ព័ត៌មានអន្ដរជាតិ

CNN៖ អាមេរិកកំពុងប្រតិបត្តិការយោធានៅគុយបា ស្រដៀងការអនុវត្តនៅវ៉េណេស៊ុយអេឡាដែរ

បានផុស

២ ខែ មុន

នៅ

ថ្ងៃអង្គារ ១២ ឧសភា ២០២៦

ដោយ

ការវិភាគថ្មីមួយបង្ហាញថា យន្តហោះចារកម្មរបស់សហរដ្ឋអាមេរិកហោះហើរនៅជិតប្រទេសគុយបា បានកើនឡើងក្នុងរយៈពេលបីខែចុងក្រោយនេះ ដូចពួកគេធ្លាប់ធ្វើលើប្រទេសវ៉េណេស៊ុយអេឡាមុនពេលប្រតិបត្តិការចាប់ខ្លួន អតីតមេដឹកនាំ លោក នីកូឡាស ម៉ាឌូរ៉ូ ចេញពីដំណែងកាលពីខែមករា។

យោងតាមសារព័ត៌មានអង់គ្លេស The Independent ផ្សាយថ្ងៃទី១១ ខែឧសភា ឆ្នាំ២០២៦ យ៉ាងហោចណាស់មានជើងហោះហើរចំនួន២៥ ដោយយន្តហោះនិងដ្រូនរបស់កងទ័ពជើងទឹកនិងអាកាសតាមដានតាមបណ្តោយឆ្នេរសមុទ្រគុយបាចាប់តាំងពីថ្ងៃទី៤ ខែកុម្ភៈ ។ នេះបើយោងតាមការវិភាគរបស់សារព័ត៌មាន CNN លើទិន្នន័យអាកាសចរណ៍ជាសាធារណៈ។

យន្តហោះស៊ើបការណ៍អាមេរិក។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំរូនេះឆ្លុះបញ្ចាំងពីការកើតឡើង ពេលកងកម្លាំងពិសេសអាមេរិកបានវាយលុកចូលទៅក្នុងទីក្រុងការ៉ាកាសនាព្រឹកថ្ងៃទី០៣ ខែមករា ដើម្បីចាប់ខ្លួនលោក ម៉ាឌូរ៉ូ នាំទៅកាន់ទីក្រុងញូវយ៉កពីបទភេរវកម្មគ្រឿងញៀន។

យោងតាមរបាយការណ៍ យន្តហោះដែលពាក់ព័ន្ធនឹងប្រតិបត្តិការនៅគុយបាភាគច្រើនជាយន្តហោះល្បាតសមុទ្រ P-៨A Poseidon ប្រើសម្រាប់ឃ្លាំមើលនិងឈ្លបយកការណ៍ ខណៈដ្រូនឈ្លបយកការណ៍រយៈកម្ពស់ខ្ពស់ RC-១៣៥V Rivet Joints និង MQ-4C Triton ក៏ប្រទះឃើញថាដើរតួនាទីក្នុងការប្រមូលព័ត៌មានស៊ើបការណ៍សម្ងាត់ផងដែរ។

ជើងហោះហើរទាំងនោះភាគច្រើននៅជិតទីក្រុង Havana និង Santiago de ដោយខ្លះចូលមកដល់ចម្ងាយជាង ៦០គីឡូម៉ែត្រពីដីគោកជាការគំរាមកំហែងជាក់ស្តែង ប្រឆាំងនឹងរដ្ឋាភិបាលកុម្មុយនិស្តគុយបា។

អ្នកវិភាគរបស់ CNN សន្និដ្ឋានថា៖ « យន្តហោះទាំងនោះមិនត្រឹមតែហោះជិតនឹងឆ្នេរសមុទ្រប៉ុណ្ណោះទេ ប៉ុន្តែថែមទាំងស្ថិតនៅចម្ងាយដែលអាចប្រមូលព័ត៌មានស៊ើបការណ៍សម្ងាត់បានល្អ ហើយយន្តហោះទាំងនោះក៏លេចឡើងភ្លាមៗមុនខែកុម្ភៈទៀតផង។ ជើងហោះហើរអាចមើលឃើញជាសាធារណៈបែបនេះគឺកម្រមានណាស់ក្នុងតំបន់នោះ […]»។

គួរបញ្ជាក់ថា លោក ដូណាល់ ត្រាំ បានបិទផ្លូវប្រេងលើប្រទេសគុយបា ចាប់ផ្តើមនៅចុងខែមករា ឆ្នាំ២០២៦ និងចាប់ផ្តើមនៃទណ្ឌកម្មនិងការរឹតបន្តឹងជាបន្តបន្ទាប់ កំណត់យ៉ាងធ្ងន់ធ្ងរដល់ការចូលប្រើប្រាស់ប្រេងឥន្ធនៈនាំចូលរបស់ប្រទេសគុយបា៕

ប្រែដោយ៖ ណឺ មិនា