ព័ត៌មានអន្ដរជាតិ

មូលដ្ឋានទ័ពអាមេរិកសំខាន់ៗចំនួន៨ នៅគុយវ៉ែត និងបារ៉ែន រងការវាយប្រហារតាមអាកាស ដោយយោធាអ៊ីរ៉ង់

បានផុស

២២ វិនាទី មុន

នៅ

ថ្ងៃអាទិត្យ ២៨ មិថុនា ២០២៦

ដោយ

ស្ថានការណ៍នៅមជ្ឈិមបូព៌ាមិនបានធូរស្បើយឡើយ ដោយសារភាគីអាមេរិកនិងអ៊ីរ៉ង់បន្តចោទគ្នាទៅវិញទៅមក កងកម្លាំងឆ្មាំបដិវត្តន៍អ៊ីរ៉ង់អះអាងនៅព្រឹកថ្ងៃអាទិត្យនេះ ថា ការវាយប្រហារដោយមីស៊ីល និងដ្រូនរបស់ខ្លួនបានកំណត់គោលដៅលើទីតាំងយោធាអាមេរិកចំនួន៨ នៅប្រទេសគុយវ៉ែត និងបារ៉ែន ដើម្បីឆ្លើយតបទៅនឹងការវាយប្រហារថ្មីៗរបស់អាមេរិកលើអ៊ីរ៉ង់។

សេចក្តីថ្លែងការណ៍មួយចេញផ្សាយដោយទីភ្នាក់ងារសារព័ត៌មាន Tasnim របស់អ៊ីរ៉ង់លើកឡើងថា កងកម្លាំងអ៊ីរ៉ង់បានបង្ហាញពីឥទ្ធិពលរបស់អង្គភាពកងទ័ពជើងទឹកនិងអវកាស ហើយក៏សម្រេចចិត្តធ្វើប្រតិបត្តិការនៅម៉ោង ២ព្រឹក និង ៣ព្រឹក ម៉ោងនៅក្នុងស្រុក។

មូលដ្ឋានទ័ពអាមេរិកនៅគុយវ៉េត។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងឆ្មាំបដិវត្តន៍អ៊ីរ៉ង់អះអាងថា ការវាយប្រហារទាំងនោះបានកំណត់គោលដៅលើហេដ្ឋារចនាសម្ព័ន្ធយោធាសំខាន់ៗរបស់សហរដ្ឋអាមេរិក រួមទាំងមូលដ្ឋានទ័ពអាកាស Ali Al Salem ក្នុងប្រទេសគុយវ៉ែត និងទីស្នាក់ការកណ្តាលនៃកងនាវាចរណ៍ទី៥ របស់សហរដ្ឋអាមេរិកក្នុងប្រទេសបារ៉ែន។

អ៊ីរ៉ង់និយាយទៀតថា ប្រតិបត្តិការនេះកើតឡើង បន្ទាប់ពីកងកម្លាំងអាមេរិកបានវាយប្រហារលើទីតាំងឆ្នេរសមុទ្រអ៊ីរ៉ង់ចំនួន ៥កន្លែង កាលពីព្រឹកថ្ងៃអាទិត្យ ក្រោមលេសលើការប្រតិបត្តិការរបស់អ៊ីរ៉ង់ប្រឆាំងនឹងនាវាដែលរំលោភបំពាននៅច្រកហ័រមូស។

កងកម្លាំងអ៊ីរ៉ង់អះអាងថា ការរៀបចំនាវាចរណ៍ក្នុងច្រកសមុទ្រ Hormuz គឺស្ថិតក្រោមការសម្របសម្រួលរបស់អ៊ីរ៉ង់ក្រោមអនុស្សរណៈអ៊ីស្លាម៉ាបាដប៉ុណ្ណោះ។

សេចក្តីថ្លែងការណ៍នេះក៏ព្រមានថា៖ « នាវាណាដែលរំលោភបំពានប្រឈមមុខនឹងសកម្មភាពខ្លាំងជាងមុន ហើយការវាយប្រហារនាពេលអនាគតណាមួយដោយសត្រូវដោយគ្មានហេតុផលនឹងទាញឱ្យមានការឆ្លើយតបដ៏ធ្ងន់ធ្ងរ។ ការរំលោភលើបទឈប់បាញ់ណាមួយនឹងបញ្ឈប់ដំណើរការលើកិច្ចព្រមព្រៀងទាំងអស់ ក្រោមអនុស្សរណៈអ៊ីស្លាម៉ាបាដ»។

គួរបញ្ជាក់ថា បញ្ជាការកណ្តាលយោធាអាមេរិកបានប្រកាសវាយប្រហារបន្ថែមទៅលើគោលដៅជាច្រើនក្នុងប្រទេសអ៊ីរ៉ង់ ដោយនិយាយថាកងកម្លាំងអាមេរិកបានកំណត់គោលដៅលើហេដ្ឋារចនាសម្ព័ន្ធឃ្លាំមើលយោធាអ៊ីរ៉ង់ ប្រព័ន្ធទំនាក់ទំនង ទីតាំងការពារដែនអាកាស និងកន្លែងទាក់ទងនឹងដ្រូន បន្ទាប់ពីមានសកម្មភាពបន្តរបស់អ៊ីរ៉ង់ប្រឆាំងនឹងការដឹកជញ្ជូននាវាពាណិជ្ជកម្ម នៅជិតច្រកសមុទ្រ Hormuz ៕

សម្រួល៖ ណឺ មិនា