ព័ត៌មានជាតិ

ក្រុងកំពង់ចាមនឹងលែងលិចលង់ ក្រោយប្រព័ន្ធលូស្ថាបនាបញ្ចប់ទាំងស្រុងនៅពេលខាងមុខ

បានផុស

៦ ខែ មុន

នៅ

ថ្ងៃពុធ ៣១ ធ្នូ ២០២៥

ដោយ

ដំណើរការសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្នុងក្រុងកំពង់ចាម គ្រោងបញ្ចប់នៅពាក់កណ្តាលឆ្នាំ ២០២៦ ខណៈវឌ្ឍនភាពមកដល់ពេលនេះសម្រេចបានប្រមាណជាង ៨០,០៧% នៃគម្រោង។ នេះបើតាមការឲ្យដឹងពីលោក ជុំ លីនដា ប្រធានវិស្វករនៃក្រុមហ៊ុនប៉ៃជីងអឺប៊េនខន់ស្ត្រាក់សិនគ្រុបខូអិលធីឌី (BUCG)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជុំ លីនដា ប្រធានវិស្វករនៃក្រុមហ៊ុនប៉ៃជីងអឺប៊េនខន់ស្ត្រាក់សិនគ្រុប បានបង្ហាញពីលទ្ធផលការងារដែលបានអនុវត្តរួចរាល់ និងកំពុងបន្តរួមមាន៖

-ការងារប្រព័ន្ធរំដោះទឹកភ្លៀងក្នុងក្រុងបានបញ្ចប់ ១០០%
-ការងារស្ថានីយបូមរំដោះទឹកភ្លៀងទឹកជំនន់ក្នុងក្រុងបានបញ្ចប់ ១០០%
-ការងារសាងសង់ស្ថានីយបូមបឋមទី១ ទី២ និងស្ថានីយមេគឺបានបញ្ចប់ ១០០%
-ការសាងសង់ស្ថានីយប្រព្រឹត្តកម្មទឹកកខ្វក់ទាំងមូលបានបញ្ចប់ ២០%
-ការងារដំឡើងបំពង់ទុយោទឹកស្អុយទាំងបីប្រភេទបានបញ្ចប់ចំនួន ៦២ គីឡូម៉ែត្រ
-ការងារជួសជុលផ្លូវកៅស៊ូ AC បានចំនួនចំនួន ២៧ គីឡូម៉ែត្រ

បើតាមប្រធានវិស្វករនៃក្រុមហ៊ុនប៉ៃជីងអឺប៊េនខន់ស្ត្រាក់សិនគ្រុប គម្រោងការងារទាំងមូលគ្រោងនឹងបញ្ចប់ទាំងស្រុងតាមកុងត្រានៃកិច្ចសន្យានៅថ្ងៃទី ៣១ ខែឧសភា ឆ្នាំ២០២៦ ខាងមុខ។

ខណៈដឹកនាំមន្ទីរសាធារណការ និងដឹកជញ្ជូន និងមន្ត្រីពាក់ព័ន្ធចុះពិនិត្យដំណើរការសាងសង់កាលពីម្សិលមិញនេះ លោក អ៊ុន ចាន់ដា អភិបាលខេត្តកំពង់ចាមរំពឹងទុកថា នៅពេលគម្រោងបញ្ចប់ជាស្ថាពរ ក្រុងកំពង់ចាមនឹងមិនមានការលិចលង់ដោយសារកត្តាទឹកភ្លៀងទៀតនោះទេ។ ជាមួយគ្នានេះ ទឹកកខ្វក់នៅក្នុងក្រុងកំពង់ចាមទាំងមូលក៏នឹងត្រូវបានគ្រប់គ្រង ដោយមិនឲ្យហូរពាសវាលពាសកាលចូលទៅក្នុងទន្លេទៀតដែរ ពោលគឺត្រូវហូរចូលទៅក្នុងអាងប្រព្រឹត្តកម្មជាមុនសិន មុននឹងបង្ហូរទៅកាន់ប្រភពទឹកធម្មជាតិ។

គម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងកំពង់ចាម ជាគម្រោងអភិវឌ្ឍន៍ក្រុងរបៀងមហាអនុតំបន់ទន្លេមគង្គជំហានទី៤ អនុវត្តដោយក្រសួងសាធារណការ និងដឹកជញ្ជូន ក្រោមកម្ចីហិរញ្ញប្បទានសម្បទានរបស់ធនាគារអភិវឌ្ឍអាស៊ី ADB ដែលអនុវត្តដោយក្រុមហ៊ុន ប៉េកាំង អឺបឺន ខនស្ត្រាក់សិនគ្រុប ខូអិលធីឌី Beijing Urban Constructions Group ដែលមានទំហំទឹកប្រាក់ក្នុងកិច្ចសន្យាប្រមាណជាង ២២លានដុល្លារអាមេរិក។

ផ្អែកតាមកិច្ចសន្យា គម្រោងនេះអនុវត្តការសាងសង់រយៈពេល ៣៦ ខែ ឬបីឆ្នាំ ដោយចាប់អនុវត្តពីខែធ្នូ ឆ្នាំ២០២២ រហូតដល់បំណាច់ខែឧសភា ២០២៦៕