សេដ្ឋកិច្ច

អូស្ត្រាលី ចាប់អារម្មណ៍វិស័យកសិ-ឧស្សាហកម្មកម្ពុជា និងប្ដេជ្ញាជំរុញឱ្យអ្នកវិនិយោគមកបណ្តាក់ទុនបន្ថែមទៀត

បានផុស

១៩ វិនាទី មុន

នៅ

ថ្ងៃព្រហស្បតិ៍ ២៥ មិថុនា ២០២៦

ដោយ

លោកស្រី Emma McDonald ស្នងការជាន់ខ្ពស់ទទួលបន្ទុកកិច្ចការវិនិយោគ និងពាណិជ្ជកម្មប្រចាំកម្ពុជា និងវៀតណាម នៃក្រសួងការបរទេស និងពាណិជ្ជកម្មអូស្ត្រាលី បានបង្ហាញការចាប់អារម្មណ៍លើវិស័យកសិ-ឧស្សាហកម្ម ជាពិសេសការកែច្នៃស្វាយចន្ទីដែលជាវិស័យអាទិភាព និងប្តេជ្ញាចិត្តជំរុញសហគ្រាសអូស្ត្រាលីមកសិក្សាសមិទ្ធិលទ្ធភាព និងបណ្តាក់ទុនវិនិយោគបន្ថែមទៀតលើវិស័យដែលមានតម្លៃបន្ថែមខ្ពស់ ព្រមទាំងសកម្មភាពវិនិយោគដែលផ្តោតលើការផ្ទេរចំណេះដឹង និងបច្ចេកវិទ្យា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Emma McDonald បានលើកឡើងក្នុងជំនូបពិភាក្សាការងារជាមួយលោក លឹម វិសាល អគ្គលេខាធិការរងគណៈកម្មាធិការវិនិយោគកម្ពុជា នៅថ្ងៃទី ២៤ មិថុនា ២០២៦ដែលជាជំនូបមាន គោលបំណងពង្រឹងកិច្ចសហប្រតិបត្តិការទ្វេភាគីលើការជំរុញ និងទាក់ទាញការវិនិយោគផ្ទាល់ពីប្រទេសអូស្ត្រាលីមកកម្ពុជា។

លោក លឹម វិសាល អគ្គលេខាធិការរងគណៈកម្មាធិការវិនិយោគកម្ពុជាបានវាយតម្លៃខ្ពស់ចំពោះការគាំទ្ររបស់រដ្ឋាភិបាលអូស្ត្រាលី ព្រមទាំងបានគូសបញ្ជាក់ពីលក្ខណៈពិសេសនៃគោលនយោបាយវិនិយោគរបស់កម្ពុជាដែលផ្តល់នូវការលើកទឹកចិត្តប្រកបដោយភាពទាក់ទាញ និងកិច្ចខិតខំប្រឹងប្រែងរបស់រាជរដ្ឋាភិបាលក្នុងការអភិវឌ្ឍប្រព័ន្ធភស្តុភារកម្មអន្តរមធ្យោបាយយ៉ាងសកម្មដើម្បីកាត់បន្ថយថ្លៃដើម និងបង្កើនភាពប្រកួតប្រជែង។

លោកអគ្គលេខាធិការរងបានស្នើឱ្យភាគីអូស្ត្រាលីបន្តជំរុញវិនិយោគិនខ្លួនមកបណ្តាក់ទុនក្រោមរូបភាពវិនិយោគដោយផ្ទាល់ ឬភាពជាដៃគូរវាងរដ្ឋ និងវិស័យឯកជនលើវិស័យសក្តានុពល មានជាអាទិ៍ កសិកម្ម និងកសិ-ឧស្សាហកម្ម, ថាមពលកកើតឡើងវិញ, ភស្តុភារកម្ម, យានយន្ត, អេឡិចត្រូនិក, និងការបណ្តុះបណ្តាលវិជ្ជាជីវៈ៕