ព័ត៌មានអន្ដរជាតិ

ចិនកាត់ទោសប្រហារជីវិតមនុស្ស៥នាក់ ពាក់ព័ន្ធនឹងScamនៅមីយ៉ាន់ម៉ា

បានផុស

៧ ខែ មុន

នៅ

ថ្ងៃពុធ ៥ វិច្ឆិកា ២០២៥

ដោយ

Chheang

តុលាការចិនកាលពីថ្ងៃអង្គារទី៤វិច្ឆិកា បានកាត់ទោសប្រហារជីវិតលោក Bai Suocheng ដែលជាបងធំឧក្រិដ្ឋកម្ម Kokang ដ៏ល្បីល្បាញមកពីភាគខាងជើងប្រទេសមីយ៉ាន់ម៉ា ពីបទដឹកនាំបណ្តាញឧក្រិដ្ឋកម្មដ៏ធំមួយពាក់ព័ន្ធនឹងការឆបោកតាមអនឡាញ(Scam) ល្បែងស៊ីសង និងការជួញដូរគ្រឿងញៀនដែលបណ្តាលឲ្យពលរដ្ឋចិនស្លាប់៦នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តុលាការស្រុក Shenzhen ក្នុងខេត្ត Guangdong បានកាត់ទោសប្រហារជីវិតលោក Bai កូនប្រុសរបស់គាត់ Bai Yingcang និងសហការីជាន់ខ្ពស់បីនាក់។ សារព័ត៍មានស៊ីនហួររាយការណ៍ថា ជនជាប់ចោទ១៦នាក់ផ្សេងទៀត ដែលជាប់ពាក់ព័ន្ធនឹងក្រុមគ្រួសារ Bai ក៏ត្រូវជាប់ពន្ធនាគារផងដែរ។

ពីរនាក់ក្នុងចំណោមអ្នកទាំងនោះត្រូវបានកាត់ទោសប្រហារជីវិតតែត្រូវព្យួរទោសរយៈពេល២ឆ្នាំ ខណៈមនុស្ស៥នាក់ផ្សេងទៀតត្រូវបានកាត់ទោសឲ្យជាប់ពន្ធនាគារអស់មួយជីវិត ។ ជនជាប់ចោទ៩នាក់ត្រូវបានផ្តន្ទាទោសដាក់ពន្ធនាគាររហូតដល់២០ឆ្នាំ រួមជាមួយនឹងការផាកពិន័យ ការរឹបអូសទ្រព្យសម្បត្តិ និងដីកានិរទេស។

យោងតាមសាលក្រម លោក Bai និងបណ្តាញរបស់គាត់បានធ្វើប្រតិបត្តិការបោកប្រាស់ទូរគមនាគមន៍ និងល្បែងស៊ីសងនៅក្នុងតំបន់ Kokang នៃប្រទេសមីយ៉ាន់ម៉ា ក្រោមការការពារប្រដាប់អាវុធ ដែលបណ្តាលឲ្យមានអ្នកស្លាប់ និងរបួសជាច្រើននាក់ក្នុងចំណោមជនជាតិចិន។

តុលាការបាននិយាយថា ក្រុមហ៊ុននេះបានសាងសង់បរិវេណការពារខ្លួនចំនួន៤១ទីតាំង ដើម្បីប្រតិបត្តិការក្រុមScam ដោយផ្តល់ឲ្យពួកគេនូវសន្តិសុខប្រដាប់អាវុធ។ ឧក្រិដ្ឋកម្មរបស់ពួកគេរួមមាន ការក្លែងបន្លំតាមទូរគមនាគមន៍ និងអ៊ីនធឺណិត ការបើកកាស៊ីណូខុសច្បាប់ ការចាប់ជំរិត ពេស្យាកម្ម ការផលិតនិងការជួញដូរគ្រឿងញៀន និងមនុស្ស។

ស៊ីនហួរបានរាយការណ៍បន្ថែមថា ប្រតិបត្តិការរបស់ក្រុមនេះពាក់ព័ន្ធនឹងការកេងចំណេញខុសច្បាប់ជាង២៩ពាន់លានយន់ (ស្មើនឹង៤ពាន់លានដុល្លារ) និងការផលិត និងការជួញដូរថ្នាំញៀនមេតំហ្វេតាមីនប្រហែល១១តោន។

សេចក្តីសម្រេចនេះ គឺជាការដាក់ទណ្ឌកម្មដ៏ធ្ងន់ធ្ងរបំផុតមួយនៅក្នុងការបង្រ្កាបដ៏ធំរបស់ប្រទេសចិនលើឧក្រិដ្ឋកម្មតាមអ៊ីនធឺណិតឆ្លងដែន ដែលភ្ជាប់ទៅនឹងភាគខាងជើងនៃប្រទេសមីយ៉ាន់ម៉ា។ ទីក្រុងប៉េកាំង បានដាក់សម្ពាធដល់អាជ្ញាធរក្នុងតំបន់ Kokang របស់ប្រទេសមីយ៉ាន់ម៉ា ដែលជាជម្រករបស់ក្រុមប្រដាប់អាវុធដ៏មានអំណាច ឲ្យប្រគល់ជនសង្ស័យសំខាន់ៗដែលត្រូវបានចោទប្រកាន់ពីបទធ្វើបាបពលរដ្ឋចិន។

ការកាត់ក្តីលើគ្រួសារ Bai បានចាប់ផ្តើមនៅក្នុងខែកញ្ញា បន្ទាប់ពីពួកគេត្រូវបានគេចាប់ខ្លួន និងធ្វើបត្យាប័នទៅកាន់ប្រទេសចិនកាលពីដើមឆ្នាំនេះ៕

ដោយ៖ ឈាង