ព័ត៌មានអន្ដរជាតិ

ថៃអនុម័តកញ្ចប់វិនិយោគសម្រាប់ក្រុមហ៊ុនរដ្ឋជិត ៥០ ប៊ីលានដុល្លារ ដើម្បីជំរុញសេដ្ឋកិច្ច

បានផុស

៨ ខែ មុន

នៅ

ថ្ងៃពុធ ១៥ តុលា ២០២៥

ដោយ

គណៈរដ្ឋមន្ត្រីថៃបានអនុម័តកញ្ចប់គម្រោងវិនិយោគសម្រាប់សហគ្រាសរដ្ឋ ក្នុងតម្លៃប្រមាណ ១,៥៦ ទ្រីលានបាត ឬ ៤៧,៩៦ ប៊ីលានដុល្លារ សម្រាប់ឆ្នាំសារពើពន្ធ ២០២៦ ដើម្បីជំរុញសេដ្ឋកិច្ចថៃ ដែលបន្តដើរអូសជើង។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរដ្ឋាភិបាលថៃ លោក Siripong Angkasakulkiat បានឱ្យដឹងថា កញ្ចប់គម្រោងដ៏ធំនេះ នឹងជួយជំរុញកំណើនសេដ្ឋកិច្ចថៃប្រមាណ ០,៣ ភាគរយ តាមរយៈការយកប្រើប្រាស់ទៅក្នុងគម្រោងរបស់សហគ្រាសរដ្ឋចំនួន ៥១ នៅឆ្នាំសារពើពន្ធ ២០២៦ តាមការស្នើឡើងរបស់ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ (NESDC)។

គេមើលឃើញថា នេះគឺជាការអនុម័តកញ្ចប់ដ៏ធំបំផុតសម្រាប់គណៈរដ្ឋមន្រ្តីថៃថ្មីនៃរដ្ឋាភិបាលរបស់លោកនាយករដ្ឋមន្រ្តី អានុទីន ឆានវីរៈគុន ដែលប្ដេជ្ញាស្ដារសេដ្ឋកិច្ចដើរអូសជើងថៃឡើងវិញ ប៉ុន្តែមានពេលត្រឹម ៤ ខែ ដើម្បីដោះស្រាយបញ្ហា ក្រោមកិច្ចសន្យារំលាយសភានៅដើមឆ្នាំក្រោយដើម្បីរៀបចំការបោះឆ្នោតឡើងវិញ។

គម្រោងសំខាន់ៗរួមមាន គម្រោងរបស់អាជ្ញាធរអគ្គិសនីថៃ (EGAT) ក្នុងការដំឡើងប្រព័ន្ធបញ្ជូនអគ្គិសនី គម្រោងផ្លូវរថភ្លើងល្បឿនលឿនថៃ-ចិន (បាងកក-នគររាជសីមា ដំណាក់កាលទី១) ក្រោមក្រោមការគ្រប់គ្រងរបស់ផ្លូវរថភ្លើងរដ្ឋថៃ (SRT) គម្រោងខ្សែរថភ្លើង MRT ពណ៌ស្វាយ នៅក្រុងបាងកក ដែលស្ថិតនៅក្រោមអាជ្ញាធរដឹកជញ្ជូនរហ័សថៃ (MRTA) និងគម្រោងផ្លូវល្បឿនលឿន Rama III-Dao Khanong-Western Outer Ring Road របស់អាជ្ញាធរផ្លូវល្បឿនលឿនថៃ (EXAT) ជាដើម។