ព័ត៌មានអន្ដរជាតិ

រដ្ឋជាសមាជិករបស់ UN ជាង៨០ ថ្កោលទោសអ៊ីស្រាអែល ពង្រីកការគ្រប់គ្រងលើតំបន់ West Bank

បានផុស

៣ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

រដ្ឋជាសមាជិករបស់អង្គការសហប្រជាជាតិជាង ៨០ បានថ្កោលទោសផែនការអ៊ីស្រាអែល ដែលពង្រីកការគ្រប់គ្រងលើតំបន់ West Bank ដើម្បីកាន់កាប់ និងទាមទារយកទឹកដីប៉ាឡេស្ទីនធ្វើជាទ្រព្យសម្បត្តិរដ្ឋរបស់ខ្លួន។ នេះបើយោងតាមការចុះផ្សាយរបស់ Al Jazeera នៅថ្ងៃទី១៨ ខែកុម្ភៈ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Riyad Mansour ឯកអគ្គរដ្ឋទូតប៉ាឡេស្ទីនប្រចាំអង្គការសហប្រជាជាតិបានលើកឡើងកាលពីថ្ងៃអង្គារថា៖ « យើងថ្កោលទោសយ៉ាងខ្លាំងចំពោះការសម្រេចចិត្ត និងវិធានការឯកតោភាគីរបស់អ៊ីស្រាអែល ដែលមានគោលបំណងពង្រីកខ្លួនខុសច្បាប់ក្នុងតំបន់ West Bank»។ ដោយលោកថ្លែងទៅកាន់សម្ព័ន្ធមិត្តនៃរដ្ឋជាសមាជិកចំនួន ៨៥ និងមានអង្គការអន្តរជាតិមួយចំនួនផងដែរ។

លោក Mansour បានបន្តថា៖ « ការសម្រេចចិត្តបែបនេះគឺផ្ទុយនឹងកាតព្វកិច្ចរបស់អ៊ីស្រាអែលក្រោមច្បាប់អន្តរជាតិ ហើយត្រូវតែបញ្ឈប់សកម្មភាពនេះភ្លាមៗ។ យើងប្រឆាំងដាច់ខាត គ្រប់ទម្រង់ណាមួយនៃការគ្រប់គ្រងទឹកដីនេះ»។

លោកបន្ថែមថា៖ «យើងសូមបញ្ជាក់ជាថ្មីនូវការបដិសេធរបស់យើងចំពោះវិធានការទាំងអស់ ដែលមានគោលបំណងផ្លាស់ប្តូរសមាសភាពប្រជាសាស្ត្រ លក្ខណៈ និងទ្រង់ទ្រាយនៃទឹកដីប៉ាឡេស្ទីនតាំងពីឆ្នាំ ១៩៦៧ រួមទាំងតំបន់យេរូសាឡឹម(East Jerusalem)ខាងកើតផងដែរ»។

លោកសង្កត់ធ្ងន់ថា៖ «វិធានការបែបនេះ គឺជាការរំលោភច្បាប់អន្តរជាតិ ធ្វើឱ្យខូចដល់កិច្ចខិតខំប្រឹងប្រែងដែលកំពុងបន្តសម្រាប់សន្តិភាព និងស្ថិរភាពនៅក្នុងតំបន់ ផ្ទុយនឹងផែនការក្នុងតំបន់ ធ្វើឱ្យប៉ះពាល់ដល់លទ្ធភាពនៃការឈានដល់កិច្ចព្រមព្រៀងសន្តិភាពដើម្បីបញ្ចប់ជម្លោះ»។

គួរឱ្យដឹងថា ផែនការដើម្បីបញ្ចប់ជម្លោះក្នុងតំបន់ហ្គាហ្សា គឺជាកិច្ចព្រមព្រៀងក្នុងខែវិច្ឆិកា រវាងអ៊ីស្រាអែលនិងហាម៉ាស ក្នុងការបញ្ចប់សង្គ្រាមប្រល័យពូជសាសន៍។

អគ្គលេខាធិការអង្គការសហប្រជាជាតិ(UN) លោក Antonio Guterres កាលពីដើមសប្តាហ៍បានព្រមានថា៖ « ផែនការចុះបញ្ជីដីធ្លីរបស់អ៊ីស្រាអែលអាចនាំទៅរកការដកហូតទ្រព្យសម្បត្តិរបស់ប្រជាជនប៉ាឡេស្ទីន និងប្រឈមនឹងការពង្រីកការគ្រប់គ្រងរបស់អ៊ីស្រាអែលក្នុងតំបន់នោះ»។

លោក Guterres បានបន្តថា៖ « ដំណើរការនេះអាចនាំឱ្យមានអស្ថិរភាពនិងខុសច្បាប់»។ ដោយលោកលើកឡើងពីសេចក្តីសម្រេចដ៏សំខាន់មួយក្នុងឆ្នាំ ២០២៤ ដោយតុលាការយុត្តិធម៌អន្តរជាតិ (ICJ) បញ្ជាក់ថា ការកាន់កាប់របស់អ៊ីស្រាអែលនៅតំបន់ West Bank និង Gaza គឺខុសច្បាប់ ហើយត្រូវតែបញ្ចប់។

គួរបញ្ជាក់ថា តុលាការយុត្តិធម៌អន្តរជាតិ (ICJ) បានលើកឡើងក្នុងសេចក្តីសម្រេចថា៖ « ការរំលោភ និងប្រើអំណាចកាន់កាប់របស់អ៊ីស្រាអែលមានវត្តមាននៅក្នុងទឹកដីប៉ាឡេស្ទីនគឺខុសច្បាប់»។

សេចក្តីសម្រេចបន្ថែមថា៖ « ការតាំងទីលំនៅរបស់អ៊ីស្រាអែលនៅតំបន់ West Bank និង East Jerusalem ព្រមទាំងរបបដែលជាប់ពាក់ព័ន្ធផ្សេងទៀតដែលបានបង្កើតឡើង កំពុងរំលោភលើច្បាប់អន្តរជាតិ»៕

ប្រែសម្រួល៖ ណឺ មិនា