ត្រាំ បង្ហាញគោលដៅចំនួន៤ ដែលត្រូវសម្រេចឲ្យបានក្នុងសង្គ្រាមជាមួយ អ៊ីរ៉ង់

នៅថ្ងៃទី២៨ខែកុម្ភៈឆ្នាំ២០២៦ សហរដ្ឋអាមេរិកចាប់ដៃអ៊ីស្រាអែល បើកប្រតិបត្តិការយោធាទ្រង់ទ្រាយធំ វាយប្រហារប្រទេសអ៊ីរ៉ង់ ដោយក្រោយការចរចានុយក្លេអ៊ែរបរាជ័យ។

ដំបូងឡើយ ប្រធានាធិបតីអាមេរិក ដូណាល់ ត្រាំ បញ្ជាក់ច្បាស់ៗថា គោលដៅនៃប្រតិបត្តិការនេះគឺ ទប់ស្កាត់អ៊ីរ៉ង់ មិនឲ្យផលិតអាវុធនុយក្លេអ៊ែរ ដែលគំរាមកំហែងដល់អាមេរិក ក៏ដូចជាប្រទេសផ្សេងទៀតក្នុងតំបន់ ដ្បិតការចោទប្រកាន់នេះ ត្រូវបានទីក្រុងតេហេរ៉ង់ ច្រានចោលម្តងហើយម្តងទៀតក៏ដោយ។

យ៉ាងណា ឥឡូវប្រមុខសេតវិមានបានអះអាងពីគោលដៅ៤ចំណុចដែលអាមេរិកត្រូវសម្រេចឲ្យបានក្នុងសង្គ្រាមនេះដូចជា៖ ទី១ អាមេរិកត្រូវកម្ទេចសមត្ថភាពមីស៊ីលអ៊ីរ៉ង់ឲ្យហ្មត់, ទី២ កម្ចាត់កងទ័ពជើងទឹកអ៊ីរ៉ង់, ទី៣ ធានាឲ្យបានថាប្រទេសដែលជាអ្នកឧបត្ថម្ភភេរវកម្មលេខមួយលើពិភពលោក នឹងមិនអាចទទួលបានអាវុធនុយក្លេអ៊ែរជាដាច់ខាត និងទី៤ ត្រូវធានាឲ្យបានថា របបដឹកនាំអ៊ីរ៉ង់មិនអាចបន្តបំពាក់អាវុធ ផ្ដល់មូលនិធិ និងបញ្ជាកងទ័ពភេរវករនៅក្រៅព្រំដែនរបស់ពួកគេបានទៀតឡើយ។

មុននេះដែរ លោកត្រាំប្រកាសហើយថា អាមេរិក នឹងមិនដកថយឡើយ ពោលគឺនឹងវាយអ៊ីរ៉ង់ រហូតដល់សម្រេចបានគោលដៅទាំងអស់។

ដោយឡែក ពេលថ្លែងទៅកាន់ CNN លោក ត្រាំ ព្រមាន​ថា សហរដ្ឋអាមេរិកមិនទាន់ឈានដល់ចំណុចកំពូលនៃយុទ្ធនាការយោធារបស់ខ្លួនប្រឆាំងនឹងអ៊ីរ៉ង់នៅឡើយទេ ខណៈ​ប្រតិបត្តិការបច្ចុប្បន្នគ្រាន់តែជា «ការកម្ដៅសាច់ដុំ» ប៉ុណ្ណោះ ហើយ «រលកយក្ស» នៃការវាយប្រហារនឹងមកដល់ក្នុងពេលឆាប់ៗនេះ។

លោកអះអាងថា ទោះជាប្រតិបត្តិការកំពុងបន្តក៏ដោយ ក៏សហរដ្ឋអាមេរិក​មិនទាន់បានចាប់ផ្តើមវាយប្រហារខ្លាំង​នៅឡើយទេ ហើយលោកព្យាករ​ថា ការបង្កើនកម្លាំងវាយប្រហារទ្រង់ទ្រាយធំនឹងកើតឡើង។

យ៉ាងណា លោកត្រាំ​​ក៏កត់សម្គាល់ពីភាពមិនច្បាស់លាស់ជុំវិញរចនាសម្ព័ន្ធគ្រប់គ្រងបច្ចុប្បន្ននៅក្នុងទីក្រុងតេហេរ៉ង់ដែរ ដោយទទួលស្គាល់ថា វ៉ាស៊ីនតោន​ក៏មិនដឹង​​ថាអ្នកណានឹងក្លាយជាមេដឹកនាំថ្មីរបស់ប្រទេសនេះ ឬអ្នកណានឹងត្រូវគេជ្រើស​តាំង​នោះដែរ៕

អត្ថបទ៖ សុខ សុវណ្ណ