សេដ្ឋកិច្ច

ហាងឆេងមាសបន្តស្ទុះឡើងបំបែកកំណត់ត្រាខ្ពស់បំផុត ៥ ២៣០ ដុល្លារ មួយតម្លឹង

បានផុស

៨ ខែ មុន

នៅ

ថ្ងៃសុក្រ ១៧ តុលា ២០២៥

ដោយ

តម្លៃហាងឆេងមាសបានបន្តកើនឡើងបំបែកកំណត់ត្រាខ្ពស់បំផុតដល់ជាង ៥ ២៣០ ដុល្លារក្នុងមួយតម្លឹង នៅព្រឹកថ្ងៃសុក្រនេះ មិនធ្លាប់មានក្នុងប្រវត្តិសាស្ត្រ ដោយសារអត្រាការប្រាក់ធនាគារកណ្ដាលរបស់សហរដ្ឋអាមេរិក និងស្ថានភាពភូមិសាស្ត្រនយោបាយពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជីវករលក់មាសផ្សារធំថ្មី អ្នកស្រី ហ៊ង រីណា បានឱ្យដឹងថា តម្លៃមាសបានកើនឡើងរាល់ថ្ងៃ ខណៈសកម្មភាពទិញ-លក់ស្ងប់ស្ងាត់ ដោយសារការបារម្ភរបស់អតិថិជន។

អាជីវកររូបនេះ បញ្ជាក់ថា មានអតិថិជនមួយៗទិញដែរ ប៉ុន្តែទិញជាដុំមាសជាគីឡូ ខណៈគ្រឿងមាសលែងមានជួញដូរហើយ។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities កត្តាដែលរុញច្រានឱ្យតម្លៃហាងឆេងមាសកើនឡើងខ្លាំង គឺពាក់ព័ន្ធជាមួយនឹងទំនុកចិត្ត ទាំងវិនិយោគិន និងធនាគារ ដែលគេមើលឃើញថា ប្រាក់ដុល្លារ ទោះបីជារក្សាអត្រាការប្រាក់ក៏ដោយ ឬក៏ដំឡើងអត្រាការប្រាក់ក៏ដោយគ្រាន់តែទប់ក្នុងការ ការពារអត្រាអតិផរណាកើនឡើងតែប៉ុណ្ណោះ។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច យល់ឃើញថា៖ «មាស និងថាមពលដើរបញ្ច្រាស់គ្នា ជាធម្មតា នៅពេលដែលមាសឡើងថ្លៃ គឺប្រេងចុះថោក នៅពេលដែលប្រាក់ដុល្លារចុះថោកមាសក៏ឡើងថ្លៃដែរ នេះគឺវាពាក់ព័ន្ធបញ្ហាភូមិសាស្ត្រនយោបាយ នៅពេលដែលភូមិសាស្ត្រនយោបាយ ឬក៏សង្គ្រាមផ្សេងៗ កើតឡើងគឺវាធ្វើឱ្យតម្រូវ ការមានការថយចុះ មានន័យថា ការផលិតថយចុះ ដូច្នេះតម្រូវការនៃថាមពលមានការថយចុះ ដូច្នេះតម្លៃប្រេងសាំងមានការចុះថ្លៃ»។

លោកបណ្ឌិត ជ័យ តិច បន្ថែមថា នៅពេលដែលសេដ្ឋកិច្ចមិនច្បាស់លាស់ គឺធ្វើឱ្យអ្នកវិនិយោគស្ទាក់ស្ទើក្នុងការដាក់ទុន សេដ្ឋកិច្ចមានភាពមិនច្បាស់លាស់ ដូច្នេះ អ្វីដែលជាទំនុកចិត្តគឺការជឿជាក់ទៅលើមាស នៅពេលដែលសេដ្ឋកិច្ចមិនច្បាស់លាស់មាសគឺជាទំនុកចិត្តដ៏ខ្ពស់ ដែលតម្រូវឱ្យមានការទិញចូល ធ្វើឱ្យតម្លៃកើនឡើង៕

អត្ថបទ៖ ឡេង ដេត