ភឿថៃ មិនយកអ្នកមកពីគ្រួសារត្រកូល ស៊ីណាវ៉ាត្រ ធ្វើជាមេបក្សថ្មីទេ

បន្ទាប់ពីលោកស្រី ផែថងថាន ស៊ីណាវ៉ាត្រ ប្រកាសលាលែងតំណែងជាមេបក្សភឿថៃ កាលពីថ្ងៃពុធទី២២ខែតុលាឆ្នាំ២០២៥ លោក Suriya Jungrungreangkit ដែលជានាយកផ្នែកបោះឆ្នោតរបស់គណបក្សនេះបានចេញមកបញ្ជាក់យ៉ាងច្បាស់ថា មេបក្សថ្មីគឺមិនមែនជាអ្នកដែលពាក់ព័ន្ធជាមួយគ្រួសារត្រកូលស៊ីណាវ៉ាត្រនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងចេញពីទីស្នាក់ការបក្សក្នុងទីក្រុងបាងកក លោក Suriya និយាយថា គណបក្សភឿថៃ មានទំនាក់ទំនងយ៉ាងជ្រាលជ្រៅជាមួយត្រកូល ស៊ីណាវ៉ាត្រ។ ជាក់ស្តែង លោក ថាក់ស៊ីន គឺជាស្ថាបនិករបស់គណបក្សនេះ តាំងពីពេលដែលបក្សមានឈ្មោះថា ថៃរ៉ាក់ថៃ មកម្ល៉េះ។

ទោះបីជាយ៉ាងណាក៏ដោយ លោកបន្តថា៖ «អ្វីៗគ្រប់យ៉ាងបានផ្លាស់ប្តូរ គណបក្សនឹងស្វែងរកបុគ្គលម្នាក់ដែលមិនពាក់ព័ន្ធជាមួយក្រុមគ្រួសារនោះ។ បុគ្គលនោះគឺជាសមាជិកបក្ស ប៉ុន្តែមិនមែនជាអ្នកមកពី ត្រកូលស៊ីណាវ៉ាត្រទេ»។

សូមជម្រាបជាថ្មី លោកស្រី ផែថងថាន បានប្រកាសលាងលែង​ជាមេបក្សភឿថៃ ដើម្បី​បើ​ក​ផ្លូវ​ឲ្យ​មាន​ការ​​រៀប​ចំ​​រចនាសម្ព័ន្ធ​ថ្មី​ សម្រាប់ការ​បោះឆ្នោត​​​​សកល​​នៅដើម​ឆ្នាំ​២០២៦​។

​​ទោះលោកស្រីមានឈ្មោះជាមេបក្ស ប៉ុន្តែ​​ការ​ដឹកនាំ​គណបក្ស​ពិត​ប្រាកដ​ត្រូវគេជឿថា ​ស្ថិតក្រោម​ការ​ចង្អុល​​បង្ហាញ និង​ការរៀបចំ​​ពី​លោក​ថាក់ស៊ីន ដែល​ជាឪពុក។ បច្ចុប្បន្ន លោកថាក់ស៊ីន ត្រូវ​ជាប់ពន្ធនាគារ​​​រយៈពេល​១ឆ្នាំ បន្ទាប់ពី​តុលាការ​ព្រហ្មទណ្ឌ​​សម្រេច​ឲ្យ​អនុវត្តទោស​ ក្រោយ​ពី​ការលើក​លែង​របស់​មហាក្សត្រ​ថៃ៕

អត្ថបទ៖ សុខ សុវណ្ណ

ចុចអាន៖ អ្នកនយោបាយជើងចាស់ ​​​Chusak Sirinil ដឹកនាំ​បក្ស​​ភឿថៃ​​​បណ្តោះអាសន្ន​​