ព័ត៌មានអន្ដរជាតិ

ត្រាំជំរុញប្រធានាធិបតីអ៊ីស្រាអែលឲ្យលើកលែងទោសណេតាន់យ៉ាហ៊ូ ជុំវិញសំណុំរឿងពុករលួយ

បានផុស

៧ ខែ មុន

នៅ

ថ្ងៃព្រហស្បតិ៍ ១៣ វិច្ឆិកា ២០២៥

ដោយ

Chheang

ការិយាល័យរបស់ប្រធានាធិបតីអ៊ីស្រាអែល លោក អ៊ីសាក់ ហឺហ្សូក (Isaac Herzog) បានបញ្ជាក់កាលពីថ្ងៃពុធទី១២ខែវិច្ឆិកាថា លោកបានទទួលលិខិតពីប្រធានាធិបតីអាមេរិក លោក ដូណាល់ ត្រាំ (Donald Trump) ដែលជំរុញឲ្យលោកពិចារណាផ្តល់ការលើកលែងទោសដល់នាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកណេតាន់យ៉ាហ៊ូ ដែលស្ថិតក្រោមការជំនុំជម្រះតាំងពីឆ្នាំ២០២០ជុំវិញការចោទប្រកាន់អំពើពុករលួយ បានបដិសេធរាល់ការចោទប្រកាន់ទាំងអស់ ហើយបានអះអាងថាខ្លួនមិនមានទោសនោះទេ។

នៅក្នុងលិខិត លោកត្រាំ បានពណ៌នាអំពីសំណុំរឿងប្រឆាំងលោកណេតាន់យ៉ាហ៊ូ ថាជាករណីដែលពាក់ព័ន្ធនយោបាយ។

យោងតាមការិយាល័យរបស់លោកហឺហ្សូក លោកត្រាំ បានសរសេរថា «ខណៈដែលខ្ញុំពិតជាគោរពឯករាជ្យភាពរបស់ប្រព័ន្ធយុត្តិធម៌អ៊ីស្រាអែល ខ្ញុំជឿថាសំណុំរឿងប្រឆាំងនឹង Bibi (ឈ្មោះហៅក្រៅរបស់លោកណេតាន់យ៉ាហ៊ូ) ដែលបានតស៊ូជាមួយខ្ញុំអស់រយៈពេលជាយូរមកហើយ រួមទាំងប្រឆាំងនឹងគូប្រជែងដ៏ធំបំផុតរបស់អ៊ីស្រាអែលគឺអ៊ីរ៉ង់ផងដែរ គឺជាការចោទប្រកាន់នយោបាយដែលមិនសមហេតុផល»។

ការិយាល័យរបស់លោកហឺហ្សូក បានកត់សម្គាល់ថា រាល់សំណើសុំការលើកលែងទោសពីប្រធានាធិបតី ត្រូវតែអនុវត្តតាមនីតិវិធីផ្លូវការ។ តំណែងប្រធានាធិបតីអ៊ីស្រាអែល ទោះបីជាភាគច្រើនជាតួនាទីបែបពិធីការក្តី ប៉ុន្តែមានអំណាចក្នុងការផ្តល់ការលើកលែងទោសក្នុងករណីពិសេស។

លោកត្រាំ និងលោកណេតាន់យ៉ាហ៊ូ (រូបថត៖ Reuters)

លោកណេតាន់យ៉ាហ៊ូ ក្រោយមកបានឆ្លើយតបនៅលើបណ្ដាញសង្គម X ដោយថ្លែងអំណរគុណលោកត្រាំ ចំពោះ«ការគាំទ្រដ៏មហិមា»របស់លោក។ លោកបានសរសេរថា «ដូចរាល់ដង លោកនិយាយត្រូវ និងការពិតចាក់ចំចំណុច។ ខ្ញុំទន្ទឹងរង់ចាំបន្តភាពជាដៃគូរបស់យើងដើម្បីពង្រឹងសន្តិសុខ និងពង្រីកសន្តិភាព»។

លោកត្រាំ ធ្លាប់បានលើកឡើងពីបញ្ហានេះកាលពីខែតុលាក្នុងអំឡុងពេលទស្សនកិច្ចទៅកាន់អ៊ីស្រាអែល ដោយជំរុញលោកហឺហ្សូក ក្នុងសុន្ទរកថាទៅកាន់សភាឲ្យពិចារណាលើកលែងទោសដល់នាយករដ្ឋមន្ត្រីដែលជាប់បណ្តឹងរូបនេះ។

លោកណេតាន់យ៉ាហ៊ូ ត្រូវបានចោទប្រកាន់ក្នុងសំណុំរឿង៣ដាច់ដោយឡែកពីគ្នានៅឆ្នាំ២០១៩ រួមមានការចោទប្រកាន់ថាបានទទួលអំណោយមានតម្លៃប្រហែល១៨ម៉ឺនដុល្លារ ពីពាណិជ្ជករអ្នកមានដើម្បីជាថ្នូរនឹងអំណោយផលនយោបាយ។

អ្នកគាំទ្ររបស់លោក រួមទាំងលោកត្រាំ បានលើកឡើងថា ការជំនុំជម្រះនេះគឺជាការជំរុញដោយកត្តានយោបាយរបស់ក្រុមឆ្វេងនិយមនៅអ៊ីស្រាអែលដើម្បីទម្លាក់លោកណេតាន់យ៉ាហ៊ូចេញពីអំណាច។

ការជំនុំជម្រះនេះកំពុងបន្ត ហើយមិនទាន់មានសាលក្រមណាមួយត្រូវបានសម្រេចនៅឡើយទេ៕

ប្រែសម្រួល៖ ឈាង