បុគ្គល​លេចធ្លោ៤​រូប កំពុង​ប្រជែង​តំណែង​បន្ត​ពី​ផែថងថាន ធ្វើ​​ជាអ្នកដឹកនាំបក្ស​ភឿថៃ

ឥស្សរជនលេចធ្លោចំនួន​៤​រូប ត្រូវ​គេ​មើល​ឃើញ​ថា​ជាគូប្រជែងឈានមុខ​គេ ដើម្បីដណ្តើមតំណែងកំពូលរបស់គណបក្សភឿថៃ ខណៈដែលគណបក្សនេះរៀបចំបោះឆ្នោតជ្រើសតាំង​មេដឹកនាំ និងគណៈកម្មាធិការប្រតិបត្តិ​ថ្មី ក្នុងអំឡុងមហាសន្និបាតពិសេសមួយនៅថ្ងៃសុក្រ​សប្ដាហ៍​នេះ បន្ទាប់ពីការលាលែងរបស់លោកស្រី​ ផែថងថាន ស៊ីណាវ៉ាត្រ។

លោកស្រីផែថងថាន ដែល​ត្រូវ​បាន​តុលាការ​ធម្មនុញ្ញ​ទម្លាក់​ចេញ​ពី​តំណែង​នាយករដ្ឋមន្ត្រី​កាលពី​ខែ​សីហា ជុំវិញ​ការ​បែកធ្លាយ​សារ​សំឡេង​តាម​ទូរសព្ទជាមួយ​សម្ដេច​តេជោ​ហ៊ុន សែន បាន​លាលែង​ពី​តំណែង​ជា​មេដឹកនាំ​គណបក្ស​ភឿថៃ​កាលពី​ថ្ងៃ​ពុធ​សប្ដាហ៍មុន។

យោងតាមអ្នកខាងក្នុងគណបក្ស ដំបូងឡើយការរំពឹងទុកផ្តោតលើលោក Chaturon Chaisaeng សមាជិកសភាក្នុងបញ្ជីជើងចាស់ដែលត្រូវបានគេស្គាល់សម្រាប់ជំហរប្រជាធិបតេយ្យរបស់គាត់ និង​លោក Julapun Amornvivat សមាជិកសភាមកពីខេត្ត Chiang Mai ត្រូវបានគេមើលឃើញថាតំណាង​ឲ្យ​ក្មេងជំនាន់ក្រោយរបស់គណបក្ស និងជាសម្ព័ន្ធមិត្តជិតស្និទ្ធរបស់លោកស្រីផែថងថាន។ ក្រោយ​មក​ ឈ្មោះពីរបន្ថែមទៀតត្រូវបានអណ្តែត​ឡើង គឺលោក Cholnan Srikaew សមាជិកសភាមកពីក្រុង Nan និង​ជា​អតីតប្រធានគណបក្ស ដែលបានដើរតួយ៉ាងសំខាន់ក្នុងការបោះឆ្នោតចុងក្រោយ និង​លោក​ Sutin Klungsang សមាជិកសភាក្នុងបញ្ជីដែលត្រូវបានគេស្គាល់ថាមានជំនាញជជែកដេញដោលយ៉ាងមុតស្រួច។ នេះ​បើ​តាម​ការ​ចុះ​ផ្សាយ​របស់​កាសែត​​បាងកក​ប៉ុស្តិ៍។

កន្លង​មក លោក Suriya Jungrungreangkit ដែលជានាយកផ្នែកបោះឆ្នោតរបស់គណបក្សភឿថៃ បានចេញមកបញ្ជាក់យ៉ាងច្បាស់ថា មេបក្សថ្មីគឺមិនមែនជាអ្នកដែលពាក់ព័ន្ធជាមួយគ្រួសារត្រកូលស៊ីណាវ៉ាត្រនោះទេ ទោះលោកថាក់ស៊ីនគឺជាស្ថាបនិករបស់គណបក្សនេះ តាំងពីពេលដែលបក្សមានឈ្មោះថា ថៃរ៉ាក់ថៃ មកម្ល៉េះ៕

ដោយ៖ ឈាង​