ព័ត៌មានអន្ដរជាតិ

ភ្ញាក់ផ្អើលពេញកិច្ចប្រជុំអឺរ៉ុប! រដ្ឋមន្ត្រីស្រីវ័យក្មេងម្នាក់ ពរកូនង៉ែតអាយុ ៣ខែ ទៅប្រជុំជាមួយមេដឹកនាំអឺរ៉ុប

បានផុស

១២ វិនាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

បណ្តារដ្ឋមន្ត្រីនៃបណ្តាប្រទេសសហភាពអឺរ៉ុប (EU) បានជួបប្រជុំគ្នានៅប្រទេសលុចសំបួរ កាលពីថ្ងៃ ទី២៥ ខែមិថុនា ដើម្បីពិភាក្សាអំពីគោលនយោបាយនានាទាក់ទងនឹងការប្រែប្រួលអាកាសធាតុ។ យ៉ាងណា កិច្ចប្រជុំនេះ បានក្លាយជាព្រឹត្តិការណ៍ដ៏ពិសេសមួយ ជាមួយនឹងវត្តមានរបស់រដ្ឋមន្ត្រីម្នាក់ ដែលពរទារកអាយុបីខែម្នាក់ឈ្មោះ Adam ចូលរួមប្រជុំដែរ។

**រដ្ឋមន្ត្រីក្រសួងអាកាសធាតុស៊ុយអែត លោកស្រី Romina Pourmokhtari (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងអាកាសធាតុស៊ុយអែត លោកស្រី Romina Pourmokhtari បានពរកូនប្រុសអាយុ៣ខែឈ្មោះ Adam ទៅចូលរួមកិច្ចប្រជុំក្រុមប្រឹក្សាសហភាពអឺរ៉ុបនៅប្រទេសលុចសំបួរ ដើម្បីបង្ហាញឲ្យឃើញកាន់តែច្បាស់ពីអត្ថប្រយោជន៍នៃគោលនយោបាយច្បាប់សម្រាកថែទាំកូនសម្រាប់មាតាបិតា ដែលមិនបង្ខំឲ្យស្ត្រីត្រូវជ្រើសរើសរវាងការងារ និងទំនួលខុសត្រូវក្នុងគ្រួសារនោះឡើយ។

លោកស្រី Pourmokhtari បានប្រាប់ទីភ្នាក់ងារសារព័ត៌មាន Reuters ថា «ខ្ញុំចង់បង្ហាញខ្លួនដើម្បីធ្វើជាគំរូមួយថា យើងមិនចាំបាច់ធ្វើការជ្រើសរើស រវាងការងារនិងគ្រួសារនោះទេ។ រឿងនេះ ជាការពិតណាស់ វាក៏ទាមទារឲ្យមានដៃគូដែលមិនមានផ្នត់គំនិតបុរាណ ពោលគឺនរណាម្នាក់ដែលមានគំនិតទាន់សម័យ និងមានឆន្ទៈក្នុងការរួមដំណើរជាមួយខ្ញុំ»។

នៅក្នុងនោះផងដែរ មន្ត្រីក្រុមប្រឹក្សាសហភាពអឺរ៉ុបម្នាក់ បានបញ្ចេញមតិថា តាមអ្វីដែលស្ថាប័ននេះធ្លាប់ដឹង នេះជាលើកទីមួយហើយដែលមានទារកចូលរួមកិច្ចប្រជុំថ្នាក់រដ្ឋមន្ត្រីរបស់សហភាពអឺរ៉ុបបែបនេះ។

លោកស្រី Pourmokhtari អាយុ ៣០ឆ្នាំ គឺជារដ្ឋមន្ត្រីរដ្ឋាភិបាលដែលមានវ័យក្មេងជាងគេបំផុតនៅក្នុងប្រវត្តិសាស្ត្ររបស់ប្រទេសស៊ុយអែត នៅពេលលោកស្រី ចូលកាន់តំណែងក្នុងឆ្នាំ ២០២២។ លោកស្រីទើបតែបានត្រឡប់មកបំពេញការងារវិញ បន្ទាប់ពីសម្រាកថែទាំកូន ខណៈដែលស្វាមីរបស់លោកស្រី កំពុងស្ថិតក្នុងច្បាប់សម្រាករហូតដល់ការបោះឆ្នោតរបស់ស៊ុយអែតនៅខែកញ្ញា ហើយបានធ្វើដំណើរជាមួយលោកស្រីទៅកាន់ប្រទេសលុចសំបួរ ដើម្បីជួយមើលថែទារក Adam។

គួរបញ្ចាក់ដែរថា ស៊ុយអែតមានគោលនយោបាយច្បាប់សម្រាកថែទាំកូនដ៏ល្អបំផុតមួយក្នុងពិភពលោក ដែលគាំទ្រដោយប្រព័ន្ធពន្ធដារខ្ពស់ក្នុងប្រទេសនេះ ហើយបញ្ហានេះបានក្លាយជាចំណុចក្តៅខាងនយោបាយនៅក្នុងយុទ្ធនាការឃោសនាបោះឆ្នោត។ ជាក់ស្ដែង មាតាបិតាទទួលបានការសម្រាកដោយទទួលបានប្រាក់បៀវត្សរ៍សរុបប្រហែល ១៦ខែ។ ក្នុងនោះ ច្បាប់សម្រាករយៈពេល ៩០ថ្ងៃ ត្រូវបានរក្សាទុកសម្រាប់ម្នាក់ៗដាច់ដោយឡែកពីគ្នា និងមិនអាចផ្ទេរទៅឲ្យម្នាក់ទៀតបានឡើយ។ ប្រសិនបើឪពុក ឬម្តាយមិនបានប្រើប្រាស់ពេលវេលាសម្រាកដែលបានកំណត់នេះទេ ថ្ងៃទាំងនោះនឹងត្រូវបាត់បង់ដោយស្វ័យប្រវត្តិ។

ច្បាប់សម្រាកដែលមិនអាចផ្ទេរបានទាំងនេះ ជារឿយៗត្រូវបានគេហៅថា «ខែរបស់ឪពុក» ដែលត្រូវបានដាក់ចេញក្នុងគោលបំណងលើកទឹកចិត្តឲ្យអ្នកជាឪពុក ចំណាយពេលកាន់តែច្រើនជាមួយកូនៗរបស់ពួកគេ៕

អត្ថបទ ៖ សាង ស្រីល័ក្ខ