ខណៈសាំងឡើងថ្លៃ តើគួរសន្សំសំចៃការប្រើប្រាស់ប្រេងឥន្ធនៈរបៀបណា?

បច្ចុប្បន្ន ប្រេងឥន្ធនៈនៅទូទាំងសកលលោកបានឡើងថ្លៃព្រោះតែសង្គ្រាមនៅមជ្ឈិមបូព៌ា ដោយសារតែសហរដ្ឋអាមេរិក និងអ៊ីស្រាអែលវាយប្រហារប្រទេសអ៊ីរ៉ង់។ បញ្ហានេះ មិនមែនមានតែសាំងប៉ុណ្ណោះទេដែលឡើងថ្លៃ ក្នុងនោះក៏ធ្វើឱ្យទំនិញមួយចំនួន ឡើងថ្លៃដូចគ្នា។ ហេតុនេះ តើគួរធ្វើបែបណាដើម្បីអាចសន្សំសំចៃការប្រើប្រាស់ប្រេងឥន្ធនៈ?

អ្នកជំនាញកិច្ចការសង្គម លោកបណ្ឌិត ឈត ប៊ុនថង បានប្រាប់ កម្ពុជាថ្មី ថា ក្នុងស្ថានភាពបែបនេះ ប្រជាជនគួររួមចំណែកជាមួយរាជរដ្ឋាភិបាល ក្រសួង ស្ថាប័នផ្សេងៗ ដើម្បីកាត់បន្ថយការប្រើប្រាស់ប្រេងឥន្ធនៈ ឬអគ្គិសនី។ ដើម្បីអាចន្សំសំចៃបាន លោកបណ្ឌិត​ បានណែនាំថា នៅពេលធ្វើដំណើរទៅក្រៅ ឬទៅធ្វើការ អាចធ្វើដំណើរតាមមធ្យោបាយសាធារណៈ ឬក៏ទៅជុំគ្នាជាក្រុម ដោយប្រើយានជំនិះតែមួយ ក្នុងករណីផ្ទះនៅជិតគ្នា ឬផ្លូវស្របគ្នា។ ជាមួយគ្នានេះ ក៏គួរតែកាត់បន្ថយចំពោះការធ្វើដំណើរកម្សាន្តទៅកន្លែងឆ្ងាយៗដើម្បីចូលរួមសន្សំសំចៃក្នុងកាលៈទេសៈខ្វះខាតនេះ។

លោកបន្ថែមថា ក្រៅពីកាត់បន្ថយចំពោះការធ្វើដំណើរផ្លូវឆ្ងាយ ប្រសិនជាអាច គួរធ្វើដំណើរថ្មើរជើងចំពោះទីតាំងជិត ជិះកង់ ឬម៉ូតូអាគុយ តាមអ្វីដែលអាចធ្វើបាន។ លោកកត់សម្គាល់ឃើញថា បណ្តាប្រទេសមួយចំនួន ក៏បានអនុញ្ញាតឱ្យបុគ្គលិកធ្វើការងារពីផ្ទះ ឬកាត់បន្ថយថ្ងៃធ្វើការ ដើម្បីកុំឱ្យមនុស្សធ្វើដំណើរច្រើន ជួយកាត់បន្ថយការប្រើប្រាស់ប្រងឥន្ធនៈ។

បណ្ឌិត ឈត ប៊ុនថង សង្កត់ធ្ងន់ថា៖ “បើសិនជាយើងធ្វើបាន វារួមចំណែកយ៉ាងសំខាន់ទៅក្នុងការសន្សំសំចៃប្រេងឥន្ធនៈហ្នឹង។ យើងដឹងហើយថា ប្រទេសយើងមិនមែនជាប្រទេសដែលផលិតប្រេងទេ ហើយយើងនាំនេះ មិនមែននាំប្រេងឆៅទេ នាំប្រេងគេចម្រាញ់ហើយទៀត អ៊ីចឹង គឺតម្លៃយើង គឺតម្លៃខ្ពស់។ បើយើងអាចសន្សំសំចៃបានជាការប្រសើរណាស់ ដោយសារតែតម្លៃប្រេងចេះតែឡើងជាបន្តបន្ទាប់”។

សម្រាប់កម្ពុជា បន្ទាប់ពីមានវិបត្តិនេះ ក៏មានក្រសួង ស្ថាប័នមួយចំនួន បានចេញសេចក្តីណែនាំពីការសន្សំសំចៃថាមពលអគ្គិសនី និងប្រេងឥន្ធនៈផងដែរ។ ក្នុងនោះ កាលពីថ្ងៃទី២៣ ខែមីនា ក្រសួងអប់រំ យុវជន និងកីឡា បានដាក់ចេញសេចក្តីណែនាំដល់បុគ្គលិកអប់រំទាំងថ្នាក់ជាតិ និងក្រោមជាតិ ឱ្យសន្សំសំចៃការប្រើប្រាស់ប្រេងឥន្ទនៈ និងអគ្គិសនី ព្រមទាំងកាត់បន្ថយជាអតិបរមាក្នុងការរៀបចំសិក្ខាសាលា និងកិច្ចប្រជុំដែលត្រូវធ្វើដំណើរឆ្ងាយ ដោយងាកមករៀបចំកិច្ចប្រជុំតាមអនឡាញជំនួសវិញ៕