កម្ពុជា​រៀបចំ​ឱ្យ​មានច្រក​ «Korea Desk» ​ដើម្បី​ផ្តល់ការពិគ្រោះប្រឹក្សា​ដល់​វិនិយោគិនកូរ៉េ

លោក ​ស៊ុន ​ចាន់ថុល ​ឧបនាយករដ្ឋមន្ត្រី អនុប្រធានទី១ ក្រុមប្រឹក្សា​អភិវឌ្ឍន៍​កម្ពុជា​ មានប្រសាសន៍ថា កម្ពុជា ​បានរៀបចំឱ្យមានច្រក​ «Korea Desk»​ ដើម្បីផ្តល់សេវា​ពិគ្រោះ​ប្រឹក្សា និងផ្តល់នូវព័ត៌មាន​ពាក់​ព័ន្ធ​ជូនដល់វិនិយោគិនកូរ៉េ។​

​លោក​ឧបនាយករដ្ឋមន្ត្រី ​បាន​លើកឡើង​ក្នុងពេលជួបពិភាក្សាការងារជាមួយលោក Kim Doo Sik ប្រធានស្ថាប័នពិគ្រោះយោបល់ និងដោះស្រាយបណ្តឹងតវ៉ារបស់វិនិយោគិនបរទេស (FIO) ​នៅថ្ងៃទី ១៨ ​ខែមិថុនា ​២០២៦។​

​ស្ថាប័នផ្តល់ការពិគ្រោះយោបល់ ​និង​ដោះស្រាយបណ្តឹងតវ៉ារបស់វិនិយោគិនបរទេស​ (FIO) គឺជា​យន្តការ​ឯករាជ្យមួយក្នុងការដោះស្រាយទុក្ខកង្វល់​ និងបណ្តឹងតវ៉ា ដែលត្រូវបានបង្កើត​ឡើងដោយ​រដ្ឋា​ភិបាលនៃសាធារណរដ្ឋកូរ៉េ ក្នុងឆ្នាំ ១៩៩៩ ស្ថិតក្រោមច្បាប់ជំរុញការវិនិយោគ​បរទេសរបស់​សាធារណ​រដ្ឋកូរ៉េ ប៉ុន្តែជាស្ថាប័នឯករាជ្យដោយអ្នកបម្រើការនៅក្នុងស្ថាប័ន​នេះមិនមែនជា​មន្ត្រីរាជ​ការ​នោះទេ ប៉ុន្តែជាអ្នកជំនាញអាជីពទៅតាមវិស័យនីមួយៗ។ ​

FIO មានការទទួលខុស​ត្រូវលើការ​ផ្តល់​ការប្រឹក្សាយោបល់ដល់ក្រុមហ៊ុនដែលមាន​បំណងបណ្ដាក់​ទុន​វិនិយោគ ឬបានបណ្តាក់ទុននៅក្នុងប្រទេសកូរ៉េ ​ដោយដោះស្រាយរាល់ការលំបាក ទុក្ខកង្វល់ និងបណ្តឹងតវ៉ានានា ដែលប្រឈមដោយវិនិយោគិនបរទេស ក្នុងគោលបំណងកែលម្អបរិយាកាស​វិនិយោគ និងសម្របសម្រួលដល់ការដំណើរការអាជីវកម្មរបស់ក្រុមហ៊ុន​បរទេសឱ្យទទួល​បានជោគ​ជ័យ។​

​ប្រព័ន្ធ Ombudsman របស់សាធារណរដ្ឋកូរ៉េ​ ត្រូវបានទទួលស្គាល់យ៉ាងទូលំទូលាយថា​ជាឧត្តមា​នុវត្តន៍​អន្តរជាតិ សម្រាប់ការផ្តល់ការគាំទ្រដល់វិនិយោគិនចាប់តាំងពីដំណាក់កាលដំបូង និងការថែទាំវិនិយោគិន។

ប្រព័ន្ធនេះត្រូវបានទទួលស្គាល់ដោយអង្គការអន្តរជាតិនានា ដូចជា អង្គការ OECD, ធនាគារពិភពលោក (World Bank) និងសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ (UNCTAD) ចំពោះប្រសិទ្ធភាពខ្ពស់ក្នុងការលើកកម្ពស់ទំនុកចិត្តរបស់វិនិយោគិន។

បណ្តាប្រទេសជាច្រើន បានសិក្សា និងដកស្រង់ពិសោធន៍តាមគំរូនេះ នៅក្នុងការបង្កើតយន្តការផ្តល់ការពិគ្រោះយោបល់ និងដោះស្រាយបណ្តឹងតវ៉ារបស់វិនិយោគិន នៅក្នុងប្រទេសរបស់ខ្លួន។

ក្នុងកិច្ចពិភាក្សាការងារនេះ លោកប្រធាន FIO បានលើកឡើងពីប្រព័ន្ធ «Home Doctor» ដែលជាយន្តការដ៏ជោគជ័យរបស់កូរ៉េ ក្នុងការចាត់តាំងអ្នកជំនាញទទួលបន្ទុកដោយផ្ទាល់លើករណីនីមួយៗ ដើម្បីពិនិត្យបញ្ហាប្រឈម និងសម្របសម្រួលស្វែងរកដំណោះស្រាយជូនវិនិយោគិនបរទេសអោយបានទាន់ពេលវេលា។ លោក​ប្រធានក៏បានបង្ហាញពីការគាំទ្រក្នុងការចូលរួមផ្តល់ជំនួយ​បច្ចេកទេ​សក្នុងការ​រៀបចំប្រព័ន្ធដែលមានលក្ខណ:ស្រដៀងគ្នានេះដល់កម្ពុជាផងដែរ។ ​

​រាជរដ្ឋាភិបាលក៏បានដាក់ចេញនូវយន្តការដែលផ្តល់ឱកាសឱ្យមានការសន្ទនាត្រង់ទៅត្រង់មក រវាងផ្នែករដ្ឋ និងវិស័យឯកជន រួមមានជាអាទិ៍៖ វេទិការដ្ឋាភិបាល-ផ្នែកឯកជន (G-PSF), កិច្ចសន្ទនា​រវាងរដ្ឋនិងវិស័យឯក​ជន (PPSD), និងកម្មវិធីទទួលទានអាហារពេលព្រឹកធុរកិច្ច (P-PS Breakfast Briefing) ដែលស្ថាប័នរដ្ឋបានសហការយ៉ាងជិតស្និទ្ធជាមួយសភាពាណិជ្ជកម្មអន្តរជាតិនានា ដែល​ឆ្លុះ​បញ្ចាំងពីការប្តេជ្ញាចិត្តយ៉ាងមុតមាំរបស់កម្ពុជា ក្នុងការការពារ និងបង្កលក្ខណៈងាយស្រួល​ជូន​ដល់វិនិយោគិនបរទេស៕