អ៊ីរ៉ង់ ប្រកាសថា ខ្លួនកំពុងសហការផ្នែកយោធាជាមួយរុស្ស៊ីនិងចិន

ស្របពេលសង្គ្រាមមជ្ឈិមបូព៌ា ឈានដល់សប្តាហ៍ទី៣ហើយនោះ ការច្បាំងគ្នានៅតែខ្លាំងក្លា ដោយមានការបាញ់តដៃគ្នាឥតឈប់សោះឡើយ ហើយឥឡូវនេះ ភាគីអ៊ីរ៉ង់ ប្រកាសថា ខ្លួនកំពុងមានកិច្ចសហការយោធាជាមួយរុស្ស៊ី និងចិន។

ក្នុងកិច្ចសម្ភាសជាមួយទូរទស្សន៍ MS NOW កាលពីថ្ងៃសៅរ៍ទី១៤ខែមីនាឆ្នាំ២០២៦ រដ្ឋមន្ត្រីការបរទេសអ៊ីរ៉ង់ Abbas Araghchi និយាយថា ទីក្រុងតេហេរ៉ង់កំពុងមានកិច្ចសហប្រតិបត្តិការយោធាយ៉ាងជិតស្និទ្ធជាមួយទីក្រុងមូស្គូនិងប៉េកាំង។ រុស្ស៊ីនិងចិនថាជា «ដៃគូយុទ្ធសាស្ត្រ»។

យ៉ាងណា ដ្បិតមិនបានផ្ដល់ព័ត៌មានលម្អិតស៊ីជម្រៅក៏ដោយ ប៉ុន្តែលោកបញ្ជាក់ថា អ៊ីរ៉ង់ មានកិច្ចសហប្រតិបត្តិការយ៉ាងជិតស្និទ្ធជាមួយគ្នាទៅវិញទៅមក ហើយកិច្ចសហការនោះកំពុងបន្ត។ កិច្ចសហការនេះគ្របដណ្តប់លើវិស័យនយោបាយ សេដ្ឋកិច្ច និងយោធា។

ទោះបែបនេះ ប៉ុន្តែមិនទាន់មានការចេញមុខបកស្រាយឬពន្យល់អ្វីទេ ពីសំណាក់ភាគីរុស្ស៊ីនិងចិន។

ការអះអាងរបស់លោក Araghchi កើតឡើងបន្ទាប់ពីប្រធានាធិបតីអាមេរិក ដូណាល់ ត្រាំ មានមន្ទិលសង្ស័យថា មេដឹកនាំរុស្ស៊ី វ្ល៉ាឌីមៀរ ពូទីន កំពុងលបជួយអ៊ីរ៉ង់ស្ងាត់២។

នៅក្នុងកិច្ចសម្ភាស​ជាមួយសារព័ត៌មាន Fox News ​លោកត្រាំ បានទម្លាយនូវការសង្ស័យរបស់លោកថា ពូទីន ប្រហែលជាកំពុងផ្តល់ជំនួយដល់អ៊ីរ៉ង់ ក្នុងសង្រ្គាមប្រឆាំងនឹងអាមេរិក និងអ៊ីស្រាអែល។ ការដែលទីក្រុងមូស្គូសម្រេចចិត្តជួយទីក្រុងតេហេរ៉ង់បែបនេះ អាចជាការសងសឹកទៅនឹងការដែលអាមេរិកបន្តគាំទ្រប្រទេសអ៊ុយក្រែន។ លោកត្រាំ និយាយថា៖ «ខ្ញុំគិតថា ពូទីន ប្រហែលជាកំពុងជួយពួកគេបន្តិចបន្តួច… ហើយគាត់ប្រហែលជាគិតថា យើងក៏កំពុងជួយអ៊ុយក្រែនដូចគ្នា»។

ទោះបីជាបេសកជនពិសេសអាមេរិក លោក Steve Witkoff បានបញ្ជាក់ថា មន្ត្រីរុស្ស៊ីទើបតែបានបដិសេធរឿងចែករំលែកព័ត៌មានសម្ងាត់ជាមួយអ៊ីរ៉ង់ក៏ដោយ ក៏​លោកត្រាំ​បានចាត់ទុកស្ថានភាពនេះថាជា «វដ្តនៃការប្រកួតប្រជែងសម្ព័ន្ធមិត្ត» រវាងមហាអំណាចពិភពលោក ដែលមានរុស្ស៊ី និងចិននៅពីក្រោយ៕

អត្ថបទ៖ សុខ សុវណ្ណ