ព័ត៌មានអន្ដរជាតិ

អាមេរិកនិងដាណឺម៉ាក ចរចាគ្នា បង្កើនមូលដ្ឋានទ័ពថ្មី នៅកោះ Greenland

បានផុស

២ ខែ មុន

នៅ

ថ្ងៃពុធ ១៣ ឧសភា ២០២៦

ដោយ

សហរដ្ឋអាមេរិកកំពុងចរចាជាមួយប្រទេសដាណឺម៉ាកដែលគ្រប់គ្រងកោះ Greenland ដើម្បីបើកមូលដ្ឋានយោធាថ្មីនៅ កោះនេះ ដោយកិច្ចចរចារវាងភាគីទាំងពីរ បានកើតឡើងក្នុងរយៈពេលប៉ុន្មានខែថ្មីៗ។ នេះបើយោងតាមរបាយការណ៍របស់សារព័ត៌មាន BBC ផ្សាយកាលពីថ្ងៃអង្គារ ទី១២ ខែឧសភា ឆ្នាំ២០២៦ ។

សេចក្តីរាយការណ៍នោះ បានលើកឡើងថា មន្ត្រីអាមេរិកកំពុងពិចារណាបង្កើតមូលដ្ឋានទ័ពថ្មីចំនួន៣កន្លែងទៀត នៅភាគខាងត្បូងកោះ Greenland ខណៈភាគីទាំងពីរព្យាយាមបន្ធូរបន្ថយភាពតានតឹងបង្កឡើងដោយការគំរាមកំហែងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការដណ្តើមយកកោះនេះដោយកម្លាំងយោធា ព្រោះខ្លាចការគំរាមកំហែងកាន់តែខ្លាំងពីរុស្ស៊ីនិងចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេតវិមានបានបញ្ជាក់ពីកិច្ចចរចាកម្រិតខ្ពស់ជាមួយ Greenland និងដាណឺម៉ាក ប៉ុន្តែបដិសេធឆ្លើយលម្អិត។ យោងតាមរបាយការណ៍ មន្ត្រីសេតវិមានម្នាក់និយាយថារដ្ឋបាលត្រាំមានសុទិដ្ឋិនិយមលើការចរចា វាកំពុងដំណើរការទៅក្នុងទិសដៅត្រឹមត្រូវ។

យ៉ាងណា ពីមុនមកដាណឺម៉ាកធ្លាប់បង្ហាញឆន្ទៈក្នុងការពិភាក្សាចង់ឱ្យមានមូលដ្ឋានយោធាអាមេរិកបន្ថែមទៀតនៅ Greenland ហើយក្រសួងការបរទេសរបស់ខ្លួនក៏បានបញ្ជាក់ថា ការចរចាជាមួយទីក្រុងវ៉ាស៊ីនតោនកំពុងដំណើរការ។

អ្នកនាំពាក្យម្នាក់មកពីក្រសួងដាណឺម៉ាកនិយាយថា៖ « មានផ្លូវការទូតជាមួយសហរដ្ឋអាមេរិក។ ក្រសួងការបរទេសនឹងមិននិយាយលម្អិតបន្ថែមនៅពេលនេះទេ»។

មន្ត្រីអាមេរិកស្នើឱ្យមានការរៀបចំមួយ លើមូលដ្ឋានថ្មីទាំងបីនឹងត្រូវបានកំណត់ជាទឹកដីអធិបតេយ្យភាពរបស់សហរដ្ឋអាមេរិក ផ្តោតសំខាន់លើការត្រួតពិនិត្យសកម្មភាពដែនសមុទ្ររបស់រុស្ស៊ី និងចិនដែលអាចកើតមាននៅក្នុងតំបន់៕

សម្រួល៖ ណឺ មិនា