នគរបាលបន្តផ្សព្វផ្សាយពីផលប៉ះពាល់គ្រឿងញៀនក្មេងទំនើងនិងច្បាប់ចរាចរណ៍ដល់សិស្សវិទ្យាល័យបាក់ទូក

កម្លាំងនគរបាលជំនាញមូលដ្ឋានខណ្ឌ៧មករា បន្តការចុះអប់រំនិងផ្សព្វផ្សាយពីផលប៉ះពាល់បញ្ហាគ្រឿងញៀន បញ្ហាក្មេងទំនើងនិងច្បាប់ចរាចរណ៍ ដល់សិស្សានុសិស្សវិទ្យាល័យបាក់ទូក ក្នុងខណ្ឌ៧មករា រាជធានីភ្នំពេញ នៅថ្ងៃទី០៨ ខែធ្នូ ឆ្នាំ២០២៥នេះ។

លោកវរសេនីយទោ តួ ស៊ីវ៉ាន់ធឿន អធិការរងទទួលផែនជំនាញ បានឲ្យដឹងថាការបន្តចុះអប់រំផ្សព្វផ្សាយនេះធ្វើឡើងដោយអនុវត្តតាមបទបញ្ជាររបស់ ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និង ជាស្នងការនគរបាលរាជធានីភ្នំពេញ ដោយមានការចង្អុលបង្ហាញពីលោកវរសេនីយ៍ឯក ជុន ប៊ុនណាន អធិការនគរបាលខណ្ឌ៧មករា ដែលឲ្យនគរបាលជំនាញ បន្តចុះផ្សព្វផ្សាយឲ្យបានខ្លាំងក្លា បន្ថែមលើកិច្ចការងារបង្ក្រាបរបស់ខ្លួន។

ក្នុងនោះបើតាមលោកវរសេនីយ៍ទោទឹមវុទ្ធីអធិការរងផែនការងារចរាចរណ៍ខណ្ឌក៏បានបញ្ជ្រាបនូវច្បាប់ចរាចរណ៍មួយចំនួនធំជូនដល់ក្មួយៗឲ្យបានដឹងនិងចូលរួមគោរពច្បាប់ទាំងអស់គ្នា។ ទោះបីបច្ចុប្បន្ននគរបាលមានវិធានការចុះផ្សព្វផ្សាយតាមរយះអប់រំ មិនមានការផាកពិន័យជាទឹកប្រាក់ ក៏ដោយ សូមឲ្យបងប្អូនប្រជាពលរដ្ឋ ក៏ដូចជាសិស្សានុសិស្ស ចូលរួមគោរពច្បាប់ និងកុំខ្លាចប៉ូលីសចរាចរណ៍។

សិស្សានុសិស្សយល់ឃើញថាពួកគាត់បានយល់ជ្រាបកាន់តែច្បាស់ពីចំណុចដែលពួកគាត់ពុំសូវបានដឹងលើប្រធានបទសំខាន់ទាំង០៣ខាងលើបន្ទាប់ពីបានចូលរួមក្នុងការស្តាប់ការពន្យល់ណែនាំរបស់នគរបាលជំនាញនៅថ្ងៃនេះ។ ហើយនឹងចូលរួមគោរពច្បាប់ទម្លាប់ធ្វើខ្លួនឲ្យជាសិស្សល្អជាពលរដ្ឋល្អនិងខំអភិវឌ្ឍន៍ខ្លួនឲ្យកាន់តែខ្លាំងដើម្បីជាសសរទ្រូងរឹងមាំរបស់ប្រទេសជាតិ។

សូមបញ្ជាក់កម្លាំងនគរបាលជំនាញនៃរាជធានីភ្នំពេញតែងតែបង្កើតវេទិកាដើម្បីចុះផ្សព្វផ្សាយអប់រំជាប្រចាំទាំងនៅសាលារៀនវិទ្យាល័យក៏ដូចជាភូមិឋានរស់នៅរបស់បងប្អូនប្រជាពលរដ្ឋលើបញ្ហាគ្រឿងញៀនពិសេសបញ្ហាក្រុមក្មេងទំនើងដែលជាប្រធានបទក្តៅនិងសំខាន់ដែលចាំបាច់ត្រូវទប់ស្កាត់កុំឲ្យមានការរីករាលដាលកាន់តែខ្លាំងក្នុងសង្គមជាតិ៕

អត្ថបទ៖សុភា