ត្រាំ ប្រាប់ឲ្យគុយបា ឆាប់ធ្វើកិច្ចព្រមព្រៀងជាមួយអាមេរិក ប្រយ័ត្នហួសពេល

ពិភពលោកកំពុងតាមដានខ្លាំងចំពោះមហិច្ឆតារបស់ប្រធានាធិបតីអាមេរិក ដូណាល់ ត្រាំ បន្ទាប់ពីលោកវាយប្រហារប្រទេសវ៉េណេស៊ុយអេឡា។ មេដឹកនាំមហាអំណាចផុតលេខមួយនេះ បានបង្ហើបពីគោលដៅជាច្រើន ដែលអាចបើកប្រតិបត្តិការបន្ទាប់ដូចជាប្រទេសកូឡុំប៊ី គុយបា ម៉ិកស៊ិក និងកោះ Greenland ជាដើម។

ពាក់ព័ន្ធគុយបា លោកត្រាំ បានព្រមានឲ្យប្រទេសនេះ ឆាប់ធ្វើកិច្ចព្រមព្រៀងជាមួយអាមេរិក ប្រយ័ត្នហួសពេល ដ្បិតលោកមិនបញ្ជាក់ថាតើកិច្ចព្រមព្រៀងនោះជាអ្វីក៏ដោយ។

បង្ហោះសារលើបណ្តាញសង្គម Truth Social កាលពីថ្ងៃអាទិត្យទី១១ខែមករាឆ្នាំ២០២៦ ប្រមុខសេតវិមានសរសេរថា៖ «អស់រយៈពេលជាច្រើនឆ្នាំមកហើយ ដែលគុយបា រស់ដោយសារវ៉េណេស៊ុយអេឡា ផ្ដល់ប្រេងនិងទឹកប្រាក់ ឲ្យយ៉ាងច្រើនសន្ធឹកសន្ធាប់។ ជាការដោះដូរ គុយបាបានផ្ដល់សេវាសន្តិសុខដល់មេដឹកនាំផ្ដាច់ការវ៉េណេស៊ុយអេឡាពីររូបចុងក្រោយវិញ ប៉ុន្តែចាប់ពីពេលនេះទៅ នឹងមិនមានរឿងបែបនេះកើតឡើងទៀតឡើយ!។ នឹងមិនមានលំហូរប្រេងឬទឹកប្រាក់ ចូលទៅក្នុងប្រទេសគុយបាទៀតទេ — គឺសូន្យតែម្ដង! ខ្ញុំសូមណែនាំឲ្យពួកគេធ្វើកិច្ចព្រមព្រៀងឲ្យហើយទៅ មុនពេលអ្វីៗហួសពេល»។

យ៉ាងណា រដ្ឋមន្ត្រីការបរទេសគុយបា Bruno Rodriguez អះអាងថា ប្រទេសដីកោះក្នុងតំបន់ការ៉ាប៊ីនមួយនេះ មានសិទ្ធិក្នុងការនាំចូលប្រេងឥន្ធនៈពីអ្នកនាំចេញណាដែលស្ម័គ្រចិត្ត ដោយគ្មានការជ្រៀតជ្រែកឬការចុះចូលចំពោះវិធានការបង្ខិតបង្ខំឯកតោភាគីរបស់សហរដ្ឋអាមេរិកឡើយ។

លោកបន្ថែមថា គុយបាមិនដូចសហរដ្ឋអាមេរិកទេ ពោលគឺគុយបាមិនយកខ្លួនទៅពាក់ព័ន្ធនឹងការគំរាមកំហែង ឬការបង្ខិតបង្ខំផ្នែកយោធាប្រឆាំងនឹងរដ្ឋដទៃឡើយ។

កាលពីសប្តាហ៍មុន ប្រធានាធិបតីអាមេរិក ដូណាល់ ត្រាំ បានបញ្ជាក់យ៉ាងច្បាស់ថា គុយបា មិនអាចរស់បានទេ បើគ្មានប្រេងរបស់វ៉េណេស៊ុយអេឡា។

ទំនាក់ទំនងរវាងគុយបានិងវ៉េណេស៊ុយអេឡា មិនមែនគ្រាន់តែជាមិត្តភាពនយោបាយធម្មតានោះទេ ប៉ុន្តែវាគឺជាការពឹងផ្អែកគ្នាទៅវិញទៅមក ជាពិសេសលើផ្នែកថាមពលនិងសេដ្ឋកិច្ច។ ក្រោមកិច្ចព្រមព្រៀងការ៉ាកាសតាំងពីសម័យលោក ហ៊ូហ្គោ ឆាវេស, វ៉េណេស៊ុយអេឡាបានផ្គត់ផ្គង់ប្រេងឲ្យគុយបា ចន្លោះពី ៥០ ០០០ ដល់ ១០០ ០០០ បារ៉ែលក្នុងមួយថ្ងៃ៕

អត្ថបទ៖ សុខ សុវណ្ណ