ព័ត៌មានអន្ដរជាតិ

មន្រ្តីជាន់ខ្ពស់នៃក្រុមប្រឹក្សាសន្តិភាព អះអាងថា គ្មានវឌ្ឍនភាពស្តារឡើងវិញនៅតំបន់ហ្គាហ្សា

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

សង្គ្រាមដែលអ៊ីស្រាអែល បានផ្តើមនៅហ្គាហ្សាបានចាប់ផ្តើមនៅថ្ងៃទី០៧ ខែតុលា ឆ្នាំ២០២៣ បន្ទាប់ពីក្រុមហាម៉ាសបានបើកការវាយប្រហារទ្រង់ទ្រាយធំលើអ៊ីស្រាអែល។ តាំងពីនោះមកអ៊ីស្រាអែលបានប្រកាសសង្គ្រាមនៅថ្ងៃបន្ទាប់ ហើយជម្លោះបន្តរហូតដល់ឆ្នាំ២០២៤-២៥ ដល់ឆ្នាំ២០២៦ ជាមួយនឹងការវាយប្រហារតាមអាកាសម្តងហើយម្តងទៀត។

មន្ត្រីជាន់ខ្ពស់ម្នាក់នៃក្រុមប្រឹក្សាសន្តិភាព (Board Of Peace) ដែលផ្តួចផ្តើមឡើងដោយប្រធានាធិបតីសហរដ្ឋអាមេរិក ដូណាល់ ត្រាំ លើកឡើងថា មិនទាន់ឃើញមានការស្តារឡើងវិញក្នុងតំបន់ហ្គាហ្សានោះទេ ទោះបីជាមានវឌ្ឍនភាពខ្លះក្រោមកិច្ចព្រមព្រៀងឈប់បាញ់ក៏ដោយ។

លោក Nickolay Mladenov អ្នកតំណាងនាំមុខគេរបស់ក្រុមប្រឹក្សាសន្តិភាពសម្រាប់តំបន់ហ្គាហ្សា ប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃព្រហស្បតិ៍ថា ការបំផ្លិចបំផ្លាញទ្រង់ទ្រាយធំ ការផ្លាស់ទីលំនៅ និងបញ្ហាប្រឈមផ្នែកមនុស្សធម៌នៅតែបន្តកំណត់លក្ខខណ្ឌក្នុងតំបន់នៅឡើយ។ នេះបើយោងតាមទីភ្នាក់ងារសារព័ត៌មានតួកគី Anadolu ផ្សាយថ្ងៃទី២១ ខែឧសភា ឆ្នាំ២០២៦ ។

តំបន់ហ្គាហ្សាក្រោយរងការវាយប្រហាររបស់អ៊ីស្រាអែល។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា៖ « ពេលខ្ញុំបង្ហាញខ្លួនចុងក្រោយនៅអង្គប្រជុំមុនៗ ក្របខ័ណ្ឌសម្រាប់ការរំសាយអាវុធនៅហ្គាហ្សាត្រូវបានព្រមព្រៀងគ្នាក្នុងចំណោមអ្នកធានា បង្ហាញដល់ភាគីនានា ហើយខ្ញុំប្រាប់ពួកគេថា ដំណើរការនៅតំបន់ហ្គាហ្សាគឺធ្ងន់ធ្ងរ»។

លោកបន្ថែមថា៖ « ចំនួនមនុស្សទទួលបានជំនួយស្បៀងអាហារបានកើនឡើងពី ៤០០ ០០០ នាក់ ដល់ជាង ២លាននាក់។ សន្តិភាពនិងកិច្ចសហប្រតិបត្តិការមិនកើតឡើងដោយឯកឯងទេ វាទាមទារការខិតខំប្រឹងប្រែងដោយចេតនា ការចរចានិងការប្តេជ្ញាចិត្តពីគ្រប់ភាគីទាំងអស់។ ទោះបីជាមានវឌ្ឍនភាពក៏ដោយ ក៏វានៅផុយស្រួយដែរ។ ប្រសិនបើភាគីទាំងពីរមិនប្រឹងប្រែងបន្តសន្តិភាព នោះស្ថានភាពអាចនឹងធ្លាក់ចូលទៅក្នុងជម្លោះវិញយ៉ាងងាយ»។

ដោយព្រមានកុំឱ្យពិពណ៌នាអំពីស្ថានភាពនោះងើបឡើងវិញ លោក Mladenov និយាយថា៖ « ខ្ញុំមិនឈរចំពោះមុខក្រុមប្រឹក្សាទេ ទាល់តែមានការស្តារឡើងវិញ។ បញ្ហានៅហ្គាហ្សាអាចឈានទៅមុខ ប៉ុន្តែកុំច្រឡំថានេះជាការងើបឡើងវិញពេញលេញ។ យើងមិនទាន់ដល់ចំណុចនោះនៅឡើយទេ»។

លោកពិពណ៌នាពីទំហំនៃការបំផ្លិចបំផ្លាញថាមិនធ្លាប់មានពីមុនមក ព្រោះដួលរលំហេដ្ឋារចនាសម្ព័ន្ធយ៉ាងច្រើននៅទូទាំងតំបន់នោះ។

លោកសង្កត់ធ្ងន់ថា៖ « កម្ទេចកម្ទីជិត ៧០លានតោនស្ថិតនៅកន្លែងដែលផ្ទះសម្បែង សាលារៀន និងមន្ទីរពេទ្យធ្លាប់ឈរ ភាគច្រើនលាយឡំជាមួយគ្រាប់រំសេវមិនទាន់ផ្ទុះ។ មនុស្សជាងមួយលាននាក់នៅតែគ្មានជម្រកអចិន្ត្រៃយ៍ ហើយកំពុងរស់នៅក្នុងតង់ឬអគារដែលខូចខាត»៕

សម្រួល៖ ណឺ មិនា