ព័ត៌មានអន្ដរជាតិ

អាមេរិក ត្រៀមជួយវ៉េណេស៊ុយអេឡា ក្នុងគ្រោះរញ្ជួយដីដ៏ធំ មិនធ្លាប់មាន

បានផុស

១៣ វិនាទី មុន

នៅ

ថ្ងៃព្រហស្បតិ៍ ២៥ មិថុនា ២០២៦

ដោយ

ប្រទេសវ៉េណេស៊ុយអេឡាចួបគ្រោះរញ្ជួយដីដ៏ធំ មិនធ្លាប់មានក្នុងប្រវត្តិសាស្រ្ត កាលពីយប់ថ្ងៃទី២៤ ខែមិថុនា ឆ្នាំ២០២៦ បានបំផ្លាញហេដ្ឋារចនាសម្ព័ន្ធ សម្លាប់មនុស្សរាប់សិបនាក់ និងរបួសជិត១០០០នាក់។

ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលលើកទ័ពចាប់អតីតប្រធានាធិបតី ម៉ាឌូរ៉ូ កាលពីដើមឆ្នាំនេះ បានលើកឡើងកាលពីថ្ងៃពុធ ថា សហរដ្ឋអាមេរិកបានត្រៀមខ្លួនរួចជាស្រេច ដើម្បីជួយប្រទេសវ៉េណេស៊ុយអេឡា បន្ទាប់ពីមានការរញ្ជួយដីធំៗចំនួនពីរជាប់ៗគ្នា បានវាយប្រហារប្រទេសអាមេរិកខាងត្បូងនេះ។ នេះបើយោងតាមទីភ្នាក់ងារសារព័ត៌មាន Anadolu នៅថ្ងៃទី២៥ ខែមិថុនា ឆ្នាំ២០២៦ ។

លោក ត្រាំ សរសេរលើបណ្តាញសង្គម Truth Social ផ្ទាល់ខ្លួនថា៖ « ការរញ្ជួយដីធំៗពីរដែលទើបតែវាយប្រហារប្រទេសវ៉េណេស៊ុយអេឡា គឺមានទំហំធំ និងបន្សល់ទុកនូវចំនួនអ្នកស្លាប់យ៉ាងច្រើន»។

ប្រធានាធិបតីអាមេរិក លោក ដូណាល់ ត្រាំ ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បន្ថែមថា៖ « សហរដ្ឋអាមេរិកត្រៀមខ្លួនជាស្រេច រួមទាំងឆន្ទៈក្នុងការជួយ! យើងណែនាំដល់ភ្នាក់ងារសហព័ន្ធទាំងអស់ឱ្យត្រៀមខ្លួន ដើម្បីធ្វើសកម្មភាពយ៉ាងឆាប់រហ័ស។ យើងនឹងនៅទីនោះសម្រាប់មិត្តភ័ក្តិថ្មី និងអស្ចារ្យរបស់យើង»។

មិនខុសគ្នាប៉ុន្មាន រដ្ឋមន្ត្រីការបរទេសអាមេរិក លោក Marco Rubio លើកឡើងថា៖ « សហរដ្ឋអាមេរិកសូមចូលរួមរំលែកទុក្ខយ៉ាងក្រៀមក្រំបំផុត ចំពោះប្រជាជនវ៉េណេស៊ុយអេឡា បន្ទាប់ពីគ្រោះរញ្ជួយដីដ៏សាហាវនេះ»។

លោក Rubio សរសេរលើបណ្តាញសង្គម X ថា៖ « បេះដូងរបស់យើងគឺនៅជាមួយអ្នកទាំងអស់ដែលបានបាត់បង់មនុស្សជាទីស្រលាញ់ អ្នករងរបួស និងក្រុមជួយសង្គ្រោះដ៏ក្លាហានដែលកំពុងធ្វើការដោយមិននឿយហត់ បន្ទាប់ពីគ្រោះរញ្ជួយដីនេះ»។

លោក Rubio បន្ថែមថា៖ « អាមេរិកឈរនៅជាមួយប្រជាជនវ៉េណេស៊ុយអេឡា អំឡុងពេលដ៏លំបាកនេះ ហើយតាមការណែនាំរបស់ ប្រធានាធិបតី ត្រាំ ក្រសួងការបរទេសកំពុងដាក់ពង្រាយក្រុមស្វែងរក ជួយសង្គ្រោះ ធនធានវេជ្ជសាស្ត្រ និងជំនួយមនុស្សធម៌ទៅកាន់ប្រទេសវ៉េណេស៊ុយអេឡាភ្លាមៗ»។

ដើម្បីឆ្លើយតបទៅនឹងការកត់សម្គាល់របស់ លោក ដូណាល់ ត្រាំ ប្រធានាធិបតីស្តីទីរបស់ប្រទេសវ៉េណេស៊ុយអេឡា លោកស្រី Delcy Rodriguez បានថ្លែងអំណរគុណ ចំពោះប្រធានាធិបតីអាមេរិកនិងរដ្ឋបាលរបស់លោក តាមរយៈបណ្តាញសង្គម X សម្រាប់ការផ្តល់ការគាំទ្រ និងសាមគ្គីភាពដល់ប្រជាជនវ៉េណេស៊ុយអេឡា ចំពោះសោកនាដកម្មដ៏ធំមួយនេះ។

យោងតាមការស្ទង់ភូមិសាស្ត្រសហរដ្ឋអាមេរិក(USGS) គ្រោះរញ្ជួយដីពីរដងជាប់គ្នាត្រូវបានវាយប្រហារភាគខាងជើងវ៉េណេស៊ុយអេឡា។

ទីភ្នាក់ងារនេះនិយាយថា ការរញ្ជួយដីកម្រិត ៧.២ រ៉ិចទ័របានវាយប្រហារនៅជិតតំបន់ San Felipe ជារដ្ឋធានីនៃរដ្ឋ Yaracuy បន្ទាប់មក ៤០វិនាទីក្រោយ ការរញ្ជួយដីកម្រិត ៧.៥រ៉ិចទ័របានវាយប្រហារភាគអាគ្នេយ៍នៃតំបន់ Yumare ។

ទីភ្នាក់ងារ USGS បន្ថែមថា ការរញ្ជួយដីកម្រិត ៧.៥ រ៉ិចទ័រនេះគឺជាការរញ្ជួយដីដ៏ធំបំផុតដែលបានកត់ត្រាទុក វាយប្រហារលើប្រទេសវ៉េណេស៊ុយអេឡា និងជារញ្ជួយដីខ្លាំងបំផុតរបស់ប្រទេសនេះក្នុងរយៈពេលជាង ១២៥ឆ្នាំ៕

សម្រួល៖ ណឺ មិនា