ថ្ងៃទី ១៨ ខែកញ្ញា ឆ្នាំ ២០២៥ ស្ថិតនៅតាមបណ្ដោយផ្លូវជាតិលេខ ៤ សង្កាត់កន្ទោក ខណ្ឌកំបូល រាជធានីភ្នំពេញ។ ជនរងគ្រោះ ជិះម៉ូតូម៉ាកហុងដាឌ្រីម ឆ្នាំ ២០១៥ ពណ៌ខ្មៅ ពាក់ផ្លាកលេខ កំពង់ធំ 1C-5867 ប៉ុន្តែមិនទាន់ស្គាល់អត្តសញ្ញាណ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មាន បាននិយាយថា មុនពេលកើតហេតុ ជនរងគ្រោះជិះម៉ូតូតាមផ្លូវជាតិលេខ ៤ ទិសដៅពីកើតទៅលិច។ ពេលមកដល់ចំណុចកើតហេតុ មានរថយន្តសណ្ដោងកុងតឺន័រ ម៉ាក FUSU ពណ៌ទឹកប្រាក់ ផ្លាកលេខ កំពង់ស្ពឺ 3A-7666 បើកចេញពីទិសបញ្ច្រាសគ្នា ហើយបើកជ្រុលបុកម៉ូតូជនរងគ្រោះយ៉ាងពេញទំហឹង។ ភ្លាមៗ រថយន្តមិនបានឈប់នោះទេ បានអូសកិនទាំងមនុស្ស និងម៉ូតូក្រោមរថយន្ត ជាង ១០០ ម៉ែត្រ ដែលធ្វើឲ្យជនរងគ្រោះបែកសាច់ខ្ទេចស្លាប់ភ្លាមៗ នៅកន្លែងកើតហេតុ។ ចំណែកម៉ូតូ ក៏ខ្ទេចខ្ទីរងការខូចខាតទាំងស្រុង។

ដោយឡែករថយន្តសណ្ដោងក៏រងការខូចខាតផ្នែកមុខ និងចំហៀងខាងឆ្វេង ខណៈដែលអ្នកបើកបរបានចុះរត់គេចបាត់។ ករណីខាងលើនេះ មិនទាន់ទាក់ទងរកសាច់ញាតិបាននៅឡើយទេ បច្ចុប្បន្នសពត្រូវបានដឹកយកទៅតម្កល់ទុក ដើម្បីរង់ចាំការស្វែងរកសាច់ញាតិ។ រីឯ រថយន្ត និងម៉ូតូ ត្រូវបានសមត្ថកិច្ចចរាចរណ៍វាស់វែង និងយកទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីចាត់ការតាមនីតិវិធីបន្ត៕

អត្ថបទ ៖ សំណាង