សេដ្ឋកិច្ច

ហាងឆេងមាសហក់ឡើងវិញដល់ជាង ៦២០០ ដុល្លារ មួយតម្លឹង

បានផុស

៤ ខែ មុន

នៅ

ថ្ងៃចន្ទ ២៣ កុម្ភៈ ២០២៦

ដោយ

តម្លៃហាងឆេងមាសបានហក់ឡើងវិញដល់ ៦២២០ ដុល្លារ ក្នុងមួយតម្លឹងនៅព្រឹកថ្ងៃចន្ទទី ២៣ ខែកុម្ភៈ ឆ្នាំ ២០២៦ នេះ បន្ទាប់ពីបានធ្លាក់ចុះក្រោម ៦ ០០០ ដុល្លារ ក្នុងមួយតម្លឹងកាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញនៅក្នុងវិស័យហិរញ្ញវត្ថុបានអះអាងថា មូលហេតុដែលធ្វើឱ្យតម្លៃហាងឆេងមាសបានកើនឡើង ដោយសារតែវិបត្តិសេដ្ឋកិច្ច, ភូមិសាស្ត្រនយោបាយ និងការប្រឈមមុខនៃសម្ពាធពន្ធរបស់សហរដ្ឋអាមេរិក។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities ប្រាប់កម្ពុជាថ្មី នៅថ្ងៃចន្ទនេះថា កំណើននៃការទិញលើតម្លៃហាងឆេងមាសពីបណ្ដាវិនិយោគិនធំៗនៅលើពិភពលោកបានធ្វើឱ្យតម្លៃមាសកើនឡើង។

ម្យ៉ាងទៀតកំណើននៃការប្ដូរប្រាក់ដុល្លារ នៅក្នុងរូបិយបណ្ណអឺរ៉ូប ហើយនិងប្រាក់យ៉េនបានធ្លាក់ចុះខ្លាំង ធ្វើឱ្យតម្លៃហាងឆេងមាសមានការកើនឡើង។

លោក ឡុង សំណាង បញ្ជាក់ថា និន្នាការតម្លៃហាងឆេងមាសអាចនឹងកើនឡើងដល់ ៧០០០ ដុល្លារ ក្នុងមួយតម្លឹងត្រឹមពាក់កណ្ដាលឆមាសទី១ ឆ្នាំ ២០២៦។ ប៉ុន្តែមុននឹងមានការកើនឡើង ហាងឆេងមាសអាចនឹងមានការធ្លាក់ចុះវិញនៅមុនពេលខែ ៦ ខាងមុខនេះ៕

អត្ថបទ៖ ឡេង ដេត