មន្ត្រីនគរបាលអត្តសញ្ញាណកម្មម្នាក់ ជិះម៉ូតូបុកបង្កាន់ដៃស្ពានធ្លាក់ចូលទឹកស្លាប់

មន្ត្រីនគរបាលអត្តសញ្ញាណកម្មម្នាក់បានស្លាប់ ខណ:ជិះម៉ូតូមួយគ្រឿងទៅបុកបង្កាន់ដៃស្ពាន បណ្តាលឲ្យធ្លាក់ទាំងមនុស្ស និងម៉ូតូចូលក្នុងទឹក​ស្លាប់ភ្លាមៗ។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៨និង៥០​នាទី យប់ ថ្ងៃទី០៩ ខែវិច្ឆិកា ឆ្នាំ២០២៥ ស្ថិតនៅតាមបណ្តោយផ្លូវ៣៦៩ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

ជនរងគ្រោះមានឈ្មោះ ថោង រតនា ភេទប្រុស អាយុ៤១ឆ្នាំ មុខរបរមន្ត្រីនគរបាល ផ្នែកអត្តសញ្ញាណកម្ម ឋានន្តរស័កិ្ត ៤កន្លះ ស្នាក់នៅម្តុំវត្តកំសាន្ត ភូមិតាង៉ូវក្រោម សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

យោងតាមប្រភពព័ត៍មានពីប្រជាពលរដ្ឋបានប្រាប់អោយដឹងថា មុនកើតហេតុគេបានឮសំឡេងដូចផ្ទុះកង់ឡាន ក៏ផ្អើលឆោឡោនាំគ្នារត់ចេញពីក្នុងផ្ទះមកមើលក៏ប្រទះឃើញម៉ូតូមួយគ្រឿងម៉ាក YAMAHA PG-1 ពាក់ស្លាកលេខ ភ្នំពេញ 1LV-4563 រួមជាមួយបុរសម្នាក់ ដោយពួកគាត់មិនដឹងថា ជនរងគ្រោះគេចអ្វីនោះឡើយ ទើបបង្កអោយជិះម៉ូតូទៅបុកបង្កាន់ដៃស្ពានបណ្តាលអោយធ្លាក់ចូលក្នុងទឹកស្លាប់យ៉ាងអាណោចអាធ័មបែបនេះ។

ក្រោយពេលកេីតហេតុសមត្ថកិច្ចជំនាញចរាចរណ៍ផ្លូវគោកនៃអធិការដ្ឋានខណ្ឌច្បារអំពៅ បានចុះដល់ទីតាំងកើតហេតុ និងធ្វេីកំណត់ហេតុប្រគល់សពអោយសាច់ញាតិយកទៅធ្វេីបុណ្យតាមប្របៃណី៕

អត្ថបទ៖ រដ្ឋា