រដ្ឋមន្ត្រីមហាផ្ទៃកម្ពុជាជំរុញប្រទេសអាស៊ានរួមគ្នាទប់ស្កាត់និងបង្រ្កាបទល្មើសអន្តោប្រវេសន៍ រួមទាំងស្កេមអនឡាញ

ឧនាយករដ្ឋមន្ត្រីកម្ពុជា លោក ស សុខា និងជារដ្ឋមន្ត្រីក្រសួងមហាផ្ទៃ បានជំរុញឱ្យមានការពង្រឹងនូវកិច្ចសហប្រតិបត្តិការក្នុងចង្កោមប្រទេសសមាជិកអាស៊ានក្នុងការប្រឆាំងនឹងបទល្មើសអន្តោប្រវេសន៍ ឧក្រិដ្ឋកម្មឆ្លងដែន និងភេរវកម្ម ខណៈបទល្មើសទាំងនេះបានបង្កការគំរាមកំហែងកាន់តែខ្លាំងឡើងនៅក្នុងតំបន់។

លោក ស សុខា បានសង្កតធ្ងន់ដល់ការលេចឡើងថ្មីនូវបទល្មើសមិនប្រពៃណី ជាពិសេសនោះគឺបទល្មើសបច្ចេកវិទ្យា រាប់ទាំងការឆបោកតាមប្រព័ន្ធបច្ចេកវិទ្យា ដែលកំពុងក្លាយទៅជាហានិភ័យចំពោះប្រទេសមួយចំនួននៅក្នុងតំបន់អាស៊ាន។

លោកបានលើកឡើងនៅក្នុងពិធីបើកកិច្ចប្រជុំប្រចាំឆ្នាំលើកទី២៩ ថ្នាក់អគ្គនាយកអន្តោប្រវេសន៍ និងប្រធានកុងស៊ុលអាស៊ាន នៅឯខេត្តសៀមរាប កាលពីព្រឹកថ្ងៃទី២៤ ខែមិថុនា ឆ្នាំ២០២៦ ថា ប្រទេសជាសមាជិកអាស៊ានទាំង១១ ត្រូវរួមគ្នាអនុវត្តដោយស្មារតីទទួលខុសត្រូវខ្ពស់ ក្នុងការបង្ការ ទប់ស្កាត់ និងបង្រ្កាបឱ្យបានរាល់ទម្រង់នៃបទល្មើស។

រដ្ឋមន្ត្រីមហាផ្ទៃកម្ពុជា ក៏បានជំរុញឱ្យអាស៊ានលើកកម្ពស់ប្រសិទ្ធភាពការងារគ្រប់គ្រងព្រំដែន ការងារអន្តោប្រវេសន៍ និងកិច្ចការកុងស៊ុល ដែលត្រូវតាមឱ្យទាន់យុគសម័យឌីជីថលដែលកាន់តែមានលក្ខណៈស្មុគស្មាញ និងកាន់តែទំនើប។

តាមឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍កម្ពុជា ក្នុងនាមជាម្ចាស់ផ្ទះដឹកនាំកិច្ចប្រជុំ កម្ពុជាបានកំណត់យកប្រធានបទសំខាន់លើការធ្វើបរិវត្តកម្មឌីជីថល និងនវានុវត្តន៍ធនធានមនុស្ស ឆ្ពោះទៅកាន់តំបន់អាស៊ាន ដែលមានសុវត្ថិភាព និងសមាហរណកម្ម សម្រាប់ការងារគ្រប់គ្រងព្រំដែន អន្តោប្រវេសន៍ និងកិច្ចការកុងស៊ុល ពិសេសបទល្មើសថ្មីៗដែលកាន់តែមានលក្ខណៈស្មុគស្មាញ និងដោយប្រើប្រាស់បច្ចេកវិទ្យាទំនើប៕