ព័ត៌មានអន្ដរជាតិ

សកម្មជន ៤៣០នាក់ នៅលើនាវាដឹកជំនួយទៅតំបន់ហ្គាហ្សា ត្រូវបានបញ្ជូនទៅអ៊ីស្រាអែលហើយ

បានផុស

២ ខែ មុន

នៅ

ថ្ងៃពុធ ២០ ឧសភា ២០២៦

ដោយ

អាជ្ញាធរអ៊ីស្រាអែល បានអះអាងថា នាវា៥០គ្រឿងដឹកសកម្មជន ៤៣០នាក់ មកពី ៤៤ប្រទេស រួមដំណើរដឹកជំនួយអន្តរជាតិ ដោយ នាវា Global Sumud Flotilla ដែលមានគោលបំណងធ្វើដំណើរទៅកាន់តំបន់ហ្គាហ្សា កំពុងត្រូវបាននាំខ្លួនទៅប្រទេសអ៊ីស្រាអែល បន្ទាប់ប្រទេសនេះបានស្ទាក់ចាប់នាវាទាំងនោះក្នុងសមុទ្រ។

យោងតាមភ្នាក់ងារសារព័ត៌មាន AFP ផ្សាយថ្ងៃទី២០ ខែឧសភា ឆ្នាំ២០២៦ ដោយធ្វើដំណើរពីប្រទេសតួកគីកាលពីសប្តាហ៍មុន នាវា Global Sumud Flotilla គឺជាការធ្វើដំណើរចុងក្រោយបំផុតក្នុងចំណោមការសម្រេចចិត្តបន្តបន្ទាប់របស់សកម្មជន ដើម្បីទម្លុះការបិទផ្លូវរបស់អ៊ីស្រាអែលចូលទឹកដីប៉ាឡេស្ទីន ដោយក្បួននាវាទាំងនោះកាលពីខែមុន ត្រូវបានស្ទាក់ចាប់ដោយកងកម្លាំងអ៊ីស្រាអែលជាបន្តបន្ទាប់។

កងទ័ពជើងទឹកអ៊ីស្រាអែលកំពុងធ្វើសកម្មភាពលើនាវាដឹកជំនួយអន្តរជាតិ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសអ៊ីស្រាអែលលើកឡើងកាលពីយប់ថ្ងៃអង្គារថា៖ « កិច្ចខិតខំប្រឹងប្រែងបានបញ្ចប់ហើយ! នាវាទាំងនោះត្រូវបានស្ទាក់ចាប់! សកម្មជនទាំង ៤៣០នាក់ ត្រូវបានផ្ទេរទៅកាន់នាវាអ៊ីស្រាអែល ហើយកំពុងធ្វើដំណើរទៅកាន់អ៊ីស្រាអែល ជាកន្លែងដែលសកម្មជនអាចនឹងចួបជាមួយតំណាងកុងស៊ុលអ៊ីស្រាអែល»។

លោកបន្តថា៖ « កងនាវាទាំងនោះបង្ហាញខ្លួនម្តងទៀត គ្មានអ្វីក្រៅពីល្បិចទំនាក់ទំនងសាធារណៈក្នុងការបម្រើដល់ក្រុមហាម៉ាសទេ»។

មិនតែប៉ុណ្ណោះ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ថ្កោលទោសកងនាវាទាំងនោះថា៖ « វាជាគម្រោងព្យាបាទ! វារចនាឡើងដើម្បីបំបែកការបិទផ្លូវយើង នាំយកអាវុធឱ្យពួកភេរវករហាម៉ាសនៅតំបន់ហ្គាហ្សា»។

គួរបញ្ជាក់ថា នាវាប្រមាណ ៥០គ្រឿង បានចាកចេញពីភាគនិរតីនៃប្រទេសតួកគីកាលពីថ្ងៃព្រហស្បតិ៍។ គេហទំព័រតាមដានទីតាំងកងនាវាបង្ហាញថា នាវាជាច្រើនគ្រឿងត្រូវបានស្ទាក់ចាប់នៅភាគខាងលិចនៃកោះស៊ីប ប្រទេសក្រិក។

ដោយឡែក អ្នកនាំពាក្យក្រសួងការបរទេសឥណ្ឌូណេស៊ីអំពាវនាវឱ្យអ៊ីស្រាអែលដោះលែងនាវានិងសមាជិកនាវិកទាំងអស់ជាបន្ទាន់កាលពីថ្ងៃពុធ ដោយបន្ថែមថា៖ «ពលរដ្ឋឥណ្ឌូណេស៊ីចំនួន ៩នាក់ ត្រូវបានចាប់ខ្លួនដោយយោធាអ៊ីស្រាអែល»។

កាសែតឥណ្ឌូណេស៊ី Republika ឱ្យដឹងថា អ្នកកាសែតពីរនាក់របស់ខ្លួនស្ថិតក្នុងចំណោមជនជាតិឥណ្ឌូណេស៊ីទាំង៩នាក់ក្នុងចំណោមអ្នកចាប់ខ្លួន៕

សម្រួល៖ ណឺ មិនា