បើអាមេរិកប្រើទ័ពជើងគោកវាយលុកអ៊ីរ៉ង់ តើ​រុស្ស៊ី​និង​ចិន​នឹង​ឈរ​មើល​ឬ​ក៏​ចូល​ជួយ?

«តើទីក្រុងមូស្គូ និងទីក្រុងប៉េកាំង នឹងមានប្រតិកម្មបែបណា បើសង្គ្រាមទ្រង់ទ្រាយធំផ្ទុះឡើងតាមរយៈការប្រើប្រាស់កងទ័ពជើងគោកពីសំណាក់​អាមេរិក?» គឺ​ជា​សំណួរ​ដែល​​កំពុង​​​ទទួល​​ការ​ចាប់​អារម្មណ៍​ខ្លាំង ខណៈដែលភាពតានតឹងរវាង​ក្រុងវ៉ាស៊ីនតោន និងអ៊ីរ៉ង់ កំពុងស្ថិតក្នុងដំណាក់កាលប្រកាសអាសន្ន។

យោងតាមការចុះផ្សាយរបស់ភ្នាក់ងារព័ត៌មាន Al Jazeera និងវិទ្យាស្ថាន CFR (Council on Foreign Relations) នាពេលថ្មីៗនេះ ទំនាក់ទំនងត្រីភាគី អ៊ីរ៉ង់-រុស្ស៊ី-ចិន បានឈានដល់កម្រិតយុទ្ធសាស្ត្រស៊ីជម្រៅ ប៉ុន្តែការសម្រេចចិត្តចូលអន្តរាគមន៍ដោយផ្ទាល់នឹងមិនមែនជារឿងសាមញ្ញឡើយ។

រុស្ស៊ី៖ អ្នកផ្តល់ដង្ហើមតាមរយៈបច្ចេកវិទ្យា និងចារកម្ម

សម្រាប់រុស្ស៊ី អ៊ីរ៉ង់គឺជាសម្ព័ន្ធមិត្តដ៏សំខាន់បំផុតក្នុងតំបន់មជ្ឈិមបូព៌ា ជាពិសេសក្នុងការប្រឆាំងនឹងឥទ្ធិពលលោកខាងលិច។ តាមរយៈរបាយការណ៍ពី The Guardian លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប បានលើកឡើងថា រុស្ស៊ីកំពុងជួយអ៊ីរ៉ង់រួចជាស្រេចនូវប្រព័ន្ធចារកម្មផ្កាយរណប និងបច្ចេកវិទ្យាដ្រូន ដើម្បីតាមដានរាល់ចលនារបស់ទ័ពអាមេរិក។

ទោះជាយ៉ាងណា អ្នកជំនាញយោធាភាគច្រើនយល់ថា រុស្ស៊ីប្រហែលជា មិនបញ្ជូនទ័ពជើងគោក មកជួយអ៊ីរ៉ង់ដោយផ្ទាល់នោះទេ ដោយសារតែខ្លួនកំពុងជាប់ដៃក្នុងសង្គ្រាមនៅអ៊ុយក្រែន។ ប៉ុន្តែ មូស្គូអាចនឹងផ្តល់អាវុធទំនើបៗដូចជា ប្រព័ន្ធការពារ S-400 ឬមីស៊ីលប្រឆាំងនាវា ដើម្បីធ្វើ​ឲ្យ​ការវាយលុករបស់អាមេរិកក្លាយជា «វាលពិឃាត»។

ចិន៖ ការពារសរសៃឈាមសេដ្ឋកិច្ច និងផលប្រយោជន៍ថាមពល

ចិនមានទស្សនៈខុសពីរុស្ស៊ីបន្តិច។ តាមការវិភាគរបស់ Modern Diplomacy ចិនគឺជាអ្នកទិញប្រេងធំជាងគេបង្អស់ពីអ៊ីរ៉ង់ (ប្រហែល ៨០% នៃផលិតផលប្រេងអ៊ីរ៉ង់ត្រូវបាននាំចេញទៅចិន)។ ប្រសិនបើអាមេរិក​ចេញ​ទ័ព​ជើង​គោក​វាយលុកអ៊ីរ៉ង់ សន្តិសុខថាមពលរបស់ចិននឹងរង្គោះរង្គើភ្លាមៗ។

ក្រសួងការបរទេសចិន តែងតែចេញមុខថ្កោលទោសរាល់ការប្រើប្រាស់កម្លាំងយោធា ប៉ុន្តែក្នុងករណីមានការឈ្លានពានតាមជើងគោក ចិនអាចនឹងប្រើប្រាស់ «អំណាចទន់» ដូចជា៖

សេដ្ឋកិច្ច៖ បន្តទិញប្រេង និងផ្តល់ជំនួយហិរញ្ញវត្ថុដើម្បី​ឲ្យ​អ៊ីរ៉ង់អាចទ្រាំទ្រនឹងសង្គ្រាមបានយូរ។

បច្ចេកវិទ្យា៖ យោងតាម Small Wars Journal ចិនអាចនឹងផ្តល់ប្រព័ន្ធរុករក និងបញ្ជាគ្រាប់មីស៊ីលដែលមានភាពជាក់លាក់ខ្ពស់ដល់អ៊ីរ៉ង់ ដើម្បីបង្កការខូចខាតដល់មូលដ្ឋានទ័ពអាមេរិក។

តើពួកគេនឹងឈរមើល ឬចូលជួយ?

បើ​តាមការចុះផ្សាយរបស់វិទ្យាស្ថាន PIIE (Peterson Institute for International Economics) ការវិភាគបច្ចុប្បន្នបង្ហាញថា ទាំងរុស្ស៊ី និងចិន អាចនឹងមានយុទ្ធសាស្ត្រ «អង្គុយលើភ្នំមើលខ្លាខាំគ្នា»។ ពួកគេចង់​ឲ្យ​សហរដ្ឋអាមេរិកជាប់ផុងក្នុងសង្គ្រាមដ៏វែងឆ្ងាយ និងចំណាយប្រាក់វាល់លានដុល្លារនៅអ៊ីរ៉ង់ ដើម្បី​ឲ្យ​អាមេរិកចុះខ្សោយអំណាចនៅក្នុងតំបន់ប៉ាស៊ីហ្វិក និងអឺរ៉ុប។

ជារួម បើអាមេរិកប្រើទ័ពជើងគោក៖

រុស្ស៊ី នឹងក្លាយជា «ខ្នងបង្អែកយោធា» តាមរយៈការផ្ដល់អាវុធ និងព័ត៌មានសម្ងាត់។

ចិន នឹងក្លាយជា «ខ្នងបង្អែកសេដ្ឋកិច្ច» និងការការពារផ្នែកការទូតនៅអង្គការសហប្រជាជាតិ។

ការចូលរួមដោយកងទ័ពផ្ទាល់ពីសំណាក់រុស្ស៊ី ឬចិន ត្រូវបានគេមើលឃើញថាមានភាគរយទាប ប៉ុន្តែការជួយ «ពីក្រោយខ្នង» នឹងធ្វើ​ឲ្យ​អាមេរិកជួបការលំបាកបំផុត ដែលមិនធ្លាប់មានពីមុនមកក្នុងប្រវត្តិសាស្ត្រសង្គ្រាមទំនើប៕

អត្ថបទ៖ ឈាង