ម៉ោងប្រកួត World Cup ឆ្នាំនេះ ងាយ​ស្រួលមើលសម្រាប់អ្នកគាំទ្រកម្ពុជា

ព្រឹត្តិការណ៍បាល់ទាត់ជើងឯកពិភពលោក World Cup 2026 ​ដែល​ទទួល​ធ្វើ​សហម្ចាស់ផ្ទះនៅ សហរដ្ឋអាមេរិក កាណាដា និង ម៉ិកស៊ិក ​ប្រកួត​នៅ​ម៉ោង​ងាយ​ស្រួល​ទស្សនា​ សម្រាប់អ្នកគាំ​តំបន់​អាស៊ី​ ក្នុង​នោះ​មាន​អ្នក​គាំទ្រ​កម្ពុជា​ផង។

World Cup 2026 នឹងបង្កភាពងាយស្រួលសម្រាប់អ្នកគាំទ្រ​ទស្សនា ដោយសារការប្រកួតភាគច្រើនលេងនៅពេលព្រឹកសម្រាប់ម៉ោងនៅប្រទេស​កម្ពុជា។ នៅវគ្គចែកពូល ភាគច្រើនការប្រកួតលេងនៅចន្លោះពីម៉ោង ៤ ដល់ម៉ោង ១១ ព្រឹក។ ជាមួយគ្នានេះ ក៏មានការប្រកួតមួយចំនួនផងដែរ ត្រូវលេងនៅពេលយប់ នាវេលាម៉ោង ២ រំលងអាធ្រាត្រ។

ឈានចូលវគ្គ ៣២ ក្រុម ការទស្សនាក៏នៅតែមានភាពងាយស្រួលដដែល ដោយការប្រកួតភាគច្រើនលេងនៅពេលព្រឹកទាបភ្លឺ ពោលគឺនៅចន្លោះពីម៉ោង ២ ដល់ម៉ោង ១០ ព្រឹក។ ជាមួយគ្នានេះ មានការប្រកួតចំនួន ៣ ប្រកួត ដែលមិនលេងនៅចន្លោះម៉ោងទាំងនេះ ដោយមាន ១ ប្រកួតលេងនៅម៉ោង ១១ យប់ និង ២ ប្រកួតទៀតលេងនៅម៉ោង ១២ យប់រំលងអាធ្រាត្រ។

ដោយឡែកចាប់ពីវគ្គ ១៦ ក្រុម ដល់វគ្គ ៨ ក្រុម គឺពុំមានការប្រកួតនៅម៉ោង ១២ យប់ទៀតឡើយ ដោយការប្រកួតទាំងអស់មានចាប់ពីម៉ោង ២ រំលងអាធ្រាត្រដល់ម៉ោង ១១ ព្រឹក។ ចំណែកការប្រកួតនៅវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ គឺលេងនៅម៉ោង ២ រំលងអាធ្រាត្រទាំងអស់តែម្តង។ លើកលែងតែការប្រកួតដណ្តើមលេខ ៣ ដែលត្រូវលេងនៅម៉ោង ៤ ទាបភ្លឺ។

គួរបញ្ជាក់ ថា ការប្រកួតនៅសល់ ១ ខែទៀតប៉ុណ្ណោះ ដែលការប្រកួតនឹងចាប់ផ្តើមពីថ្ងៃទី ១១ ខែ មិថុនា ដល់ថ្ងៃទី ១៩ ខែ កក្កដា ឆ្នាំ ២០២៦៕

អត្ថបទ៖ សេម កុសល