អាជ្ញាធរជាតិអប្សរា ជួសជុលផែបុរាណនៅលើទំនប់ខាងលិចរបស់បារាយណ៍យសោធរតដាក

អាជ្ញាធរជាតិអប្សរា ចំណាយពេល៦ខែ ដើម្បីជួសជុលផែ ឬកំពង់ទឹកបុរាណ ដែលមានទីតាំងស្ថិតនៅលើទំនប់ខាងលិចបារាយណ៍យសោធរតដាក ឬបារាយណ៍ខាងកើត ក្នុងគោលបំណងពង្រឹងផ្នែកខូចខាតឱ្យរឹងមាំឡើងវិញ និងលើកតម្លៃទីតាំងប្រវត្តិសាស្ត្រដ៏សំខាន់មួយនេះ។

លោក អន សុភាព បុរាណវិទូនៃអាជ្ញាធរជាតិអប្សរាឱ្យដឹងថា គម្រោងជួសជុលផែ ឬកំពង់ទឹកបុរាណនៅលើទំនប់បារាយណ៍យសោធរតដាក ជាផ្នែកមួយនៃគម្រោងរួមរបស់អាជ្ញាធរជាតិអប្សរា ក្នុងការជួសជុលរចនាសម្ព័ន្ធសំណង់បុរាណនៅតាមបណ្តោយផ្លូវចេញពីខ្លោងទ្វារជ័យនៃអតីតរាជធានីអង្គរធំ។ មុនឈានដល់ការជួសជុល ក្រុមការងារបុរាណវិទ្យា បានធ្វើកំណាយស្រាវជ្រាវពីរចនាសម្ព័ន្ធ និងសិក្សាពីស្ថានភាពនៃការខូចខាតដើម្បីវាយតម្លៃនៃវិធីសាស្រ្តជួសជុល។

កញ្ញា ដយ ពេជ្រជឺរ៉ា វិស្វករនៃអាជ្ញាធរជាតិអប្សរាឱ្យដឹងថា ផែ ឬកំពង់ទឹកនៅបារាយណ៍យសោធរតដាក មានចំនួន២ថ្នាក់ គឺថ្នាក់ទី១សាងសង់ពីថ្មបាយក្រៀម និងថ្នាក់ទី២សាងសង់ពីថ្មភក់ មានបណ្តោយប្រវែង៥០ម៉ែត្រ និងទទឹងប្រវែង៤០ម៉ែត្រ។ ដំណាក់កាលទី១ គឺជួសជុលនៅថ្នាក់ទី១ បណ្តោយប្រវែង១២ម៉ែត្រ និងទទឹងប្រវែង៩ម៉ែត្រ។ ចំពោះរចនាសម្ព័ន្ធខឿនដែលមានការខូចខាតធ្ងន់ធ្ងរ ក្រុមការងារត្រូវសិក្សារកកម្ពស់ដើម ហើយជំនួសថ្មបាយក្រៀមថ្មីមួយចំនួននៅផ្នែកពុកផុយ ឬបាត់បង់ដើម្បីពង្រឹងរចនាសម្ព័ន្ធផែនេះ បានរឹងមាំឡើងវិញ៕

ប្រភព៖ អាជ្ញាធរជាតិអប្សរា