កីឡា

ជំនួបប្រវត្តិសាស្ត្រ! ព្រះខ័នរាជស្វាយរៀង ប៉ះ Kuwait SC មានកីឡាករបរទេស ៨ នាក់ដូចគ្នាយប់នេះ

បានផុស

២ ខែ មុន

នៅ

ថ្ងៃពុធ ១៣ ឧសភា ២០២៦

ដោយ

ជំនួបវគ្គផ្តាច់ព្រ័ត្រ នឹងចារប្រវត្តិសាស្ត្រជាថ្មីនៃក្លិបតំណាងកម្ពុជាគឺ ព្រះខ័នរាជស្វាយរៀង និងក្លិប Kuwait SC តំណាងឲ្យប្រទេសគុយវ៉ែត ក្នុងពានរង្វាន់ទ្វីបអាស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀង បានក្លាយជាក្រុមរបស់កម្ពុជាដំបូង គេបានឈានដល់វគ្គផ្តាច់ព្រ័ត្រ ពានរង្វាន់ AFC Challenge League ដល់ទៅ ២ លើកជាប់គ្នា បន្ទាប់ពីលើកទី១ រដូវកាល ២០២៤-២៥ នៅពហុកីឡដ្ឋានជាតិមរតកតេជោ។ ពេលនោះ ព្រះខ័នរាជស្វាយរៀង ទទួលបានចំណាត់ថ្នាក់លេខ ២។

ចំណែក ក្រុម Kuwait SC បានឡើងដល់វគ្គផ្តាច់ព្រ័ត្រពានរង្វាន់អាស៊ី លើកទី៥ គឺពាន AFC Cup ឬ AFC Champions League Two ចំនួន ៤ ហើយបានឈ្នះជើងឯក ៣ លើក និងរងជើងឯក ១ លើក ហើយលើកទី ៥ នេះគឺពានរង្វាន់ AFC Challenge Leauge។

រាត្រីនេះ នៅប្រទេសគុយវ៉ែត វេលាម៉ោង ១១:៤៥នាទីយប់ ម៉ោងនៅប្រទេសកម្ពុជា ក្រុមទាំងពីរសុទ្ធតែខ្លាំង សុទ្ធតែល្អ និងសុទ្ធតែអាចមានឱកាសឈ្នះជើងឯកដូចគ្នា។ ក្រុមព្រះខ័នរាជស្វាយរៀង និង Kuwait SC មានកីឡាករបរទេស ៨ នាក់ស្មើគ្នា ខណៈកីឡាករក្នុងស្រុករបស់ពួកគេក៏សុទ្ធតែមានបទពិសោធ និងជាប់ជម្រើសជាតិរៀងៗខ្លួន។

ក្រុម Kuwait SC មានខ្សែការពារបរទេស ២ នាក់គឺ Arsene Zola សញ្ជាតិកុងហ្គោ និង Ali Pourdara សញ្ជាតិអ៊ីរ៉ង់, ខ្សែបម្រើបរទេស ៣ នាក់គឺកីឡាករ Amro Abdelfatah (អេហ្ស៊ីប), Idrissa Doumbia (កូតឌឺវ័រ) និង កីឡាករ Mehdi Berrahma (ម៉ារ៉ុក) ហើយក៏មានខ្សែប្រយុទ្ធបរទេស ៣ នាក់ដែរគឺកីឡាករ Mohamed Marhoon (បារ៉ែន), Ahmed Alaa (អេហ្ស៊ីប) និងកីឡាករ Taha Yassine Khenissi (ទុយនេស៊ី)។

ចំណែក ព្រះខ័នរាជស្វាយរៀង មានខ្សែការពារបរទេស ១ នាក់គឺ កីឡាករម៉ារ៉ុក Faris Hammouti, ខ្សែប្រើជប៉ុន ២ នាក់គឺ Takashi Odawara និង Ryo Fujii និងមានខ្សែប្រយុទ្ធបរទេស ៥ នាក់គឺកីឡាករហ្គាណា Kwame Peprah, កីឡាករព័រទុយហ្គាល់ Tiago Alves, កីឡាករស្កុតឡែន Connor Shields, ខ្សែប្រយុទ្ធប្រេស៊ីល Cristian Roque និង Patrick Robson។

មុនជួបគ្នាវគ្គផ្តាច់ព្រ័ត្រ ក្រុមទាំងពីរមានកំណត់ត្រាមិនទាន់ចាញ់ដូចគ្នាក្នុងពានរង្វាន់អាស៊ីមួយនេះ។ ព្រះខ័នរាជស្វាយរៀង ឈ្នះ ៥ និងស្មើ ២ ក្នុងនោះ ឈ្នះ ២ និងស្មើ ១ នៅវគ្គសន្សំពិន្ទុក្នុងពូល, ឈ្នះ ភ្នំពេញក្រោន ទាំងពីរជើងដោយលទ្ធផល ៥-១ នៅវគ្គ ៨ ក្រុមចុងក្រោយ និងឈ្នះក្រុម Manila Digger ទាំងពីរជើង ៤-១ ក្នុងវគ្គពាក់កណ្តាលផ្តាច់ព្រ័ត្រ។

ចំណែក ក្រុម Kuwait SC បានឈ្នះ ៤ និងស្មើ ១ ក្នុងនោះឈ្នះ ២ និងស្មើ ១ នៅវគ្គសន្សំពិន្ទុក្នុងពូល, ឈ្នះក្រុម Al Shabak ដោយលទ្ធផល ៥-៣ នៅវគ្គ ៨ ក្រុមចុងក្រោយ និងឈ្នះក្រុម Muras United ដោយលទ្ធផល ២-១ នៅវគ្គពាក់កណ្តាលផ្តាច់ព្រ័ត្រ។

កុំភ្លេចគាំទ្រក្លិបតំណាងឲ្យកម្ពុជាទាំងអស់! ក្រុមតែមួយ ស្មារតីតែមួយ កម្លាំងចិត្តតែមួយ លទ្ធផលតែមួយដើម្បីមុខមាត់កម្ពុជាលើឆាកអន្តរជាតិ៕